Namibia
This article was added by the user . TheWorldNews is not responsible for the content of the platform.

Aanambelewa yuuministili welongo taya tamanekelwa uulingilingi

Okomisi yokukondjitha uulingilingi moshilongo yedhina Anti-Corruption Commission (ACC) omasiku ga zi ko oya tula miipandeko aafekelwa mboka taku hokololwa ya kala taya longo uulingilingi okuza mo2018, woshimaliwa tashi tengenekelwa poomiliyona N$3.

Momukanda ngoka gwa pitithwa koACC, maafekelwa mboka omwa kwatelwa Cornelius Willemse (53), naVeronica Goagoses (54), mboka haya longele Uuministili wElongo, Uunkulungu nOmithigululwakalo, nomufekelwa omutitatu, omunangeshefa gwedhina Desmond Kays.

“Ehangano lyedhina SSIT Trading Enterprises CC okwa li lya pewa ootendela mbali dhokugandja omashina gokuninga oombapila dhookopi koshikondo shoNational Institute for Educational Development (Nied) koshimaliwa shooN$451 080 muMaalitsa 2018, osho wo okugandja omashina gokuninga oombapila dhookopi koombonge oonene dhUuministili wElongo, Uunkulungu nOmithigululwakalo koshimaliwa shooN$1 145 412 muMei2018,” osho omukanda ngoka gwa pitithwa koACC gwa popi ngaaka.

Cornelius Willemse

Omukanda ngoka ogwa yelitha kutya Goagoses oye kwa li a pitike efuto lyootendela ndhoka dhopaali, naashoka osha ningwa sho taku hokololwa Willemse a koleke kutya omashina ngoka gokuninga ookopi dhoombapila oga gandjwa nale kuuministili, momasiku 1 Maalitsa osho wo 22 Mei.

“Ashike nonande kapwa li nande eshina lyokuninga ookopi lya adhika lya gandjwa [kuuministili] pethimbo ndyoka. Aanambelewa mboka yaali oya ya pambambo oompango dhokontalaka, ndhoka tadhi popi kutya okuthitha eshina lyokuninga ookopi oli na okufutwa komwedhi muule woomwedhi 36,” osho omukanda gwa popi ngaaka.

Veronica Goagoses

Otaku hokololwa kutya natango okwa monika kutya nokonima sho iifuta mbyoka ya futwa palumwe shaali paveta, Kays onkene natango a tsikile okukala ta futwa kuuministili oshimaliwa komwedhi shokuthitha omashina ngoka gokuninga ookopi.

Otaku hokololwa wo kutya Goagoses okwa li a pewa okashona kuKays ka talika ko kutya olupandu, sha ningwa pokati komasiku 1 Maliitsa sigo 30 Mei 2018.

Aafekelwa mboka oya holoka mompangu yaKatutura oshiwike sha zi ko.

Goagoses naKays oya pewa oboloha yoo-N$50 000 mu kehe gumwe, omanga Willemse okwa pewa oboloha yooN$25 000.