ទីភ្នាក់ងារសារព័ត៌មាន Reuters ដោយដកស្រង់ពីការថ្លែងរបស់លោកឧត្តមសេនីយ៍ Chang, Zone-Sung មេបញ្ជាការដ្ឋានការពារជាតិ នៃតំបន់ Kinmen របស់តៃវ៉ាន់ បានផ្សព្វផ្សាយឲ្យដឹងថា កាលពីរាត្រីថ្ងៃទិ០៣ ខែសីហា ឆ្នាំ២០២២កន្លងទៅថ្មីៗ យន្តហោះដ្រូន ( Drone) របស់ចិន ជាច្រើនគ្រឿងបានហោះចូលទៅកាន់តំបន់កោះ Kinmen ប៉ុន្តែត្រូវបានកងកម្លាំងយោធាតៃវ៉ាន់ បាញ់ផ្កាភ្លើងបណ្តេញភ្លាមៗ ធ្វើឲ្យក្រុមយន្តហោះគ្មានមនុស្សបើកបររបស់ចិន ទាំងនោះ ចាកចេញត្រឡប់ទៅវិញយ៉ាងទាន់ហន់ បាត់ស្រមោល ។
សកម្មភាពបញ្ជូនយន្តហោះដ្រូនរបស់ចិន ទៅកាន់តំបន់កោះ Kinmen នេះ គឺធ្វើឡើងនៅក្នុងដំណើរការសមយុទ្ធយោធារបស់ចិន យ៉ាងគគ្រឹកគគ្រេងចំនួន៦គោលដៅ ព័ទ្ធជុំវិញកោះតៃវ៉ាន់ សម្តែងនូវការខឹងសម្បាយ៉ាងខ្លាំងចំពោះដំណើរទស្សនកិច្ចរបស់លោកស្រី Nancy Pelosi ប្រធានសភាអាមេរិក ទៅកាន់តៃវ៉ាន់ កាលពីរាត្រីថ្ងៃទី០២ ដល់ថ្ងៃទី០៣ ខែសីហា ឆ្នាំ២០២២ មុននឹងបន្តដំណើរទៅកាន់ប្រទេសកូរ៉េខាងត្បូង និងប្រទេសជប៉ុន ។
សេចក្តីរាយការណ៍ក៏បានឲ្យដឹងដែរថា ចិន បានបាញ់គ្រាប់មីស៊ីលក្នុងរយៈកម្ពស់ខ្ពស់ហោះពីលើកោះតៃវ៉ាន់ និងមានចំនួន៥គ្រាប់ បានធ្លាក់ទៅក្នុងតំបន់សេដ្ឋកិច្ចពិសេសផ្តាច់មុខរបស់ប្រទេសជប៉ុន ( ដែនទឹកប្រទេសជប៉ុន ) ។
លោក Su, Tseng-Chang នាយករដ្ឋមន្ត្រីតៃវ៉ាន់ បានថ្លែងប្រាប់បណ្តាញសារព័ត៌មាននៅទីក្រុងតៃប៉ិ ឲ្យដឹងថា រដ្ឋបាលតៃវ៉ាន់ សូមធ្វើការថ្កោលទោសចំពោះការបាញ់គ្រាប់មីស៊ីលរបស់ចិន នៅក្នុងសមយុទ្ធយោធារបស់ខ្លួន ។
សារព័ត៌មាន Kyodo របស់ជប៉ុន បានផ្សព្វផ្សាយកាលពីថ្ងៃទី០៤ ខែសីហា ឆ្នាំ២០២២ម្សិលមិញនេះឲ្យដឹងថា ទីក្រុងតូក្យូ បានធ្វើការតវ៉ាទៅនឹងទីក្រុងប៉េកាំង បន្ទាប់ពីមីស៊ីលរបស់ចិន ចំនួន៥គ្រាប់បានបាញ់ធ្លាក់ទៅក្នុងតំបន់សេដ្ឋកិច្ចពិសេសផ្តាច់មុខរបស់ប្រទេសជប៉ុន ។
អ្នកជំនាញកិច្ចការយោធាអន្តរជាតិ បានលើកឡើងថា នៅថ្ងៃអនាគត ប្រសិនបើសហរដ្ឋអាមេរិក ដំឡើងប្រព័ន្ធខែលការពារមីស៊ីល នៅតំបន់កោះតៃវ៉ាន់ រួមជាមួយនឹងប្រព័ន្ធខែលការពារមីស៊ីល របស់ប្រទេសកូរ៉េខាងត្បូង និងប្រទេសជប៉ុន គឺគ្រាប់មីស៊ីលរបស់ចិន នឹងជួបឧបសគ្គយ៉ាងធ្ងន់ធ្ងរ ឬក៏លែងមានប្រសិទ្ធភាពតែម្តង ៕