Lesotho
This article was added by the user . TheWorldNews is not responsible for the content of the platform.

Baitlami ba re “senyamo!”

By Liapeng Raliengoane

MASERU – Ha ba akhela letlooa hara baroetsana ba Basotho, Baitlami ba Kereke e Catholiki ba re senyamo se bophelo ba boitlami.

Ho hlaha Kopanong ea Barali ba Pelo e Tlotlehang ea Jesu, Sr. Anatleta Lempe o itse boitlami ke bophelo boo moroetsana a ikhethelang bona ho sebeletsa Molimo le ho thusa kholisong ea kereke le sechaba.

Sr. Lempe o hlalosa ha bophelo bona e le bo phelehang ebile bo le monate ‘me o khothaletsa banana ho ikhethela bona. A re Likopano tsa baitlami ka ho fapakana ha tsona li amohela baroetsana ho tloha ka lilemo tse 18 ‘me baroetsana e be ba eso nyaloe kapa hona ho ba le bana. “Bohle ba utloang ba e-na le cheseho ea ho tseba haholo ka tsona, ba ka atamela setsi sefe kapa sefe seo baitlami ba phelang ho sona ‘me ba tla fumana tataiso,” ke Sr. Lempe eo. A boela a ipiletsa ho batsoali hore ba lokolle bana ba bona ha ba e-na le cheseho ea ho itlama kaha bophelo ha se ba lenyalo feela.

Ho tsoa Kopanong ea Makhabunyane a Kriste Moprista Motsekuoa, Sr. Mary Mokoma (58) o itse eena o kene boitlaming e le ha a ne a ile a khahloa ke baitlami ba Kopano ea Lelapa le Halalelang, o ne a rata tsela eo baitlami bao ba neng ba atamela litaba tsa kereke ka eona; boikokobetso le borapeli ba bona. Ha joale Sr. Mokoma o phela Roma, Conference Centre ‘me o re ho baroetsana “bophelo ba boitlami boa pheleha”.

Moitlami oa Kopano ea Baitlami ba Lerato ba Ottawa Pitseng Sr. Jacinta Tšehlana (26) o itse ha a ntse a hola o ile a khahloa haholo ke Baitlami bao a neng a bona ba thusa batho ba hlokang. “Ke motho ea ratang ho thusa bahloki le ho hlokomela ba tlokotsing, ka hona ha ke bona baitlami ba thusa le ho hlokomela bana le batho ba tlokotsing ke ile ka tlala lerato le khaphatsehang la boitlami. Ha joale ke fuoe thomo ea ho sebetsa likonyaneng ‘me ke lula ntlong ea baitlami St. Claire,” Sr. Tšehlana a li beha joalo.

Sr. Euphrasia Khatite (25) ho hlaha Kopanong ea Mabitso a Halalelang a Jesu le Maria o hlalositse ha cheseho ea boitlami e ile ea mo fihlela ha a le sekolong se phahameng sa Holy Names se tlasa botsamaisi ba Baitlami. “Ke ile ka khahloa haholo ke tsela eo baitlami ba neng ba holisa bana ba sechaba ka eona, ba ba ruta thuto-Molimo, ba ba fa malebela a bophelo, ba bile ba ba etsa likoakoariri, kaholimo ho tsohle ba ba fa thuto. Ke ile ka ba sheba eaba kere le ‘na ka leleng ke tlo tšoana le bona.”

Sr. Khatibe o re ka nako eo a neng a kopa ho batsoali ba hae hore o ea boitlaming, motsoali oa hae oa ntate ha a kaba a mo lumella empa qetellong pelo e ile ea nolofala eaba o mo lumella ho ea boitlaming. Eena o fuoe thomo ea ho sebetsa a boloka libuka tsa lichelete Little Flower Health Centre Leribe.