Views: 7
ប្រែសម្រួល : កញ្ញាដាលីស (បាល់ទាត់) ៖ ក្រោយបំបាក់អាល្លឺម៉ង់យ៉ាងភ្ញាក់ផ្អើល ក្រុមសាម៉ូរ៉ៃជប៉ុនថ្ងៃនេះអាចមានលទ្ធភាពឈ្នះជាលើកទីពីរ នៅពេលពួកគេប៉ះជាមួយកូស្តារីកានៅថ្ងៃអាទិត្យនេះ។ ចំណែកបែលហ្ស៊ិកនិងក្រូអាស៊ីក៏រំពឹងបំបាក់គូប្រកួតរៀងៗខ្លួនផងដែរ ស្របពេលអេស្ប៉ាញចង់ឱ្យអាល្លឺម៉ង់វិលទៅស្រុកវិញ ជាមួយនឹងជ័យជម្នះរបស់គោជល់លើឥន្ទ្រីដែក។
– ជប៉ុន vs កូស្តារីកា (ពូល E)
* ជប៉ុនបើឈ្នះថ្ងៃនេះនឹងឡើងទៅវគ្គ១៦ក្រុមដោយស្វ័យប្រវត្តិ។
* កូស្តារីកាគឺជាក្រុមចាញ់ធ្ងន់ជាងគេបំផុតក្នុងការប្រកួតជុំទីមួយនៃវើលខាប់ក្នុងពូល។
* ជប៉ុនមិនដែលចាញ់កូស្តារីកាទេ (ឈ្នះ ៤ ស្មើ១)។
* ជ័យជម្នះ៨លើកចុងក្រោយរបស់ជប៉ុនបានកើតឡើងជាមួយនឹងគ្រាប់បាល់ ២ គ្រាប់ឡើងទៅ។
ជប៉ុនដ៏រីករាយនឹងជួបជាមួយក្រុមបរាជ័យធំបំផុតក្នុងជុំទីមួយគឺកូស្តារីកា ក្នុងការប្រកួតមួយ ដែលនឹងសម្រេចជោគវាសនារបស់ក្រុមទាំងពីរ ត្បិតនៅសល់១ប្រកួតត្រូវលេង។
ការទទួលជ័យជម្នះសម្រាប់ជប៉ុនថ្ងៃនេះនឹងឃើញក្រុមសាមូរ៉ៃខៀវឆ្លងផុតវគ្គចែកពូលជាលើកទីបី ក្នុងអំឡុងវើលខាប់៤លើកចុងក្រោយ។
ទោះបីជាវាត្រូវបានគ្របដណ្ដប់ដោយការឈ្នះរបស់អារ៉ាប៊ីសាអូឌីតលើអាហ្សង់ទីនក៏ដោយ ក៏ប៉ុន្តែការដែលជប៉ុនតាមពីក្រោយយកឈ្នះវិញលើអាល្លឺម៉ង់កាលពីជើងមុនគឺពិតជាស្ថិតក្នុងចំណោមការភ្ញាក់ផ្អើលដ៏ធំបំផុតមិនធ្លាប់មានក្នុងការប្រកួតបាល់ទាត់ពិភពលោក។
ក្រុមសាម៉ូរ៉ៃខៀវចូលក្នុងការប្រកួតនេះក្នុងនាមជាក្រុមមានប្រៀបខ្ពស់ដើម្បីឡើងទៅវគ្គ ១៦ ក្រុមចុងក្រោយ ត្បិតសល់១ប្រកួតត្រូវលេង។ ការប្តូរកីឡាករសំខាន់មួយគូចូលនៅតង់ទីពីរបានបង្ហាញពីសារៈសំខាន់នៅក្នុងវាយបកឈ្នះវិញសម្រាប់ជប៉ុន ខណៈកីឡាករ Takuma Asano និង Kaoru Mitoma មានលទ្ធភាពខ្ពស់ក្នុងការជាប់ជម្រើសដំបូងក្នុងប្រកួតនេះ។
ជប៉ុនមិនដែលឈ្នះការប្រកួតវើលខាប់ពីរលើកជាប់គ្នាទេគិតចាប់តាំងពីឆ្នាំ ២០០២ ប៉ុន្តែការជួបជាមួយកូស្តារីកាអាចកែប្រែប្រវត្តិមួយនេះបាន។ ប្រជាជាតិនៅតំបន់ CONCACAF នេះគឺជាក្រុមបរាជ័យធំបំផុតក្រោយចាញ់ក្នុងលទ្ធផល ៧-០ ក្រោមស្នាដៃអេស្ប៉ាញ។
កូស្តារីកាមានភារកិច្ចធំជាងភ្នំនៅក្នុងដៃដើម្បីងើបពីបរាជ័យឡើងវិញ បន្ទាប់ពីការចាញ់វើលខាប់ធ្ងន់ធ្ងរបំផុតមិនធ្លាប់មាន។ ជាងនេះទៅទៀត ការដែលពួកគេតែងរងបរាជ័យ៣គ្រាប់ឡើងទល់នឹងជប៉ុន រឹតតែធ្វើឱ្យពួកគេបាក់ទឹកចិត្ត។
ផ្អែកលើចំណុចនេះ ក្រុមជប៉ុននឹងមិនឱ្យរបូតឱកាសឡើងទៅវគ្គ ១៦ ក្រុមចុងក្រោយនោះឡើយ។ លទ្ធផលទស្សនទាយ សាម៉ូរ៉ៃខៀវឈ្នះ ៣-០។
– បែលហ្ស៊ិក vs ម៉ារ៉ុក (ពូល F)
* ម៉ារ៉ុកខកខានរកគ្រាប់បាល់នៅ ៩ ប្រកួតនៃវើលខាប់ ១៧ ប្រកួតរបស់ពួកគេ។
* បែលហ្ស៊ិកឈ្នះ១១លើកក្នុងចំណោមការប្រកួតវើលខាប់១៣លើកចុងក្រោយ។
* ក្រុមបិសាចក្រហមបែលហ្ស៊ិកឈ្នះ៨ប្រកួតចុងក្រោយនៅវគ្គចែកពូលវើលខាប់។
បែលហ្ស៊ិកបើកឆាកវើលខាប់ដោយយកឈ្នះកាណាដា ១-០ ទាំងលំបាកវេទនាបំផុត។ ជំនាន់មាសរបស់បែលហ្ស៊ិកមើលទៅលេងមិនស៊ីសង្វាក់គ្នាទេ ប៉ុន្តែពួកគេនៅតែបន្តកំណត់ត្រាដ៏អស្ចារ្យក្នុងការប្រកួតវើលខាប់។
បែលហ្ស៊ិកបានឈ្នះរាល់ការប្រកួតវគ្គចែកពូលទាំង៨លើកចុងក្រោយរបស់ពួកគេនៅវើលខាប់។ ក្រុមបិសាចក្រហមក៏បានឈ្នះការប្រកួតចំនួន ១១ លើកក្នុងចំណោម ១៣ ប្រកួតចុងក្រោយរបស់ពួកគេក្នុងវើលខាប់៣លើកចុងក្រោយគិតចាប់តាំងពីឆ្នាំ ២០១៤ ផងដែរ។
នេះគឺជាការប្រកួតលើកទី ៥០ របស់បែលហ្ស៊ិកនៅវើលខាប់ ដែលធ្វើឱ្យពួកគេក្លាយជាប្រទេសផ្សេងគ្នាទី ១២ ដែលឈានដល់ដំណាក់កាលបែបនេះ។ ត្បិតចាប់ផ្តើមមិនបានល្អ ក៏ប៉ុន្តែបិសាចក្រហមគួរតែអាចអបអរសមិទ្ធផលនោះជាមួយនឹងជ័យជម្នះលើម៉ារ៉ុក។
ថ្វីត្បិតតែជាបុរសដែលគេបំភ្លេចចោលនៅ Chelsea និងជាផ្នែកមួយដ៏យូរនៃកីឡាករខ្ចីជើងក៏ដោយ ក៏ប៉ុន្តែកីឡាករ Michy Batshuayi បានស៊ុតបាល់បញ្ចូលទីតែមួយគ្រាប់គត់ទល់នឹងកាណាដាក្នុងការប្រកួតបើកឆាក។ រូបគេកំពុងជំនួសកន្លែងរបស់ Romelu Lukaku ដែលរងរបួស ហើយថ្ងៃនេះរូបគេរំពឹងធ្វើបានល្អពេលប៉ះម៉ារ៉ុក។
Batshuayi ស៊ុតចូល ៨ គ្រាប់ពី ១៤ ប្រកួតសម្រាប់ Besiktas នៅរដូវកាលនេះ ហើយកំណត់ត្រាអន្តរជាតិរបស់គេថ្មីៗនេះគឺអស្ចារ្យណាស់ក្នុងពេលអវត្តមាន Lukaku ។ នៅក្នុងយុទ្ធនាការ Nations League រូបគេបានស៊ុតបញ្ចូលទី ៣ គ្រាប់ក្នុង ៦ ប្រកួត ខណៈរូបគេគឺជាកីឡាករដែលគំរាមកំហែងបំផុតនៅលើទីលានសម្រាប់ក្រុមបែលហ្ស៊ិកក្នុងការប្រកួតបើកឆាករបស់ពួកគេ។
Batshuayi បានស៊ុត ៥ ជើងក្នុងចំណោម ៩ ជើងរបស់បែលហ្ស៊ិកទល់នឹងកាណាដា ខណៈរូបគេគឺជាកីឡាករតែម្នាក់គត់ដែលបានស៊ុតបញ្ចូលទីឱ្យពួកគេរហូតដល់ត្រូវដកចេញនៅនាទី ៧៨ ។ រូបគេបានចូលក្នុងការប្រកួតជាមួយម៉ារ៉ុកដោយបានស៊ុតបញ្ចូលទី៣គ្រាប់ក្នុងចំណោមការប្រកួតប្រជែង៤លើកចុងក្រោយសម្រាប់បែលហ្ស៊ិក ដូច្នេះ Batshuayi ក៏ទំនងអាចរកគ្រាប់បាល់បានផងដែរនៅថ្ងៃនេះ។
ចំណែកម៉ារ៉ុកបានស្មើក្នុងការប្រកួតបើកឆាក ០-០ ជាមួយក្រូអាស៊ី។ ម៉ារ៉ុកខកខានស៊ុតបញ្ចូលទីក្នុងការប្រកួតវើលខាប់ ៥៣ ភាគរយរបស់ពួកគេ ដែលជាកំណត់ត្រាខ្សត់គ្រាប់បាល់យូរបំផុត។ ការខ្សត់គ្រាប់បាល់នោះគឺមានជាង១០ប្រកួត។
ម៉ារ៉ុកបានឈ្នះតែ២ប្រកួតប៉ុណ្ណោះក្នុងចំណោមការប្រកួតវើលខាប់ ១៧ លើករបស់ពួកគេ (ស្មើ៦ ចាញ់៩)។ ពួកគេក៏បានចាញ់ការប្រកួតវគ្គចែកពូលជាលើកទីពីររបស់ពួកគេផងដែរក្នុងការបង្ហាញខ្លួនចំនួន ៤ ដងក្នុងចំណោមវើលខាប់ ៥ លើកចុងក្រោយ ដូច្នេះពួកគេមានលទ្ធភាពខ្ពស់ក្នុងការចាញ់នៅប្រកួតទីពីរក្នុងពូលនៅថ្ងៃអាទិត្យនេះផងដែរ។
លទ្ធផលព្យាករណ៍ បែលហ្ស៊ិកឈ្នះ ១-០។
– ក្រូអាស៊ី vs កាណាដា (ពូល F)
* កាណាដាស៊ុត ២៩-៩ ជើងទល់នឹងបែលហ្ស៊ិកកាលពីថ្ងៃពុធ។
* ក្រូអាស៊ីស៊ុតបញ្ចូលទីនៅ៦ប្រកួតក្នុងចំណោមការប្រកួត៧លើកចុងក្រោយរបស់ពួកគេ។
* Jonathan David បានស៊ុតចំគោលដៅ ៧ ជើងលើបែលហ្ស៊ិក និងបានស៊ុតបញ្ចូលទី៩គ្រាប់ក្នុងលីកនៅរដូវកាលនេះ។
ជើងឯករងវើលខាប់២០១៨ ក្រូអាស៊ីបានចាប់ផ្តើមយុទ្ធនាការរបស់ពួកគេជាមួយនឹងលទ្ធផលសូន្យស្មើជាមួយម៉ារ៉ុក ហើយពួកគេអាចនឹងរងសម្ពាធខ្លាំងពីក្រុមកាណាដាដ៏ស្វាហាប់នៅថ្ងៃអាទិត្យនេះ។
កូនក្រុមរបស់លោក Zlatko Dalic មិនអាចបំបែកប្រព័ន្ធលេងយ៉ាងល្អរបស់ម៉ារ៉ុកបានទេ ដោយព្យាយាមស៊ុតបានតែ៥ជើង ហើយស៊ុតចំគោលដៅស្រាលៗតែ២ជើងប៉ុណ្ណោះ។
លទ្ធផលនេះបានពង្រីកការមិនស្គាល់ចាញ់របស់ពួកគេរហូតដល់៧ប្រកួត ប៉ុន្តែពួកគេគួរតែប្រយ័ត្នចំពោះការគំរាមកំហែងរបស់កាណាដា បន្ទាប់ពីបានឃើញពួកគេលេងសម្លុតបែលហ្ស៊ិកកាលពីថ្ងៃពុធ។
កាណាដាមិនដែលស៊ុតបញ្ចូលទីបានមួយគ្រាប់ក្នុងការប្រកួតវើលខាប់ទេ ប៉ុន្តែការបង្ហាញខ្លួនជាលើកដំបូងរបស់ពួកគេនៅក្នុងវើលខាប់ចាប់តាំងពីឆ្នាំ ១៩៨៦ បានឃើញពួកគេបង្ហាញទម្រង់លេងដ៏អស្ចារ្យទល់នឹងគីឡូធ្ងន់អឺរ៉ុប បែលហ្ស៊ិក។
ពួកគេបានស៊ុត ២២-៩ ជើងទល់នឹងបែលហ្ស៊ិក ដោយស៊ុតប៉េណាល់ទីមិនចូលក្នុងតង់ទីមួយ ហើយមានឱកាសទទួលបានបាល់ប៉េណាល់ទីជាច្រើនលើកច្រើនសា តែត្រូវអាជ្ញាកណ្តាលមិនរវីរវល់។
កូនក្រុមរបស់លោក John Herdman បាននាំមកនូវថាមពលដ៏គួរឱ្យភ័យខ្លាចនៅតំបន់ប្រយុទ្ធ ដែលធ្វើឱ្យជីវិតមានការលំបាកសម្រាប់ខ្សែការពារបែលហ្ស៊ិក Jan Vertonghen និង Toby Alderweireld ហើយពួកគេពិតជាអាចធ្វើដូចគ្នានេះទៅលើខ្សែការពាររបស់ក្រូអាស៊ីនៅថ្ងៃអាទិត្យនេះ។
លទ្ធផលព្យាករណ៍ កាណាដា ឈ្នះ ២-១។
– អេស្ប៉ាញ vs អាល្លឺម៉ង់ (ពូល E)
* អាល្លឺម៉ង់បានជួបវិបត្តិក្នុងរយៈពេលប៉ុន្មានឆ្នាំចុងក្រោយនេះ។
* ខ្សែការពារអាល្លឺម៉ង់បានផ្តល់ឱកាសច្រើនពេកដល់ជប៉ុន។
* អេស្ប៉ាញលេងបាល់ទាត់ដ៏អស្ចារ្យក្រោមការដឹកនាំរបស់លោក Luis Enrique។
មិនមានអ្នកជំនាញច្រើនទេដែលបានរាយបញ្ជីអេស្ប៉ាញជាក្រុមប្រជែងយកពាន នៅមុនវើលខាប់នៅប្រទេសកាតា។
មនុស្សជាច្រើនបានប្តូរការគិតរបស់ពួកគេរួចទៅហើយបន្ទាប់ពីការបង្ហាញទម្រង់លេងកាចសាហាវរបស់គោជល់អេស្ប៉ាញក្នុងការផ្តួលកូស្តារីកា ៧-០ កាលពីប្រាំមួយថ្ងៃមុន។
ពិតណាស់ នៅពេលដែលអ្នកក្រឡេកមើលបញ្ជីឈ្មោះកីឡាករអេស្ប៉ាញ ពួកគេមិនមែនជាអេស្ប៉ាញដ៏ខ្លាំងក្លាលើភពផែនដីជាមួយនឹងកីឡាករឆ្នើមដូចជា Iniesta, Xavi, Ramos, Torres នោះទេ។
យ៉ាងណាមិញ កីឡាករអេស្ប៉ាញសម័យនេះក៏សម្បូរទៅដោយទេពកោសល្យនៅគ្រប់តំបន់ផងដែរ រួមទាំងបម្រើនិងការពារ ដោយមានកីឡាករជាច្រើននាក់អាចលេងជំនួសគ្នាបានគ្រប់ពេល។
លោក Luis Enrique ដឹងពីរបៀបប្រើទេពកោសល្យពីក្រុមរបស់គាត់។ គាត់បាននាំអេស្ប៉ាញឡើងដល់វគ្គពាក់កណ្តាលផ្តាច់ព្រ័ត្រនៅ Euro 2020 ខណៈដែលពួកគេត្រូវបានទម្លាក់ដោយក្រុមដែលចុងក្រោយក្លាយម្ចាស់ជើងឯក គឺ អ៊ីតាលី ដោយបាល់ប៉េណាល់ទី ក្រោយពីស្មើ ១-១ ក្នុងម៉ោងធម្មតា និងម៉ោងបន្ថែម។
អាល្លឺម៉ង់កំពុងមានបញ្ហា។ ពួកគេបានចាញ់ការប្រកួតបើកឆាកជាមួយជប៉ុន ហើយការរងបរាជ័យក្រោមថ្វីដៃអេស្ប៉ាញនៅថ្ងៃអាទិត្យនេះ នឹងធ្វើឱ្យពួកគេវេចបង្វិចទៅស្រុកវិញ (ប្រសិនបើជប៉ុនទទួលបានយ៉ាងតិច១ពិន្ទុពីកូស្តារីកា)។
កូនក្រុមរបស់លោក Hansi Flick មើលទៅមិនអស្ចារ្យនោះទេកាលពីថ្ងៃពុធ។ ពួកគេពិតជាមានឱកាសបំបាក់ជប៉ុនច្រើនគ្រាប់ ប៉ុន្តែកីឡាករ Serge Gnabry, Kai Havertz, Thomas Muller និងមិត្តរួមក្រុមបានយកឱកាសចាក់ចោលនៅមុខទីជប៉ុនអស់រលីង។
ឥន្ទ្រីដែកអាល្លឺម៉ង់បានរងការពិន័យយ៉ាងធ្ងន់ជាមួយការស៊ុត២គ្រាប់លឿនៗរបស់ជប៉ុននៅចុងការប្រកួត។
ត្បិតអាល្លឺម៉ង់ជាគីឡូធ្ងន់មួយនៅអឺរ៉ុប ប៉ុន្តែលទ្ធភាពដែលពួកគេអាចផ្តួលគោជល់អេស្ប៉ាញគឺមានតិចតួចណាស់ ជាពិសេសតំបន់ប្រយុទ្ធឥតប្រយោជន៍របស់អាល្លឺម៉ង់។
លទ្ធផលទស្សនទាយ អេស្ប៉ាញឈ្នះ ៣-១៕
ជប៉ុននឹងឡើងវគ្គ ១៦ ក្រុមចុងក្រោយតាមរយៈការផ្តួលកូស្តារីកា