Views: 3
ដោយៈ ទេព មង្គល / ភ្នំពេញៈ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានជំរុញឱ្យក្រុមការងារអន្ដរក្រសួង ដើម្បីចុះសិក្សា និងដោះស្រាយ ករណីរកឃើញគ្រាប់យុទ្ធភណ្ឌមិនទាន់ផ្ទុះ ក្នុងនាវាដែលលិចក្នុងទន្លេ ត្រូវមានការតាំងចិត្តខ្ពស់ អំពីការងារទាំងនេះ ដោយមិនទុកគ្រាប់យុទ្ធភណ្ឌមិនទាន់ផ្ទុះទាំងនោះ មាននៅក្នុងបាតទន្លេទៀតឡើយ។
សម្ដេចក្រឡាហោម ស ខេង បានជំរុញបែបនេះ នៅក្នុងឱកាសសម្ដេច បានអញ្ជើញដឹកនាំ កិច្ចប្រជុំពិនិត្យវឌ្ឍនភាព កិច្ចប្រតិបត្តិការបោសសម្អាត គ្រាប់យុទ្ធភណ្ឌមិនទាន់ផ្ទុះក្រោមទឹក និងស្រង់នាវាលិចក្នុងបាតទន្លេ នៅព្រឹកថ្ងៃពុធ ទី១០ ខែសីហា ឆ្នាំ២០២២ នេះ នៅទីស្ដីការក្រសួងមហាផ្ទៃ ។
នៅក្នុងកិច្ចប្រជុំនោះ ក៏មានការអញ្ជើញចូលរួមពី ថ្នាក់ដឹកនាំ ក្រសួង-ស្ថាប័នពាក់ព័ន្ធ រដ្ឋលេខាធិការប្រចាំការ រដ្ឋលេខាធិការ អនុរដ្ឋលេខាធិការ ក្រសួងមហាផ្ទៃ អគ្គនាយកស៊ីម៉ាក់ (CMAC) ព្រមទាំងភាគីពាក់ព័ន្ធ ជាច្រើនរូបទៀត។
នាឱកាសនោះ លោកនាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ និងជាប្រធានក្រុមការងារអន្ដរក្រសួង ដើម្បីចុះសិក្សា និងដោះស្រាយ ករណីរកឃើញគ្រាប់យុទ្ធភណ្ឌមិនទាន់ផ្ទុះ ក្នុងនាវាដែលលិចក្នុងទន្លេ បានរាយការណ៍ ដោយសង្ខេប ស្ដីពីវឌ្ឍនភាព នៃកិច្ចប្រតិបត្តិការបោសសម្អាត គ្រាប់យុទ្ធភណ្ឌមិនទាន់ផ្ទុះ ក្រោមទឹក នៅការដ្ឋានកោះពាមរាំង ឃុំកោះចក ស្រុកពាមជរ ខេត្តព្រៃវែង ថាៈ ក្រោយទទួលបានបទបញ្ជា របស់រាជរដ្ឋាភិបាលកម្ពុជា បានអនុញ្ញាតឱ្យក្រុមការងារ អន្ដរក្រសួង ដើម្បីចុះសិក្សា និងដោះស្រាយករណីរុករកយុទ្ធភណ្ឌមិនទាន់ផ្ទុះ ក្នុងបាតទន្លេ ព្រមទាំងបានការឯកភាពពី សម្ដេចក្រឡាហោម ស ខេង ក្រុមការងារអន្ដរក្រសួង បានបើកប្រតិបត្តិការរួមជាមួយ អង្គភាពស៊ីម៉ាក់ និងអ្នកពាក់ព័ន្ធមួយចំនួនទៀត សហការជាមួយអាជ្ញាធរ បានដំណើរការស្រាវជ្រាវ និងកំណត់ទីតាំងនៅតំបន់នោះ ហើយបើកប្រតិបត្តិការរុករក គ្រាប់យុទ្ធភណ្ឌមិនទាន់ផ្ទុះ ជារៀងរាល់ថ្ងៃ។
ដោយឡែក លោក ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយកស៊ីម៉ាក់ បានធ្វើបទបង្ហាញ អំពីបច្ចេកទេសបោសសម្អាត គ្រាប់យុទ្ធភណ្ឌមិនទាន់ផ្ទុះ និងស្រង់នាវាលិចក្នុងបាតទន្លេថាៈ ផែនការប្រតិបត្តិការបោសសម្អាតយុទ្ធភណ្ឌមិនទាន់ផ្ទុះ និងស្រង់នាវា នៅភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែង មានទំហំចំនួន ២៦៨ ហិកតា ដោយក្នុងនោះ តំបន់ហានិភ័យខ្ពស់ មានចំនួន ១៩៧ ហិកតា និងតំបន់ដែលហានិភ័យមធ្យម ចំនួន ៧១ ហិកតា ។
លោកហេង រតនា បានបញ្ជាក់ថាៈ ការបោសសម្អាតសំណល់យុទ្ធភណ្ឌមិនទាន់ផ្ទុះ ជាភារកិច្ចយ៉ាងសំខាន់របស់ រាជរដ្ឋាភិបាលកម្ពុជា ក្នុងការឆ្លើយតបជាកាតព្វកិច្ចជាតិ និងអន្ដរជាតិ។ លោកបានបន្ដថាៈ ការបោសម្អាតគ្រាប់ទាំងនេះ មានប្រយោជន៍យ៉ាង សំខាន់ ក្នុងការពង្រឹងកិច្ចការសន្ដិសុខជាតិ និងផ្ដល់សុខសុវត្ថិភាព ជូនប្រជាពលរដ្ឋ ព្រមទាំងដំណើរការ ស្ដារការអភិវឌ្ឍន៍ សេដ្ឋកិច្ចជាតិឡើងវិញ។
ឆ្លៀតឱកាសនោះដែរ លោក ស៊ុយ សែម រដ្ឋមន្ដ្រីក្រសួងរ៉ែ និងថាមពល បានរាយការណ៍ ស្ដីពីការងារបូមខ្សាច់ ដើម្បីគាំទ្រកិច្ចប្រតិបត្តិការបោសសម្អាត គ្រាប់យុទ្ធភណ្ឌមិនទាន់ផ្ទុះ ក្រោមទឹក និងស្រង់នាវាលិច ក្នុងបាតទន្លេថាៈ ក្រោយបញ្ចប់កិច្ចប្រជុំដឹកនាំដោយ សម្ដេចក្រឡាហោម ស ខេង កាលពីថ្ងៃទី២២ ខែកញ្ញា ឆ្នាំ២០២១ បានកំណត់ទិសដៅ និងតួនាទីភារកិច្ចយ៉ាងច្បាស់លាស់ សម្រាប់ក្រុមការងារអន្ដរក្រសួង និងទទួលបាន ការឯកភាពដ៏ខ្ពង់ខ្ពស់ ពីរាជរដ្ឋាភិបាលកម្ពុជានោះ ក្រសួងរ៉ែ និងថាមពល បានខិតខំប្រឹង ប្រែងអនុវត្ត បានយ៉ាងយកចិត្តទុកដាក់បំផុត និងអនុវត្តប្រកបដោយទទួលខុសត្រូវខ្ពស់។
ក្នុងកិច្ចប្រជុំនោះ សម្ដេចក្រឡាហោម ស ខេង បានមានមតិបូកសរុប និងវាយតម្លៃខ្ពស់ ចំពោះការងារបោសសម្អាត គ្រាប់យុទ្ធភណ្ឌមិនទាន់ផ្ទុះក្រោមទឹក និងស្រង់នាវាលិច ក្នុងបាតទន្លេនេះថា មានសារៈសំខាន់ណាស់ ព្រោះជាគោលការណ៍របស់ រាជរដ្ឋាភិបាលកម្ពុជា ត្រូវតែបោសសម្អាត គ្រាប់យុទ្ធភណ្ឌមិនទាន់ផ្ទុះទាំងនេះ ដើម្បីឱ្យប្រជាពលរដ្ឋ និងការដឹកជញ្ជូនតាមផ្លូវទឹក អាចធ្វើដំណើរប្រកបដោយសុវត្ថិភាព។
សម្ដេចក្រឡាហោម បានបន្ដថាៈ ក្រុមការងារអន្ដរក្រសួង ដើម្បីចុះសិក្សា និងដោះស្រាយ ករណីរកឃើញគ្រាប់យុទ្ធភណ្ឌមិនទាន់ផ្ទុះ ក្នុងនាវាដែលលិចក្នុងទន្លេ ត្រូវមានការតាំងចិត្ត ខ្ពស់ អំពីការងារទាំងនេះ ដោយមិនទុកគ្រាប់យុទ្ធភណ្ឌមិនទាន់ផ្ទុះទាំងនោះ មាននៅក្នុងបាតទន្លេទៀតឡើយ៕/V