Views: 2
ប្រែសម្រួលៈ បំណង(ដេល្លីម៉េល)៖ដ្រូនអ៊ុយក្រែនបានវាយប្រហារមូលដ្ឋានទ័ពអាកាសពីរនៅក្នុងទឹកដីរុស្ស៊ីដ៏ជ្រៅ នេះបើតាមការបញ្ជាក់ពីរដ្ឋាភិបាលវិមានក្រឹមឡាំងកាលពីថ្ងៃចន្ទមុនពេលកងកម្លាំងរុស្ស៊ីបញ្ចេញកាំជ្រួចមួយហ្វូងទៅលើហេដ្ឋារចនាសម្ពន្ធថាមពលអ៊ុយក្រែន ដោយប៉ះចំផ្ទះអ្នកស្រុកនិងអាគារមនុស្សរស់នៅផង។
មូលដ្ឋានទ័ពអាកាសអ៊ីងហ្គឹលធូ(Engels-2)ដែលគេសង្ស័យថាជាកន្លែងត្រៀមកម្លាំងវាយប្រហារធំមួយលើអ៊ុយក្រែន បានរងការវាយប្រហារដោយដ្រូន ដោយបានធ្វើអោយខូចខាតយន្តហោះទម្លាក់គ្រាប់បែកចម្ងាយឆ្ងាយពីរគ្រឿង។មូលដ្ឋាននៅក្បែរទីក្រុងសារ៉ាតូវ(Saratov)បានរងការផ្ទុះកាលពីជិតភ្លឺថ្ងៃចន្ទ ដោយបណ្តាលអោយយន្តហោះTu-95 ពីរគ្រឿងខូចខាត។យន្តហោះប្រភេទនេះជាច្រើនគ្រឿងត្រូវបានរុស្ស៊ីនាំមកកាន់មូលដ្ឋានក្បែរអ៊ុយក្រែនមួយនេះ ដោយគេសង្ស័យថាដើម្បីត្រៀមបើកការវាយប្រហារទ្រង់ទ្រាយធំមួយលើអ៊ុយក្រែន។
មូលដ្ឋានទ័ពអាកាសអ៊ីងហ្គឹលធូ បណ្តាលអោយខូចយន្តហោះទម្លាក់គ្រាប់ចម្ងាយឆ្ងាយរបស់រុស្ស៊ីពីរគ្រឿងក្រោយការផ្ទុះកាលពីថ្ងៃចន្ទ
ការផ្ទុះមួយទៀតកើតមាននៅមូលដ្ឋានទ័ពអាសរុស្ស៊ីមួយនៅក្បែរទីក្រុងរីយ៉ាហ្សាន់(Ryazan)ដោយបានសម្លាប់មនុស្សបីនាក់ក្រោយផ្ទុះឡានដឹកប្រេងមួយ។
ទីភ្នាក់ងារសារព័ត៌មានរដ្ឋរុស្ស៊ីRIAបាននិយាយថា មនុស្សប្រាំមួយនាក់ទៀតបានរងរបួសក្នុងការផ្ទុះរថយន្តដឹកប្រេងនៅរីយ៉ាហ្សាន់ ចម្ងាយប្រមាណ១៨០គីឡូម៉ែត្រពីរដ្ឋធានីមូស្គូ។
រដ្ឋាភិបាលទីក្រុងគៀវមិនចេញមកអះអាងទទួលខុសត្រូវចំពោះការវាយប្រហារនេះទេ តែត្រូវគេគិតថានៅពីក្រោយការវាយប្រហារស្រដៀងៗគ្នាលើមូលដ្ឋានយោធានិងឃ្លាំងភស្តុភារុស្ស៊ីនៅព្រំដែនខាងលិចរបស់រុស្ស៊ី។
វាបានកើតឡើងតែប៉ុន្មានថ្ងៃក្រោយអគ្គិភ័យមួយបានកើតមាននៅឃ្លាំងប្រេងរុស្ស៊ីមួយនៅតំបន់ព្រីយ៉ាន់សខ៍(Bryansk)ក្នុងការវាយប្រហារមួយដែលគេគិតថាដឹកនាំធ្វើដោយរដ្ឋាភិបាលទីក្រុងគៀវ។ការផ្ទុះឃ្លាំងប្រេងដូចគ្នាក៏កើតមាននៅភូមិស្តាល់ណយ កូន( Stalnoi Kon)កាលពីខែមុន។
មូលដ្ឋានទ័ពអាកាសអ៊ីងហ្គឹលធូនិងទីក្រុងរីយ៉ាហ្សាន់នៅចម្ងាយ៤៨០គីឡូម៉ែត្រ និង៧២០គីឡូម៉ែត្រពីព្រំដែនអ៊ុយក្រែន គឺហួសពីចម្ងាយហោះរបស់កាំជ្រួចឬរ៉ុក្កែតរបស់អ៊ុយក្រែន មានន័យថាការវាយប្រហារនេះទំនងជាធ្វើឡើងដោយដ្រូន។
មុនការផ្ទុះនៅមូលដ្ឋានទ័ពរុស្ស៊ី ក្រុមហ៊ុនអាវុធអ៊ុយក្រែនយូក្រូបូណូប្រូម( Ukrobonoprom)បានអះអាងអំពីជោគជ័យនៃការសាកល្បងដ្រូនមួយដែលអាចផ្ទុកគ្រាប់ទម្ងន់១០០គីឡូក្រាមដែលអាចវាយប្រហារទីតាំងចម្ងាយរាប់រយគីឡូម៉ែត្រ។
ការផ្ទុះនេះកើតឡើងក្រោយពីរូបភាពផ្កាយរណបកាលពីសប្តាហ៍មុនបង្ហាញរុស្ស៊ីប្រមូលផ្តុំយន្តហោះទម្លាក់គ្រាប់បែកចម្ងាយឆ្ងាយដែលអាចផ្ទុកក្បាលគ្រាប់ធម្មតានិងនុយក្លេអ៊ែរ ហើយត្រូវបានគេសង្ស័យថាសំរាប់វាយប្រហារលើអ៊ុយក្រែន៕
រូបភាពបង្ហាញយន្តហោះTu-95 និងTu-160 កំពុងចាក់សាំងនិងបំពាក់កាំជ្រួចបណ្តែត