Malta
This article was added by the user . TheWorldNews is not responsible for the content of the platform.

AĠĠORNATA (1): Ħames persuni l-isptar wara li ambulanza daħlet fi trakk ipparkjat f’Ħal Qormi

Ħames persuni li kienu fl-ambulanza ttieħdu l-Isptar, wara li ambulanza baqgħet dieħla fi trakk ipparkjat, fi Triq il-Kanun Ħal Qormi.

Il-Pulizija marret fil-post u mill-investigazzjoni li saret irriżulta li ambulanza misjuqa minn raġel ta’ 55 sena residenti l-Imqabba, ħabtet ma’ trakk li kien ipparkjat, bil-konsegwenza li t-trakk laqat żewġ vetturi oħra li wkoll kienu pparkjati. Fuq quddiem tal-ambulanza kien hemm ukoll raġel ta’ 54 sena li jgħix Ħal Safi.

Fuq wara tal-ambulanza kien hemm ukoll infermier ta’ 35 sena residenti l-Mosta, kif ukoll żewġ nisa ta’ 49 u 23 sena, it-tnejn residenti Ħad-Dingli.

Kawża tal-impatt, iż-żewġt irġiel, li huma Emergency Ambulance Responders, inqabdu minn saqajhom u nħarġu bl-assistenza tal-membri mid-Dipartiment tal-Protezzjoni Ċivili

Fil-fatt, membri tal-Protezzjoni Ċivili kellhom iqattgħu parti mill-ambulanza biex ikunu jistgħu joħorġu liż-żewġ persuni. Il-persuni kollha ttieħdu l-Isptar Mater Dei għall-kura meħtieġa.

Aktar tard, il-mara ta’ 49 sena u ż-żewġ Emergency Ambulance Responders ġew iċċertifikati li weġġgħu gravi, filwaqt li ż-żewġ persuni l-oħra ġew iċċertifikati li weġġgħu ħafif.

Fortunatament, ħadd ma kien għaddej bil-pass fuq il-bankina fil-ħin tal-inċident bit-triq kellha tingħalaq għat-traffiku għal xi ħin.

Ritratti: Noel Zammit