Views: 8
ដោយ: ពៅនិមល / ភ្នំពេញ៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអញ្ជើញចូលរួម កិច្ចពិគ្រោះយោបល់ក្រៅផ្លូវការថ្នាក់រដ្ឋមន្ត្រី ស្ដីពីកំណែទម្រង់ប្រព័ន្ធ ដោះស្រាយវិវាទ របស់អង្គការពាណិជ្ជកម្មពិភពលោក ដែលត្រូវបានរៀបចំឡើង ដោយ លោកស្រីអគ្គរដ្ឋទូត Katherine Tai តំណាងពាណិជ្ជកម្មសហរដ្ឋអាមេរិក (USTR) នៅប្រទេសឥណ្ឌូណេស៊ី។
ប្រភពពីក្រសួងពាណិជ្ជកម្ម នៅព្រឹកថ្ងៃទី២៣ ខែកញ្ញា ឆ្នាំ២០២២ នេះ បានលើកឡើង ក្នុងបណ្តាញសង្គមថាៈ កិច្ចពិគ្រោះយោបល់ក្រៅផ្លូវការនេះ គឺជាព្រឹត្តិការណ៍អមមួយ របស់កិច្ចប្រជុំរដ្ឋមន្ត្រីពាណិជ្ជកម្ម វិនិយោគ និងឧស្សាហកម្មរបស់ក្រុមទេស G20 នៅទីក្រុងបាលី ដែលរៀបចំឡើងក្នុងគោលបំណង ដើម្បីចែករំលែកទស្សនាទានល្អៗ របស់បណ្ដារដ្ឋមន្ត្រីពាណិជ្ជកម្ម ទៅលើការកែទម្រង់ប្រព័ន្ធដោះស្រាយវិវាទរបស់ អង្គការពាណិជ្ជកម្មពិភពលោក សំដៅធ្វើយ៉ាងណា ឱ្យប្រព័ន្ធដោះស្រាយវិវាទនេះ មានលក្ខណៈកាន់តែមានប្រសិទ្ធភាព និងប្រកបដោយបរិយាប័ន្ន។
នៅក្នុងឱកាសនោះ លោករដ្ឋមន្ត្រី បានគូសបញ្ជាក់ថាៈ ទោះបីជាប្រទេសកម្ពុជា ជាប្រទេសអភិវឌ្ឍន៍តិចតួច ដែលមិនធ្លាប់មានវិវាទក៏ដោយ ក៏កម្ពុជាមានគោលបំណង ឱ្យសមាជិកអង្គការពាណិជ្ជកម្មពិភពលោក ផ្តល់សំទ្បេងឱ្យក្រុមប្រទេសអភិវឌ្ឍន៍តិចតួច (LDCs) នៅក្នុងដំណើរការក្ដីផ្សេងៗ នៅក្នុងប្រព័ន្ធនេះ។
លោកបានគូសបញ្ជាក់ថាៈ ដើម្បីឱ្យប្រព័ន្ធនេះ ដំណើរការប្រកបដោយប្រសិទ្ធភាព គឺចាំបាច់ត្រូវជៀសវាងការបង្កើតនូវរាល់នីតិវិធី និងវិធានដែលមានលក្ខណៈស្មុគ្រស្មាញ និងថ្លៃចំណាយខ្ពស់ ដែលអាចបង្ករជារបាំងផ្នែករដ្ឋបាល ហើយប៉ះពាល់ដល់ការចូលរួម ដំណើរការក្ដីរបស់ក្រុមប្រទេសអភិវឌ្ឍន៍តិចតួច ឬប្រទេសផ្សេងទៀត។
លោករដ្ឋមន្ត្រី បានបន្តថាៈ ជំនួយបច្ចេកទេស និងដំបូន្មានផ្នែកច្បាប់ ត្រូវតែផ្ដល់ជូនដល់ ក្រុមប្រទេសអភិវឌ្ឍន៍តិចតួច ដើម្បីជាជំនួយដល់ដំណើរការក្ដីផ្សេងៗដែលពាក់ព័ន្ធនឹង ក្រុមប្រទេសនេះ។ បន្ថែមពីនេះ លោកបានលើកឡើងផងដែរថាៈ គួរតែមានអ្នកកាត់ក្ដី ដែលមិនលំអៀង និងមានលក្ខណៈសម្បត្តិគ្រប់គ្រាន់ ដែលមកពីគ្រប់តំបន់ និងយេនឌ័រ ហើយត្រូវជំរុញឱ្យមានចៅក្រម ដែលមានសមត្ថភាពមកពីប្រទេសសមាជិកអភិវឌ្ឍន៍ តិចតួចផងដែរ។
ឆ្លៀតក្នុងឱកាសនោះ លោកបានជម្រាបថាៈ កម្ពុជាបានត្រៀមខ្លួនរួចជាស្រេច ក្នុងការចូលរួមយ៉ាងសកម្ម ជាមួយគ្រប់បណ្ដាភាគីពាក់ព័ន្ធ នៅក្នុងកំណែទម្រង់ប្រព័ន្ធ ដោះស្រាយវិវាទរបស់ អង្គការពាណិជ្ជកម្មពិភពលោក សំដៅធ្វើយ៉ាងណា ធ្វើឱ្យប្រព័ន្ធនេះ មានដំណើរការកាន់តែល្អប្រសើរបន្ថែមទៀត នាពេលអនាគត៕ V / N
រូបភាព ( លោករដ្ឋមន្ត្រីពាណិជ្ជកម្មចូលរួមកិច្ចប្រជុំស្ដីពីកំណែទម្រង់ប្រព័ន្ធដោះស្រាយវិវាទពាណិជ្ជកម្មនៅឥណ្ឌូនេស៊ី ) រូបភាព ហ្វេសប៊ុក
