Views: 8
ប្រែសម្រួល : កញ្ញាដាលីស (ដេល្លីម៉េល) ៖ សហស្ថាបនិកក្រុមហ៊ុនរូបិយប័ណ្ណអេឡិចត្រូនិកសិង្ហបុរីមួយរូបបានទទួលមរណភាពនៅអាយុ ៣០ ឆ្នាំ។
លោក ធៀនធៀន គុលឡានឌឺ (Tiantian Kullander) ជាសហស្ថាបនិកក្រុមហ៊ុនទ្រព្យសម្បត្តិឌីជីថល Amber Group បានទទួលមរណភាពក្នុងដំណេករបស់គាត់ នេះបើតាមអ្នកនាំពាក្យក្រុមហ៊ុនរបស់គាត់។
ឪពុកកូនមួយ ដែលជាប់ឈ្មោះក្នុងបញ្ជីអ្នកមានអាយុក្រោម ៣០ ឆ្នាំដ៏ល្បីល្បាញរបស់ទស្សនាវដ្ដី Forbes ក្នុងឆ្នាំ ២០១៩ បានស្លាប់ដោយមិននឹកស្មានដល់នៅថ្ងៃទី ២៣ ខែវិច្ឆិកា។ មិនមានព័ត៌មានលម្អិតបន្ថែមណាមួយត្រូវបានផ្តល់ជុំវិញមូលហេតុនៃការស្លាប់នោះទេ។
ក្រុមហ៊ុន Amber Group បានពណ៌នាលោកគុលឡានឌឺ ដែលមិត្តភក្តិនិងសហការីស្គាល់ថា TT ថាជា “មនុស្សសំខាន់សម្រាប់ការបង្កើតក្រុមហ៊ុន Amber និងជាសសរស្តម្ភនៃភាពជោគជ័យរបស់យើង”។
ក្រុមហ៊ុនបាននិយាយក្នុងសេចក្តីថ្លែងការណ៍ថា “គាត់បានដាក់បេះដូងនិងដួងព្រលឹងរបស់គាត់ទៅក្នុងក្រុមហ៊ុននៅគ្រប់ដំណាក់កាលនៃការរីកចម្រើនរបស់ក្រុមហ៊ុន។ គាត់បានដឹកនាំដោយគំរូជាមួយនឹងបញ្ញា ចិត្តសប្បុរស ភាពរាបសារ ភាពឧស្សាហ៍ព្យាយាម និងគំនិតច្នៃប្រឌិតរបស់គាត់”។
“TT គឺជាអ្នកដឹកនាំមានគំនិតវែងឆ្ងាយដ៏គួរឱ្យគោរព និងត្រូវបានទទួលស្គាល់យ៉ាងទូលំទូលាយថាជាអ្នកត្រួសត្រាយផ្លូវសម្រាប់ឧស្សាហកម្មនេះ។ ចំណេះដឹងដ៏ជ្រៅជ្រះរបស់គាត់ ឆន្ទៈរបស់គាត់ក្នុងការសហការ និងបំណងរបស់គាត់ក្នុងការជួយអ្នកដទៃ បានផ្តល់អត្ថប្រយោជន៍ជាច្រើនដល់ក្រុមហ៊ុនទើបផ្តើមអាជីវកម្មនិងបុគ្គលច្រើនរាប់មិនអស់”។
ក្រុមហ៊ុន Amber Group មានមូលដ្ឋាននៅប្រទេសសិង្ហបុរី ហើយវេបសាយរបស់ខ្លួននិយាយថា ក្រុមហ៊ុនមាន “វត្តមាននៅអាថែន ហ្សឺណែវ ឌូបៃ ហុងកុង អ៊ីស្តង់ប៊ុល ឡុងដ៍ ម៉ិកស៊ីកូស៊ីធី តៃប៉ិ តូក្យូ វ៉ាន់ខូវើ និងហ្សួរីច”។
នៅក្នុងសារលិខិតរំលែកទុក្ខមួយ ដែលបានបង្ហោះលើ Twitter នាង អានណាបែលឡា ហ័ង (Annabelle Huang) ដែលជាដៃគូគ្រប់គ្រងនៅក្រុមហ៊ុន Amber Group បាននិយាយថា “បាត់បង់មិត្តជាទីស្រឡាញ់ដែលបានផ្លាស់ប្តូរជីវិតរបស់ខ្ញុំ ក្នុងចំណោមអ្នកផ្សេងទៀតតាមរបៀបដែលគាត់មិនបានដឹងខ្លួន”។
នាងបាននិយាយថា គុលឡានឌឺគឺជា “មនុស្សល្អបំផុតក្នុងចំណោមពួកយើង ពោលជាការលាយបញ្ចូលគ្នាដ៏កម្រនៃអ្នកប្រាជ្ញនិងអ្នកចម្បាំង ដែលតែងមានចិត្តសប្បុរសជាមួយពេលវេលារបស់គាត់ ស្មោះត្រង់ឥតឈប់ឈរ និងជាសំឡេងដ៏ក្លៀវក្លានៅក្នុងឧស្សាហកម្មរបស់យើង។ កេរដំណែលរបស់គាត់នឹងនៅតែបន្ត”។
គុលឡានឌឺ ជាអតីតពាណិជ្ជករនៅក្រុមហ៊ុន Morgan Stanley និង Goldman Sachs បានបង្កើតក្រុមហ៊ុន Amber Group ក្នុងឆ្នាំ ២០១៧។ ក្រុមហ៊ុននេះមានតម្លៃ ៣ ពាន់លានដុល្លារក្នុងប៉ុន្មានខែថ្មីៗនេះ។
ដំណឹងមរណភាពនេះកើតឡើងប៉ុន្មានសប្តាហ៍ បន្ទាប់ពីសេដ្ឋីលុយអេឡិចត្រូនិកវ័យក្មេងឈ្មោះ នីកូឡាយ មូសេជីយ៉ាន (Nikolai Mushegian) អាយុ ២៩ ឆ្នាំបានលង់ទឹកស្លាប់នៅឆ្នេរព័រតូរីកូ ក្រោយសរសេរលើ Twitterថា គាត់ខ្លាចពួក CIA និង Mossad តាមធ្វើឃាតរូបគាត់។
នីកូឡាយមានប្រវត្តិកើតរោគចិត្ត ហើយគ្រួសាររបស់គាត់មិនជឿថានេះជាករណីឃាតកម្មនោះទេ៕
លោក ធៀនធៀន គុលឡានឌឺ ស្លាប់ក្នុងដំណេកកាលពីថ្ងៃទី២៣វិច្ឆិកា
នីកូឡាយ មូសេជីយ៉ានអាយុ ២៩ ឆ្នាំក៏ស្លាប់លង់ទឹកស្លាប់នៅឆ្នេរព័រតូរីកូដែរ