Views: 11
ប្រែសម្រួល : កញ្ញាដាលីស (ដេល្លីម៉េល) ៖ រ៉ុក្កែត SpaceX ដែលដឹកសមាជិកអវកាសយានិករុស្ស៊ីម្នាក់ បានបាញ់បង្ហោះចេញពីរដ្ឋផ្លរីដាកាលពីថ្ងៃពុធទី៥តុលា ក្នុងការធ្វើដំណើរមួយដែលបង្ហាញនូវនិមិត្តរូបនៃកិច្ចសហការដ៏សំខាន់ ខណៈសង្គ្រាមកំពុងផ្ទុះឡើងក្នុងប្រទេសអ៊ុយក្រែន។
លោកស្រី អានណា គីគីណា (Anna Kikina) ជាអវកាសយានិកស្រីតែម្នាក់គត់ដែលបំពេញការងារ គឺជាផ្នែកមួយនៃបេសកកម្មមានសមាជិក ៥នាក់ដែលរួមបញ្ចូលអវកាសយានិកជនជាតិជប៉ុនម្នាក់និងអាម៉េរិកពីរនាក់ផងដែរ។
លោកស្រី នីកូល ម៉ាន់ (Nicole Mann) មេបញ្ជាការនៃយាន Crew Dragon និងជាស្ត្រីជនជាតិដើមអាម៉េរិកដំបូងគេនៅក្នុងលំហបាននិយាយយ៉ាងខ្លីមុនពេលបាញ់បង្ហោះពីមជ្ឈមណ្ឌលអវកាសកេណ្ណីឌី ក្នុងរដ្ឋផ្លរីដាថា “តោះចាប់ផ្តើមបេសកកម្ម”។
ការចូលចតនៅស្ថានីយអវកាសអន្តរជាតិ (ISS)គ្រោងធ្វើនៅថ្ងៃព្រហស្បតិ៍ទី៦តុលានៅម៉ោង ៤៖៥៧ រសៀល។
កាលពីពីរសប្តាហ៍មុន អវកាសយានិកអាម៉េរិកម្នាក់បានហោះឡើងតាមរ៉ុក្កែត Soyuz របស់រុស្ស៊ីសម្រាប់វេទិកានៅដងតារាវិថីមួយនេះផងដែរ។
កម្មវិធីផ្លាស់ប្តូរអវកាសយានិកដែលបានគ្រោងទុកជាយូរយារណាស់មកហើយនេះត្រូវបានរក្សាទុក ទោះបីជាមានភាពតានតឹងកាន់តែខ្លាំងឡើងរវាងសហរដ្ឋអាម៉េរិកនិងរុស្ស៊ីចាប់តាំងពីការឈ្លានពានរបស់រដ្ឋាភិបាលក្រុងមូស្គូលើអ៊ុយក្រែនក្នុងខែកុម្ភៈក៏ដោយ។
ការធានានូវប្រតិបត្តិការរបស់ស្ថានីយ ISS បានក្លាយជាផ្នែកមួយក្នុងចំណោមផ្នែកដែលនៅសល់តិចតួចនៃកិច្ចសហប្រតិបត្តិការរវាងសហរដ្ឋអាម៉េរិកនិងរុស្ស៊ី៕
លោកស្រី អានណា គីគីណា ហោះឡើងទៅ ISS តាមយាន Crew Dragon របស់អាម៉េរិកកាលពីថ្ងៃពុធ
