Потпретседателката на опозициската Демократска партија на Косово (ПДК), Вљора Читаку вели дека премиерот Албин Курти, со неисполнувањето на барањата на синдикатите на образованието кои штрајкуваат веќе пет недели, настојува да го направи Косово „неподносливо место за живеење“, јави дописникот на МИА од Приштина.
Читаку на нејзината страница на Фејсбук утрово напиша дека Курти има намера „да го подели до срж косовското општество“.
– 28 септември 2022. Децата сè уште се дома. Училиштата затворени, А премиерот со тврдоглавост и рамнодушност продолжува да ги презира нашите учители и учителки. Настојува да го подели до срж косовското општество, вели Читаку.
Всушност, предупредува поранешната амбасадорка на Косово во САД, намерата на Курти е да создаде едно „ново општество“.
– Тоа е Третата Република кон која стреми Курти: Со нови синдикати кои ќе му се потчинат. Со нови медиуми, кои ќе му се потчинат. Со нови бизниси кои ќе му се потчинат. Премиерот сака да го направи Косово неподносливо место за живеење за сите оние кои не се согласуваат со него, напиша Читаку, порачувајќи дека „таквиот менталитет не поминува“.
Извор: МИА
