Views: 15
ដោយៈ សុខុម / ស្ទឹងត្រែងៈ ក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី១០ ខែសីហា ឆ្នាំ២០២២ បានសម្ពោធដាក់ឱ្យដំណើរការជាផ្លូវការនូវ មជ្ឈមណ្ឌលស្រាវជ្រាវ និងផលិតពូជវ៉ារីសត្វមេគង្គលើ ដែលមានតំលៃជាង ១លានដុល្លារសហរដ្ឋអាមេរិក ដែលជាជំនួយរបស់ធនាគារពិភពលោក ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ស្វាយ សំអ៊ាង អភិបាលខេត្តស្ទឹងត្រែង លោកស្រី Maryam Salim នាយិកាធនាគារពិភពលោក ប្រចាំនៅកម្ពុជា បានអញ្ជើញចូលរួមជាអធិបតី នៅក្នុងកម្មវិធីនោះ ។
ប្រតិភូក្រសួងកសិកម្ម បានឱ្យដឹងថាៈ មជ្ឈមណ្ឌលស្រាវជ្រាវ និងផលិតពូជវ៉ារីសត្វមេគង្គលើ ត្រូវបានដំណើរការសាងសង់ ចាប់ពីថ្ងៃទី២៣ ខែតុលា ឆ្នាំ២០២០ ហើយបានបញ្ចប់ នៅថ្ងៃទី២៧ ខែកញ្ញា ឆ្នាំ២០២១ លើផ្ទៃដីទំហំ ១០,៤ ហិកតា ចំណាយថវិកាសរុប ចំនួន ១.៧៥០.២៥២ ដុល្លារសហរដ្ឋអាមេរិក ។ មជ្ឈមណ្ឌលស្រាវជ្រាវ និងផលិតពូជវ៉ារី សត្វមេគង្គលើ មានទីតាំងជាប់ទន្លេសេកុង ស្ថិតក្នុងភូមិបាទដើម ឃុំសាមឃួយ ស្រុកសេសាន ចម្ងាយ ៤ គីឡូម៉ែត្រ ពីទីរួមខេត្តស្ទឹងត្រែង ហើយមានលក្ខណៈសណ្ឋានដី ជាប្រភេទដីទំនាប មានប្រភពទឹកពីទន្លេសេកុង និងប្រភពទឹកក្រោមដី ដែលអាចផ្គត់ផ្គង់ទឹក សម្រាប់បម្រើវ៉ារីវប្បកម្ម បានជាប់ជាប្រចាំ។
មជ្ឈមណ្ឌលនេះ មានស្រះ សរុបចំនួន ២៤ ក្នុងនោះ ស្រះស្តុកទឹកធំ ចំនួនមួយស្រះ កូនត្រីចំនួន១២ស្រះ បំប៉នត្រីសាច់ ៤ស្រះ ត្រីមេពូជ ៦ស្រះ ចម្រោះទឹកកខ្វក់ និងផ្ទុកកាក សំណល់មួយ និងមានប្រព័ន្ធប្រឡាយបញ្ចេញបញ្ចូលទឹក ព្រមទាំងហេដ្ឋារចនាសម្ព័ន្ធ សំខាន់ៗ ដូចជា អាគារសម្រាប់ការងារពិសោធន៍ ស្រាវជ្រាវបណ្ដុះបណ្ដាល ការិយាល័យ បណ្ណាល័យអាងបង្កាត់ភ្ញាស់ និងថែបំប៉នកូនត្រីពូជ។ អគារស្នាក់នៅ សម្រាប់បន្ត្រីរាជការ និស្សិត និងកម្មករ ឃ្លាំងសម្ភារចំណី រោងម៉ាស៊ីនភ្លើង ប្រព័ន្ធផ្លូវបេតុង និងបណ្ដាញអគ្គិសនីចំណតរថយន្ត របងរោងយាម និងអណ្ដូងទឹកស្អាត ជាដើម។
មជ្ឈមណ្ឌល មានការិយាល័យចំនួន៣ ការិយាល័យរដ្ឋបាល ការិយាល័យបច្ចេកទេស វារីវប្បកម្ម និងការិយាល័យស្រាវជ្រាវ និងមន្ទីរពិសោធន៍។
ក្រោយពីដាក់សម្ពោធឱ្យប្រើប្រាស់ជាផ្លូវការ គេនឹងរំពឹងថា មជ្ឈមណ្ឌលនេះ នឹងផ្ដល់សារៈប្រយោជន៍ សម្រាប់ប្រជាពលរដ្ឋ ជាពិសេសអ្នកខេត្តស្ទឹងត្រែង ដែលអាចមកមើល និងទិញកូនត្រី យកទៅចិញ្ចឹមជាលក្ខណៈគ្រួសារបាន៕/V
