Views: 1
ដោយៈ បូកគោ / កំពត: នំដង្កូវកំពង់គ្រែងធ្លាប់មានឈ្មោះល្បីនិងបាននាំ ចេញទៅចែកចាយ នៅបណ្តាខេត្តនានា ជាយូរមកហើយ។ លេខាលេខាធិការដ្ឋាន ភូមិមួយផលិតផលមួយ កំពុងត្រៀមចុះ នំដង្កូវកំពង់គ្រែង ក្នុងបញ្ជីភូមិមូយផលិត ផលមួយ ខេត្តកំពត។
លោក ពៅ រតនៈ អនុប្រធានមន្ទីរវប្បធម៌ និងវិចិត្រសិល្បៈខេត្តកំពត បានរៀបរាប់ ថាៈ នំដង្កូវរបស់អ្នកភូមិកំពង់គ្រែង ឃុំកំពង់គ្រែង ស្រុកទឹកឈូ ពោរពេញដោយ រសជាតិ ឈ្ងុយឆ្ងាញ់ និងមានឈ្មោះល្បី រហូតបានការទទួលស្គាល់ នៅទូទាំងប្រទេស ជាយូរមកហើយ។ អ្នកភូមិកំពង់គ្រែង តែងធ្វើនំនេះជាប្រចាំ ពិសេសបានបង្កើនបរិមាណ ផលិតរៀងរាល់ពិធីបុណ្យប្រពៃណីផ្សេងៗ។
លោក ស្មាន់ វណ្ណនិមល មន្ត្រីជំនួយការលេខាធិកាដ្ឋាន ភូមិមួយផលិតផលមួយខេត្ត កំពត បានបញ្ជាក់ថាៈ ដោយកត់សម្គាល់ឃើញថា នំដង្កូវកំពង់គ្រែង ពិតជាមាន ឈ្មោះល្បី បែរជាចំនួនអ្នកផលិត បានថយចុះជាងមុននោះ លេខាធិការដ្ឋាន កំពុងសិក្សា ដើម្បីត្រៀមចុះក្នុងបញ្ជី ភូមិមួយផលិតផលមួយ ប្រចាំខេត្ត។ ផលិតផល ដែលអាចទទួល ស្គាល់ និងចុះបញ្ជីបាន លុះត្រាផលិតផលនោះ មានលក្ខណៈ ស្តង់ដារ មិនបង្កផលប៉ះពាល់ ផ្នែកសុខភាព ចំពោះអ្នកទទួលទានជាដើម។ ក្រោយពេលចុះបញ្ជីរួចរាល់ នំដង្កូវកំពង់គ្រែង នឹងមានទីផ្សារកាន់តែទូលំទូលាយ ជាងសព្វថ្ងៃ។
អ្នកស្រី អុឹង មុំ ម្ចាស់សិប្បកម្មផលិតនំដង្កូវ ដែលមានទីតាំងស្ថិតនៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត បានរៀបរាប់ថាៈ អ្នកស្រី បានចាប់មុខ របរផលិត នំដង្កូវ រយៈពេលជិត ៤ ឆ្នាំមកហើយ បន្ទាប់ពីបន្តចំណេះជំនាញ ពីមីងបង្កើត។ នំដង្កូវ ធម្មតា ធ្វើឡើងពីម្សៅ ស្ករស និងពងមាន់។ ចំណែកមួយ ប្រភេទទៀត អ្នកស្រី បានបញ្ចូល រសជាតិដូង ស្លឹកតើយ និងទុរេន។
ម្ចាស់សិប្បកម្មដដែល បានបញ្ជាក់ថាៈ ក្នុងមួយថ្ងៃ អ្នកស្រី អាចផលិតបានប្រមាណ ១.៥០០ ថង់ ដោយប្រើម្សៅអស់ ២៥០ គីឡូក្រាម ហើយបញ្ចៀសបានទាំងស្រុង ពីការប្រើប្រាស់សារធាតុគីមី។ នំដង្កូវរបស់អ្នកស្រី បាននាំយកទៅចែកចាយ ដល់រាជធានីភ្នំពេញ និងបណ្តាខេត្តមួយចំនួន តាមការបញ្ជាទិញរបស់អតិថិជន។
លោកស្រី ឃន សុម៉ាលី មេឃុំកំពង់គ្រែង បានប្រាប់ឱ្យដឹងថាៈ កន្លងមក ក្នុងមូលដ្ឋានរបស់ លោកស្រី មានអ្នកផលិតនំដង្កូវ ជាច្រើនគ្រួសារ។ ប៉ុន្តែបច្ចុប្បន្ន សិប្បកម្មដែលកំពុង ផលិតជាទ្រង់ទ្រាយធំ មានតែ ៣ គ្រួសារប៉ុណ្ណោះ៕/V-PC
