Охридски маратон сепак ќе има, нема да биде прекината долгогодишната традиција. Потврда за тоа најпрво стигна од градоначалникот на Охрид, Кирил Пецаков, а сега се јави и Агенцијата за млади и спорт со соопштение.
„Агенцијата за млади и спорт со владина поддршка ја презема организацијата на Охридскиот маратон. Годинава е 60 годишниот јубилеј на Охридскиот маратон. Како традиција, која Охрид и државата ги става во центарот на светската спортска мапа, Агенцијата за млади и спорт, заедно со Владата Република Северна Македонија, заедно со сите надлежни институции, нема да дозволат овој познат, реномиран и светски признаен пливачки маратон да прекине и ќе ја преземе организацијата за одржување на маратонот. И годинава, Охридскиот маратон во водите на Охридското езеро ќе ги пречека сите пријавени учесници и ќе продолжи да биде атракција како за вљубениците во спортот, така и за граѓаните на Охрид и за сите туристи кои наменски доаѓаат токму за да го проследат овој голем спортски настан“, стои во соопштението на Агенцијата за млади и спорт.
Утре (петок), прес-конференција ќе оддржи директорот на Агенцијата за млади и спорт, Наумче Мојсовски, таа ќе се одржи во просториите на општина Охрид, а на неа ќе бидат споделени повеќе детали за организацијата на Охридскиот маратон.