Views: 1
ប្រែសម្រួលៈបំណង(ដេល្លីម៉េល)៖ ការវាយប្រហារដោយកាំជ្រួចរុស្ស៊ីបានសម្លាប់មនុស្សបីនាក់នៅទីក្រុងឃើសុនរបស់អ៊ុយក្រែននៅពេលការប្រយុទ្ធកំពុងផ្ទុះឡើងជាខ្លាំងនៅតំបន់ដូណិតសខ៍ភាគខាងកើតកន្លែងដែលកងកម្លាំងរុស្ស៊ីបាញ់ផ្លោងជញ្ជ្រំដាក់ទីប្រជុំជនវូឡេដា(Vuhledar)។
ក្នុងពេលជាមួយគ្នា ប្រធានាធិបតីអ៊ុយក្រែនលោកវ៉ូឡូឌីមៀ ហ្សេឡេនស្គី បាននិយាយថា អ៊ុយក្រែនប្រឈមនឹងស្ថានភាពលំបាកនៅដូណិតសខ៍ហើយទាមទារអោយលោកខាងលិចផ្តល់គ្រឿងសព្វាវុធអោយលឿនឡើង នៅពេលតែប៉ុន្មានថ្ងៃក្រោយពីក្រុមសម្ពន្ធមិត្តយល់ព្រមបញ្ជូនរថក្រោះធុនធ្ងន់អោយរដ្ឋាភិបាលទីក្រុងគៀវ។
លោកបាននិយាយក្នុងសុន្ទរកថាតាមវីដេអូមួយកាលពីយប់ថ្ងៃអាទិត្យថា« សភាពការណ៍តឹងតែងណាស់។ ទីក្រុងបាឃ្មុត(Bakhmut)ទីប្រជុំជនវូឡេដា និងផ្នែកដទៃទៀតនៃតំបន់ដូណិតសខ៍រងការវាយប្រហារពីកងកម្លាំងរុស្ស៊ីជាប្រចាំ។រុស្ស៊ីចង់អោយសង្គ្រាមនេះអូសបន្លាយពេលនិងធ្វើអោយកងកម្លាំងយើងអស់ខ្សោះកម្លាំងនិងសព្វាវុធ ។ដូច្នេះយើងត្រូវតែកំណត់ពេលសំរាប់ទទួលសព្វាវុធ។យើងត្រូវតែពន្លឿនវានិងបើកជំរើសសព្វាវុធថ្មីសំរាប់អ៊ុយក្រែន»។
កាលពីថ្ងៃអាទិត្យ ការវាយប្រហារដោយកាំជ្រួចមួយលើអាគារមនុស្សរស់នៅមួយក្នុងទីប្រជុំជុន ខាគីវ បានសម្លាប់ស្ត្រីម្នាក់។
កាលពីថ្ងៃសៅរ៍ រុស្ស៊ីបានចោទប្រកាន់កងកម្លាំងអ៊ុយក្រែនថាប្រើរ៉ុក្កែតដែលអាម៉េរិកជួយវាយប្រហារលើមន្ទីរពេទ្យមួយនៅតំបន់ខាងកើតអ៊ុយក្រែន ដោយបានសម្លាប់មនុស្ស១៤នាក់។
នៅថ្ងៃចន្ទនេះ នាយសេនាធិការកងទ័ពអ៊ុយក្រែនបាននិយាយថា យុទ្ធជនអ៊ុយក្រែនបានវាយបណ្តេញទាហានរុស្ស៊ីនៅក្រុងបាឃ្មុតនិងនៅទីក្រុងដទៃទៀតក្នុងតំបន់ដូណិតសខ៍និងលូហាន់សខ៍។សេចក្តីថ្លែងការណ៍យោធាមួយបាននិយាយថា មានការប្រយុទ្ធគ្នាដ៏ខ្លាំងនៅវូឡេដា នៅភាគនិរតីក្រុងបាឃ្មុត។
តាមពិតទៅ រថក្រោះសរុប៣២១គ្រឿងត្រូវបានប្រទេសជាច្រើនសន្យាជួយអ៊ុយក្រែន តែវាត្រូវចំណាយពេលរាប់ខែមុននឹងរថក្រោះទាំងនោះទៅដល់សមរភូមិ។អ៊ុយក្រែនចង់អោយគេប្រគល់សព្វាវុធធុនធ្ងន់ទាំងនេះអោយលឿននៅពេលភាគីក្នុងសង្គ្រាមទាំងពីរត្រៀមប្រយុទ្ធគ្នាធំនៅរដូវរំហើយខាងមុខពេលទឹកកករលាយ៕
ទាហានអ៊ុយក្រែននៅក្នុងរថក្រោះសម័យសូវៀតកំពុងធ្វើដំណើរទៅកាន់តំបន់ប្រយុទ្ធលូហ្កានសខ៍។រដ្ឋាភិបាលទីក្រុងគៀវរំពឹងលើរថក្រោះលោកខាងលិចដើម្បីវាយបណ្តេញទាហានរុស្ស៊ីចេញពីទឹកដីរបស់ខ្លួនដែលសត្រូវកាន់កាប់ តែវានឹងមកដល់ទាល់តែប៉ុន្មានខែទៀតនៅពេលការប្រយុទ្ធគ្នាដ៏ធំមួយនឹងចាប់ផ្តើមនៅប៉ុន្មានសប្តាហ៍ទៀត