Views: 10
ប្រែសម្រួល : កញ្ញាដាលីស,បំណង (បាងកកប៉ុស្តិ៍) ៖ ត្រឹមតែ ២៤ ម៉ោងបន្ទាប់ពីក្រុមហ៊ុន Toyota Motor Thailand បានចាប់ផ្តើមទទួលការកក់ទុកមុនសម្រាប់រថយន្ត SUV អគ្គិសនី bZ4X ថ្មីរបស់ខ្លួន ក្រុមហ៊ុនដាច់ចិត្តត្រូវតែបិទការកក់ទុកមុនដោយសារតែចំនួនអតិថិជនបង្ហាញចំណាប់អារម្មណ៍មានច្រើនខ្លាំងពេក។
យោងតាមក្រុមហ៊ុនផលិតរថយន្តជប៉ុនមួយនេះបានឱ្យដឹងថា ការបញ្ជាទិញទុកជាមុនចំនួន ១.០៦៤ ត្រូវបានដាក់លើអ៊ីនធឺណិតសម្រាប់រថយន្ត bZ4X ក្នុងរយៈពេលមួយម៉ោងដំបូង ដោយចាប់ផ្តើមនៅម៉ោង ៨ យប់ថ្ងៃទី ៩ ខែវិច្ឆិកា ជាមួយនឹងចំនួនកក់កើនឡើងដល់ ៣.៣៥៦ ត្រឹមម៉ោង ៨ យប់នៅថ្ងៃបន្ទាប់។ Toyota បាននិយាយថា នេះគឺខ្ពស់ជាងការរំពឹងទុក ហើយក៏សម្រេចចិត្តបញ្ឈប់ការបញ្ជាទិញនៅថ្ងៃដដែលនោះតែម្តង។
រថយន្ត Toyota bZ4X លក់រាយក្នុងតម្លៃ ១,៨៦៣ លានបាត បន្ទាប់ពីបញ្ចុះ ១៥០.០០០ បាតពីការឧបត្ថម្ភធនរបស់រដ្ឋាភិបាលសម្រាប់រថយន្ត EV ដែលមានកម្លាំងអាគុយជាង ៣០kWh។
វាភ្ជាប់មកជាមួយអាគុយលីចូមអ៊ីយ៉ុងកម្លាំង ៧១,៤kWh ដែលផ្តល់ថាមពលដល់ម៉ូទ័រអគ្គិសនីចំនួន ២ កម្លាំង ១០៩សេះ (មួយនៅខាងមុខ និងមួយទៀតនៅខាងក្រោយ) ដែលផ្តល់ថាមពលសរុប ២១៨សេះ ជាមួយនឹងកម្លាំងបង្វិលអតិបរមា ៣៣៧Nm។
ខណៈរថយន្ត bZ4X បង្កើនល្បឿនពី ០-១០០គីឡូម៉ែត្រក្នុងមួយម៉ោងក្នុងថេរៈវេលាត្រឹម ៦,៩ វិនាទី ល្បឿនកំពូលរបស់វាត្រូវបានកំណត់ត្រឹម ១៦០ គីឡូម៉ែត្រក្នុងមួយម៉ោង។
ទន្ទឹមនេះដែរ រយៈចម្ងាយបើកបរពេលសាកភ្លើងពេញគឺ ៤១១ គីឡូម៉ែត្រ។ ពេលវេលាសាកភ្លើងពេញគឺ ៩,៥ ម៉ោងជាមួយភ្លើង ២៣០V ឬ ៣២A ហើយអាចសាកភ្លើងពេញត្រឹម៣០នាទីតាមរយៈប្រព័ន្ធសាកភ្លើងលឿន ១៥០ kW DC៕
រថយន្តអគ្គិសនីToyota bZ4Xនៅថៃថ្លៃជាង៥៣.០០០ដុល្លារ
រថយន្ត Toyota bZ4X លក់រាយក្នុងតម្លៃ ១,៨៦៣ លានបាត
