សមត្ថកិច្ចរាជធានីភ្នំពេញអះអាងថា ពួកគេពិតជាបានចាប់ខ្លួនប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ នៅព្រឹកថ្ងៃទី២៦ ខែវិច្ឆិកា ប្រាកដមែន និងបានបញ្ជូនប្រធានសហជីពរូបនេះ ទៅកាន់សាលាដំបូងរាជធានីភ្នំពេញ ដើម្បីបន្តនីតិវីធី ដ្បិតការចាប់ខ្លួននោះធ្វើឡើងតាមដីការបស់ចៅក្រមស៊ើបសួរពាក់ព័ន្ធល្មើសបម្រាមរបស់តុលាការ។
ការចាប់ខ្លួន កញ្ញា ឈឹម ស៊ីថរ ធ្វើឡើងនៅអាកាសយានដ្ឋានអន្តរជាតិភ្នំពេញ ក្រោយពេលកញ្ញាធ្វើដំណើរត្រឡប់មកពីប្រជុំនៅប្រទេសអូស្ត្រាលី វិញនាព្រឹកថ្ងៃទី២៦ ខែវិច្ឆិកា។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ប្រាប់ វីអូឌី នៅថ្ងៃទី២៦ ខែវិច្ឆិកាថា ពិតជាមានការករណីចាប់ខ្លួនកញ្ញា ឈឹម ស៊ីថរ នៅអាកាសយានដ្ឋានអន្តរជាតិភ្នំពេញ នៅព្រឹកថ្ងៃសៅរ៍នេះប្រាកដមែន។ លោកអះអាងថា ការចាប់ខ្លួននោះ ធ្វើឡើងតាមដីកាបញ្ជាឱ្យចាប់ខ្លួនរបស់ចៅក្រមស៊ើបសួរ ពាក់ព័ន្ធនឹងបទល្មើសបម្រាមរបស់តុលាការ ដែលមិនតម្រូវឱ្យកញ្ញាចេញទៅក្រៅប្រទេសឡើយ អំឡុងពេលដាក់ឱ្យស្ថិតនៅក្រោមការត្រួតពិនិត្យនេះ។
លោក សាន សុខសីហា បន្តថា៖ «ត្រូវហើយ ព្រឹកមិញហ្នឹងមានការឃាត់ខ្លួន ដោយសមត្ថកិច្ចទទួលផែនការងារសន្តិសុខនៃស្នងការដ្ឋាននគរបាលរាជធានីភ្នំពេញ សហការជាមួយខាងព្រលាន បានធ្វើការឃាត់ខ្លួនតាមដីកាបង្គាប់ឱ្យចាប់ខ្លួនរបស់ចៅក្រមសាកសួរ អមសាលាដំបូងរាជធានីភ្នំពេញ ពាក់ព័ន្ធករណីមិនអនុវត្តតាមសេចក្តីសម្រេចរបស់ខាងតុលាការ ដែលចុះថ្ងៃទី១៤ ខែមិនា ឆ្នាំ២០២២កន្លងមកហ្នឹង។ គាត់ [កញ្ញា ឈឹម ស៊ីថរ] ត្រូវស្ថិតនៅក្រោមការត្រួតពិនិត្យតាមដានរបស់ខាងតុលាការ។ អីចឹងមានន័យថា គឺគាត់មិនមានសិទ្ធិចេញក្រៅពីដែនដីនៃព្រះរាជាណាចក្រកម្ពុជាទេ។ វាលុះត្រាតែមានការអនុញ្ញាតពីខាងតុលាការ»។
អ្នកនាំពាក្យស្នងការដ្ឋាននគរបាលរាជធានីភ្នំពេញរូបនេះ បន្ថែមថា ការចាប់ខ្លួននេះ គឺមានតែ កញ្ញា ឈឹម ស៊ីថរ ម្នាក់ប៉ុណ្ណោះ ហើយករណីនេះ សមត្ថកិច្ចក៏បានបញ្ជូនកញ្ញាទៅកាន់សាលាដំបូងរាជធានីភ្នំពេញភ្លាមៗដើម្បីបន្តនីតិវិធីបន្ថែមទៀតផងដែរ។
សកម្មជនសហជីពក្រុមហ៊ុនណាហ្គាវើលដ៍ កញ្ញា ណុប ទិត្យបូរ៉ាវី ឱ្យវីអូឌី ដឹងនៅរសៀលថ្ងៃទី២៦ ខែវិច្ឆិកា ថា កញ្ញា ឈឹម ស៊ីថរ ពិតជាត្រូវបានសមត្ថកិច្ចខាងអន្តោប្រវេសន៍នៃអាកាសយានដ្ឋានអន្តរជាតិភ្នំពេញឃាត់ខ្លួនដើម្បីសាកសួរ ប៉ុន្តែខាងកញ្ញាមិនទាន់ដឹងថាក្នុងសំណុំរឿងអ្វីច្បាស់នៅឡើយទេ។
កញ្ញាបន្ថែមថា ក្រោយការឃាត់ខ្លួននៅម៉ោងប្រមាណ១០ ព្រឹក រហូតដល់រសៀលថ្ងៃដដែលនេះ សមត្ថកិច្ចមិនទាន់ដោះលែង កញ្ញា ស៊ីថរ នៅឡើយទេ។
កញ្ញា ណុប ទិត្យបូរ៉ាវី បន្តថា៖ «ការឃាត់ខ្លួនរបស់ គាត់[ឈឹម ស៊ីថរ] ទៀត ពួកខ្ញុំអត់ទាន់ថា តើពាក់ព័ន្ធការឃាត់ខ្លួនហ្នឹងជាករណីអ្វីទេ ប៉ុន្តែគ្រាន់តែអ្នកនៅព្រលានខាងអន្តោប្រវេសន៍គេសាកសួរគាត់ និងដែលគេលើកមកនិយាយថា គាត់ហ្នឹងមានដីកាតុលាការ។ ប៉ុន្តែដីកាតុលាការហ្នឹងគេមិនបានលើកមកនិយាយពាក់ព័ន្ធនឹងរឿងអ្វីទេ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានចេញទៅប្រជុំការងារសហជីពនៅប្រទេសអូស្ត្រាលីកាលពីថ្ងៃទី១៥ ខែវិច្ឆិកា ហើយបានត្រឡប់មកដល់រាជធានីភ្នំពេញ នៅព្រឹកថ្ងៃទី២៦ ខែវិច្ឆិកា។
កូដករម្នាក់ដែលកំពុងឈរនៅទីតាំងធ្វើដូកកម្មខាងមុខក្រុមហ៊ុនណាហ្គាវើលដ៍ នៅថ្ងៃសៅរ៍ទី២៦ ខែវិច្ឆិកា អ្នកនាង ម៉ម សុវឌ្ឍិន និយាយថា ការឃាត់ខ្លួនប្រធានសហជីពរបស់ពួកគេ គឺជាចេតនានៃការគំរាមកំហែងដល់ពួកគាត់។
អ្នកនាង ម៉ម សុវឌ្ឍិន បន្តថា៖ «វាមិនត្រឹមត្រូវ ពេលគាត់ទៅ[ទៅអូស្ត្រាលី] អត់ឃាត់គាត់ទេ អត់ដាក់បម្រាមគាត់ទេ។ ប៉ុន្តែពេលគាត់មកវិញ បែរជាព្យាយាមឃាត់ខ្លួនគាត់។ អីចឹងវាមិនត្រឹមត្រូវ»។
ស្រដៀងគ្នានេះ សកម្មជនសហជីពក្រុមហ៊ុនល្បែងមួយនេះម្នាក់ទៀត កញ្ញា សុភ័ក្ត្រ ម៉ូលីកា យល់ឃើញថា ការចាប់ខ្លួន កញ្ញា ស៊ីថរ ពេលនេះជារឿងមិនត្រឹមត្រូវទេ ដោយថាប្រសិនបើគាត់ល្មើសបម្រាម តុលាការគួរតែប្រាប់គាត់មុនពេលគាត់ចាកចេញពីកម្ពុជា មិនមែននៅពេលចូលមកវិញហើយបានចាប់ខ្លួនបែបនេះឡើយ។
កញ្ញា សុភ័ក្ត្រ ម៉ូលីកា បន្ថែមថា៖ «ទាក់ទងនឹងការល្មើសបម្រាមរបស់តុលាការហ្នឹង គួរតែនៅពេលថ្ងៃដែលគាត់[ឈឹម ស៊ីថរ] ចេញទៅហ្នឹង គួរតែហាមឃាត់គាត់មិនឱ្យចេញទៅ ព្រោះតុលាការអ្នកដាក់បម្រាម តែមិនមែនឱ្យគាត់ចេញទៅហើយ ពេលគាត់ត្រឡប់មកវិញ បាននិយាយថា គាត់ល្មើសបម្រាមទេ។ អាហ្នឹងបង្ហាញថា ខាងតុលាការខាងអាជ្ញាធរគាត់ធ្វើការងារមិនច្បាស់លាស់ខ្លួនឯង»។
ក្រោយហេតុការណ៍ចាប់ខ្លួនកញ្ញា ឈឹម ស៊ីថរ នេះ អង្គការការពារសិទ្ធិមនុស្សលីកាដូបានចេញអត្ថបទខ្លីមួយ ដោយអះអាងថា មេធាវីរបស់ កញ្ញា ស៊ីធរ ដែលបានមានវត្តមាននៅអាកាសយាន្តដ្ឋានអន្តរជាតិភ្នំពេញ មិនត្រូវបានអនុញ្ញាតឱ្យចូលជួបកូនក្តីឡើយ អំឡុងពេលសាកសួររបស់សមត្ថកិច្ចនោះ ព្រមទាំងមិនអាចទាក់ទងកូនក្ដីរបស់ខ្លួន ជាច្រើនម៉ោងផងដែរ។
នាយកទទួលបន្ទុកកិច្ចការទូរទៅអង្គការសិទ្ធិមនុស្សលីកាដូ លោក អំ សំអាត យល់ឃើញថា ការឃាត់ខ្លួនប្រធានសហជីពប្រចាំក្រុមហ៊ុនល្បែងណាហ្គាវើលដ៍ពេលនេះ គឺជាការគំរាមកំហែងបំភិតបំភ័យទៅលើសកម្មភាពរបស់មេដឹកនាំសហជីពមួយនេះបន្ថែមទៀត បន្ទាប់ពីមានការចាប់ខ្លួន និងឃុំខ្លួនថ្នាក់ដឹកនាំសហជីពចំនួន១១នាក់ ប្រចាំក្រុមហ៊ុននេះមួយរយៈកាលពីពេលកន្លងមក ខណៈពួកគេបានដឹកនាំតវ៉ាទាមទារសិទ្ធិសេរីភាពជូនកម្មករ។
លោក អំ សំអាត មានប្រសាសន៍ថា៖ «អ៊ីចឹងការចាប់ខ្លួននេះ ជាការគំរាមកំហែងបន្ថែមទៀត ហើយក៏ដូចជា គំរាមកំហែងទៅដល់សហជីពណាហ្គាវើលដ៍ និងបុគ្គលិក និងអតីតបុគ្គលិកដែលកំពុងធ្វើកូដកម្មទាមទាររកដំណោះស្រាយនាពេលបច្ចុប្បន្ននេះបន្ថែមទៀតផងដែរ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ត្រូវបានកញ្ញា ស៊ីធរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ ត្រូវបានតុលាការចោទប្រកាន់ពីបទញុះញង់ តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ កាលពីខែមករា ឆ្នាំ២០២២ ក្រោយពេលសហជីពកញ្ញាចាប់ផ្ដើមធ្វើកូដកម្មអហិង្សាទាមទាររកដំណោះស្រាយការងារពីភាគីក្រុមហ៊ុនបនល្បែងមួយនេះ។
លីកាដូអះអាងថា កញ្ញាត្រូវបានចាប់ខ្លួនយ៉ាងហិង្សា អំឡុងពេលព្យាយាមចូលរួមធ្វើកូដកម្មជាមួយកូដករផ្សេងទៀត ហើយត្រូវបានជាប់ឃុំបណ្ដោះអាសន្នក្នុងពន្ធនាគារអស់រយៈពេល២ខែ ជាមួយនឹងថ្នាក់ដឹកនាំ និងសមាជិករបស់ខ្លួនចំនួន១០នាក់ផ្សេងទៀត មុនពេលមានការដោះលែងឱ្យនៅក្រៅឃុំវិញ កាលពីខែមីនា ឆ្នាំនេះ ។
អង្គការសិទ្ធិមនុស្សដដែលនេះ អះអាងថា ក្រោយពីការដោះលែង ទាំងកញ្ញា ស៊ីធរ និងមេធាវីកញ្ញា មិនត្រូវបានជូនដំណឹងពីការដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ឬលក្ខខណ្ឌសាកល្បង ដូចជាការរឹតត្បិតលើការធ្វើដំណើរនោះទេ។
សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ បានចាប់ផ្ដើមធ្វើកូដកម្ម តាំងពីខែធ្នូ ឆ្នាំ២០២១ បន្ទាប់ពីមានការបញ្ឈប់បុគ្គលិកទ្រង់ទ្រាយធំ នៅក្រុមហ៊ុនកាស៊ីណូណាហ្គាវើលដ៏ ដែលក្នុងនោះក៏មានថ្នាក់ដឹកនាំសហជីពទាំងអស់ផងដែរ។ កញ្ញា ស៊ីធរ ក៏ដូចជាថ្នាក់ដឹកនាំ និងសមាជិកសហជីពណាហ្គាវើលដ៏ដែលត្រូវបានចាប់ខ្លួន និងឃុំខ្លួនកាលពីដើមឆ្នាំ២០២២នេះ ប្រឈមមុខនឹងការដាក់ពន្ធនាគាររយៈពេល ២ឆ្នាំ ប្រសិនបើត្រូវបានរកឃើញថាមានទោស៕