Lesotho
This article was added by the user . TheWorldNews is not responsible for the content of the platform.

Temo ea Lesere e imolla sechaba

By ‘Mamohaila Rampo

BEREA

E ntse e le a mang a maqheka a ho fenya tlala le tlhokahalo ea mesebetsi, sechaba sa Ha Monamoleli le Qhotseng se ithukhubelitse ka bongata temong ea lesere.

Lesere lena le lenngoe ka bongata ke sechaba ka mokhatlo oa sona oa Liberekane tsa Hlomelang, ‘me se le lemetse liphoofolo tsa bona ho qoba litjeo tsa ho le reka.

Taba-tabelo ea bona ke ho bona lesere leo le atlehile ebile le ka rekisetsoa sechaba sa litikoloho tse ling.

Morero o moholo ke hore ka thekiso eo ba tsebe phelisa le ho fepa malapa a bona.

Ho sa le joalo puisanong le Lentsoe la sechaba, Ramotse oa Ha Monamoleli Morena Motoali Motoali o itse ba fumana liqholotso tse ngata ha ba lebile balisana ba fulisang liphoofolo leboelleng. Motoali a re ba eng ba tšoare ba bang ba phunyang leboella, e be ba batšoarisa lekhotleng (Local Court).

O re ke linyeoe tse ‘maloa tseo ba li hlahletseng e ba baqusuoa ha ba fumane liqoso, hape a re babang linyeoe tsa bona ha li manolloe hantle.

E ntse e le enngoe ea liqholotso tsa temo, Motoali o re motseng moo bohle ba ne ba labalabela ho fumantšoa lipompo tsa metsi ka bomong empa ba ntse ba fumana metsi ho tsoa pompong ea sechaba.  A re qholotso e kholo ka pompo ea sechaba ke hore nakong ea ho noesetsa lijalo, haholo Mariha, ho lala qhoaqhoane e be moahi ea tla be a hloka metsi ka nako eo o fumana pompo e le leqhoa ebe eo oe tšela ka metsi a chesang, ebe ea senyeha haholo hoo e seng e le tloaelo ho bona ho lula ba e lefella hore e rekeloe hlooana bocha kaha e le tlhoko ea mantlha.

Ramotse o boetse o bontšitse ha bosholu e se e le qholotso e kholo kahare ho sebaka seo, a re le liphoofolo li nyamela fela ke ho se tsotelle hoa beng ba tsona.