Views: 2
ដោយៈ ទេពកង្រី / កំពង់ឆ្នាំងៈ សមត្ថកិច្ចនៃស្នងការដ្ឋាននគរបាលខេត្តកំពង់ឆ្នាំង ដឹកនាំដោយលោកវរសេនីយ៍ឯក ហ៊ុល វាសនា ស្នងការរងនគរបាលខេត្តកំពង់ឆ្នាំងទទួលបន្ទុកប្រឆាំងគ្រឿងញៀន,កម្លាំងការិយាល័យប្រឆាំងភេរវកម្មនៃស្នងការដ្ឋាននគរបាលខេត្ត សហការជាមួយអាជ្ញាធរមូលដ្ឋាននៅថ្ងៃទី១៧ខែសីហាឆ្នាំ២០២២បានចុះបិទទីតាំងពីរកន្លែង តាមការសម្រេចរបស់លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង ។ទីតាំងទាំងពីរនេះមានជាប់ពាក់ព័ន្ធនឹករណីគ្រឿងញៀនចំនួនពីរគីឡូកន្លះ។
លោកវរសេនីយ៍ឯក ហ៊ុល វាសនា បានឱ្យដឹងថាទីតាំងដែលសមត្ថកិច្ចបិទមាន៖ទី១.ទីតាំងក្រុមហ៊ុនបញ្ញើឥវ៉ាន់ (ជេតអ៊ិចប្រេស សាខាខេត្តកំពង់ឆ្នាំង ) ស្ថិតនៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំងដែលមានជាប់ពាក់ព័ន្ធនឹងឈ្មោះ សួន ម៉េងលាង ភេទប្រុស អាយុ២៧ឆ្នាំ ភូមិផ្សារលើ(ជាម្ចាស់ទទួលបញ្ញើ និងបញ្ចេញមានការពាក់ព័ន្ធ) ។ទី២.បិទបន្ទប់ស្នាក់នៅ របស់ជនសង្ស័យឈ្មោះ វណ្ណៈ បញ្ញាវឌ្ឍន៍ ភេទប្រុស អាយុ ២៦ឆ្នាំ ដែលមានលាក់គ្រឿងញៀននៅក្នុងបន្ទប់ផ្ទាល់ខ្លួន ចំនួន ពីរគីឡូកន្លះស្មើនឹង ២៥ កញ្ចប់ដែលមានទីលំនៅក្នុងភូមិធ្នង់កំបុត ឃុំក្រាំងដីមាស ស្រុករលាប្អៀរ ។
ស្នងការងទទួលផែនគ្រឿងញៀនបានឱ្យដឹងទៀតថាក្នុងប្រតិបត្តិការបង្ក្រាបគ្រឿងញៀនសមត្ថកិច្ចបានឃាត់ខ្លួនជនសង្ស័យដែលជាតំណាងក្រុមហ៊ុនបញ្ញើឥវ៉ាន់សាខាខេត្តកំពង់ឆ្នាំងដោយដកហូតម៉ាស៊ីនកុំព្យូទ័រដែលមានភ្ជាប់លេខទូរស័ព្ទបញ្ញើឥវ៉ាន់មួយគ្រឿងនិងវិក្កយប័ត្របញ្ញើឥវ៉ាន់(ឧបករណ៍ជក់គ្រឿងញៀន) ហើយបន្តធ្វើការស្រាវជ្រាវដើម្បីឈានដល់ការឃាត់ខ្លួនបក្ខពួក។
សូមបញ្ជាក់ថាករណីបង្ក្រាបគ្រឿងញៀនខាងលើបានធ្វើឡើងកាលពីថ្ងៃទី១១ខែសីហានៅចំណុចផ្ទះជនសង្ស័យមួយកន្លែងដែលស្ថិតនៅក្នុងភូមិធ្នង់កំបុតឃុំក្រាំងដីមាសស្រុករលាប្អៀរ។ប្រតិបត្តិការនេះសមត្ថកិច្ចជំនាញបានឃាត់ខ្លួនជនសង្ស័យម្នាក់រួមនិងវត្ថុតាងថ្នាំញៀងពីរគីឡូកន្លះផងដែរ ៕សរន