Namibia
This article was added by the user . TheWorldNews is not responsible for the content of the platform.

Aakwashigwana ya geya sho ya kutha iikuni yawo kaanambelewa yuunshitwe

Aanambelewa yetonatelo lyuunshitwe mUuministili wOmidhingoloko, Omakuti nOmatalelopo moshitopolwa shaMusati oshiwike sha zi ko otaku hokololwa ya yugu aakulukadhi yahamano iikuni yawo, nonande okwa li ngaa ya yelithilwa kutya miikuni mbyoka omo hamu hupile oomeme mboka.

Gumwe gwomaakiintu mboka, meme Salvi Domigos (42), pethimbo ta holola okwaauvanawa okwa popi kutya iikuni yawo oye yi kuthwa mEtiyali lyoshiwike sha zi ko momukunda Oshatumbala moshikandjohogololo shEtayi.

Meme Domigos okwa hokolola kutya ye opamwe nookuume ke yatano ohaya ka tyaya iikuni yawo meni lya Angola popepi ashike noongamba dhaNamibia naAngola, opo ye yi landithe meni lyoshilongo yo yi imonene iiyemo. Okwa popi kutya iikuni mbyoka ya kuthwa kaanambelewa otayi tengenekelwa pooN$61 500.

Okwa popi kutya egumbo lye oli na aanona oyendji mboka ha yambidhidha nokashona hoka ha mono mokulanditha iikuni, nokwa yelitha kutya oku na aanona yahamano osho wo yalwe yahamano yaatekulu ye mboka ha tekula.

Domigos okwa hokolola kutya okwa li a kutha nokuli oondjo dhooshako mbali dhuusila wepungu positola tayi adhika momudhingoloko gwawo nokwa li e na etegameno kutya oondjo ndhoka otedhi futu noshimaliwa shoka ta mono uuna a landitha po iikuni ye.

“Otashi vulika ndi ka tulwe miipandeko molwashoka iikulya mbyoka nda kutha mositola ndjoka inandi yi futa,” osho a popi ngaaka. Okwa gwedha po kutya aanona ye ohaya yi kosikola nokwa li a hala oku ya landela oombindja dhuutalala molwashoka omasiku ga zi ko oya tidhwa ko kosikola molwashoka kaye na oombindja. Meme Domigos okwa popi kutya aanona ye okwa li wo ya tindilwa oonzapo kosikola oshikako sha zi ko molwashoka oya ndopa okufaalela kosikola oombapila dhookopi ndhoka kwa li ya tumwa ongoshipumbiwa okuza kosikola.

Okwa popi kutya okwa li yi indile aanambelewa mboka yuunshitwe ye ya sile ohenda molwashoka ohaya hupile mokulanditha iikuni mbyoka, ashike aanambelewa inaya pulakena ko hoka noya pula komeho nokulondeka iikuni mbyoka mololi osho wo miihauto yawo.

“Aanambelewa oye tu lombwele kutya hayo ye eta tu kale kaatu na iilonga. Okwa li nokuli ye tu ningile omatilitho kutya otaye tu kwata po, medhina kutya anuwa otashi vulika tu kale kaatushi Aanamibia,” osho a popi ngaaka.

Meme Domigos okwa popi kutya ngashingeyi oya thigwa mondjala.

“Oye tu lombwele kutya oya tseyithilwa kepangelo lya Angola opo ya kwate po iikuni yetu, ashike otushi shi kutya ndhoka odha nakalindi, molwashoka opolisi yaAngola ihayi tu ningi sha nande uuna ye tu tsakaneke tatu tyaya iikuni moshilongo shawo.”Meme Domigos okwa popi kutya epangelo lya Angola ohali ya indike owala kaaya tete po omiti, ashike okutyaya iikuni mbyoka yi li po nale, kashi na uupyakadhi.
“Tse ihatu tete po omiti, ohatu toola owala iikuni mbyoka yi li pevi.”

Kansela gwoshikandjohogololo shEtayi, Hans Haikali, okwa popi kutya oshiningwanima shoka okwe shi uva ashike okwa tindi okutya ko sha molwashoka onkene e na oku uva ehokololo okuza kaanambelewa yuunshitwe osho wo kopolisi kutya oshe ende ngiini.

Ashike nando ongaaka, pethimbo lyoshipopiwa shoshigwana kombinga yonkalo yoshitopolwa shaMusati, mEtitano, Haikali okwa popi kutya oshiningwanima shoka shaakalimo ya kuthwa iikuni yawo otashi uvitha nayi. Haikali okwa popi kutya iikuni mbyoka oya kuthwa aakiintu mboka kaanambelewa yuunshitwe melongelokumwe naanambelewa yesiloshimpwiyu lyopoongamba oNamibia Revenue Agency (Namra), osho wo opolisi.

Mwene gwomukunda Oshatumbala, tate Peter Nenghwanya okwa popi kutya aanambelewa oya ninga nayi sho ya kutha aantu omboloto yawo. “Oya ninga nayi aakwashigwana, ashike itatu ya pe ombedhi. Ngiika ngoka ogo omulandu haya longitha.”

Omupopiliko guuministili wOmidhingoloko, Romeo Muyunda okwa popi kutya aanambelewa mboka otaya gwanitha po owala iilonga yawo sho ya kwata po iikuni mbyoka ye etwa moshilongo shaali paveta nenge pwaana omikandapitikilo.

“Okwe eta meni iinima okuza koshilongo shilwe, kutya nee omo omuntu ha hupile, oshi na okuningwa pamilandu dhooveta ndhoka dhi li po,” osho Muyunda a popi ngaaka. Pethimbo lyoshipopiwa shoshigwana, ngoloneya gwoshitopolwa shaMusati, Erginus Endjala okwa popi kutya ootona dhiikuni 38 okwa li dha kuthwa aakwashigwana nodha landithwa po koshimaliwa shooN$59 670.