Cambodia
This article was added by the user . TheWorldNews is not responsible for the content of the platform.

រថយន្ត EV ផលិត​នៅ​ប្រទេស​ចិន​កំពុង​រះ​ត្រចង់​នៅក្នុង​ពិព័រណ៍​រថយន្ត​នៅ​ប្រទេស​ថៃ​(វីដេអូ)

Views: 1

​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ ពិព័រណ៍​យានយន្ត​អន្តរជាតិ​ថៃ ដែល​បាន​ចាប់ផ្តើម​កាលពី​ថ្ងៃ​ព្រហស្បតិ៍​ទី​១​ធ្នូ​បាន​ទាក់ទាញ​ក្រុមហ៊ុន​ផលិត​រថយន្ត​ចិន​ជាច្រើន​ចូលរួម​បង្ហាញ​ម៉ូ​ដែល​រថយន្ត​​អគ្គិសនី (EV)​ចុងក្រោយ​របស់​ពួកគេ​។

​ជាមួយ​ការលើកទឹកចិត្ត​ខាង​រថយន្ត EV ថ្មី​ចូល​ជា​ធរមាន​ជាង​ប្រាំមួយ​ខែ​មុន ទីផ្សារ EV របស់​ថៃ​បានឃើញ​ការវិវឌ្ឍ​យ៉ាង​ឆាប់រហ័ស​ដោយសារតែ​ការកាត់បន្ថយ​ពន្ធ​និង​ការឧបត្ថម្ភ​ធន​ដ៏​សំខាន់​។​

​នៅ​ពិព័រណ៍​ឆ្នាំនេះ ក្រុមហ៊ុន​អន្តរជាតិ​សំខាន់ៗ​បាន​យក​រថយន្ត EV របស់​ពួកគេ​ធ្វើ​ជា​ចំណុច​គូសបញ្ជាក់​នៅក្នុង​ពិព័រណ៍​របស់​ពួកគេ ក្នុងនោះ​រថយន្ត​អគ្គិសនី​ជិត​ពាក់កណ្តាល​គឺជា​ម៉ាក​យីហោ​របស់​ចិន​។​

​ឡាន​បង្ហាញមុខ​ថ្មីថ្មោង​ក្នុង​ទីផ្សារ​ថៃ គឺ Ora Grand Cat របស់​ក្រុមហ៊ុន Great Wall Motor (GWM) បាន​ទាក់ទាញ​ហ្វូង​ទស្សនិកជន​ជាមួយនឹង​រូបរាង​ថ្មី​និង​ទាន់សម័យ​របស់​វា​។

GWM បាន​នាំយក​ម៉ូ​ដែល​រថយន្ត ៧ ប្រភេទ​មក​បង្ហាញ ក្នុងនោះ​មាន​រថយន្ត​អគ្គិសនី​សុទ្ធ ៣ ប្រភេទ ក៏​ដូចជា​រថយន្ត​លក់ដាច់​បំផុត Haval H6 Hybrid ដែល​គេ​ប្រើ​សម្រាប់​ដឹក​មេដឹកនាំ​ក្នុងជំនួប APEC កាលពី​ខែ​វិច្ឆិកា​ផងដែរ​។​

​ប្រធាន GWM ប្រចាំ​អាស៊ាន​និង​ថៃ លោក អែល​លៀត ចាង (Elliot Zhang) បាន​ប្រាប់​ទីភ្នាក់ងារ​សារព័ត៌មាន​ស៊ីន​ហួថា តាំង​ពី​បង្កើត​រោងចក្រ​នៅ​ថៃ​នៅ​ចុងឆ្នាំ​២០២០​មក ក្រុមហ៊ុន GWM បាន​បញ្ចេញ​រថយន្ត​ហាយ​ប្រ៊ី​ដ​និង​រថយន្ត​អគ្គិសនី​សុទ្ធ ៥ ម៉ូ​ដែល ដើម្បី​បំពេញ​តម្រូវការ​ចម្រុះ​ក្នុងស្រុក​ជាមួយនឹង​តម្លៃ​ចម្រុះ​អាច​លៃលក​បាន​។

​លោក​បាន​បន្ថែមថា ក្រុមហ៊ុន​កំពុង​បង្កើត​យុទ្ធសាស្ត្រ​គាំទ្រ​ខាង​អាគុយ​និង​គ្រឿងបន្លាស់ និង​មាន​គម្រោង​ប្រែក្លាយ​ផលិតកម្ម​រថយន្ត​អគ្គិសនី​ទៅ​ជា​លក្ខណៈ​ក្នុងស្រុក​ចាប់ពី​ឆ្នាំ ២០២៤ តទៅ​។​

​ក្រុមហ៊ុន SAIC Thailand បាន​នាំ​រថយន្ត ៩ ម៉ូ​ដែល​មក​តាំង​បង្ហាញ ក្នុងនោះ​រួម​មាន​រថយន្ត​អគ្គិសនី​សុទ្ធ ៣ ម៉ូ​ដែល ដែល​ក្នុងចំណោម​នោះ​រថយន្ត MG4 ជា​រថយន្ត​អគ្គិសនី​វិល​កង់​ក្រោយ​ដំបូង​គេ ដែល​ដាក់​លក់​លើ​ទីផ្សារ​អាស៊ីអាគ្នេយ៍​មួយ​នេះ​។​

​យោង​តាម​ក្រុមហ៊ុន​ចិន​មួយ​នេះ​បាន​ឱ្យដឹងថា រថយន្ត​ម៉ូ​ដែល​នេះ​អាច​ផ្តល់​នូវ​បទពិសោធន៍​បើកបរ​ល្អប្រសើរ​ធៀប​នឹង​ម៉ូ​ដែល​ស្រដៀង​គ្នា​ផ្សេងទៀត ទាក់ទង​នឹង​ការគ្រប់គ្រង​និង​លំនឹង​រថយន្ត និង​ទទួលបាន​ការឆ្លើយតប​វិជ្ជមាន​ពី​អ្នក​សាកល្បង​បើកបរ​ក្នុង​ស្រុក​។​

​ក្រុមហ៊ុន​ចិន​មួយទៀត​គឺ BYD ដែល​ប្រកាស​ការវិនិយោគ​ក្នុង​ប្រទេស​ថៃ​កាលពី​ខែ​កញ្ញា បាន​ណែនាំ​រថយន្ត EV សុទ្ធ​ដំបូង​របស់​ខ្លួន​ម៉ាក ATTO 3 ក្នុង​ប្រទេស​នេះ​។​

​ក្រុមហ៊ុន Hozon Auto ដែល​ទើប​ចូល​ប្រទេស​ថៃ​ឆ្នាំនេះ បានបង្ហាញ​រថយន្ត EV សុទ្ធ​៣​ម៉ូ​ដែល រួមមាន​ទាំង​រថយន្ត NETA V ដែល​ដាក់​លក់​កាលពី​ខែ​សីហា និង ទទួលបាន​ការបញ្ជា​ទិញ​ទុក​មុន​ជាង ៦.០០០ គ្រឿង​រហូតមកទល់​ឥឡូវនេះ​។

​ពិព័រណ៍​ប្រចាំឆ្នាំ ដែល​ដំណើរការ​រហូត​ដល់​ថ្ងៃទី ១២ ធ្នូ បាន​ទាក់ទាញ​ក្រុមហ៊ុន​ផលិត​រថយន្ត ៣៥ និង​ក្រុមហ៊ុន​ផលិត​ម៉ូតូ ១៧ មក​ពី​ជាង​១០​ប្រទេស​និង​តំបន់​៕

Post navigation