Namibia
This article was added by the user . TheWorldNews is not responsible for the content of the platform.

Aantu yatano yi imangeleke muule womasiku gatatu

Omulumentu ngoka a li ta tamanekelwa edhipago lyaashi lyoshiningilawina, okwi ikutha omwenyo mOsoondaha, sha ningilwa molukanda lwoombashu lwaDRC moSwakopo. Omufekelwa ngoka okwa li a taalelwa oshipotha shedhipago lyaashi lyoshiningilawina sho taku hokololwa a hingi po oshihauto shaantu nolwanima okwa pumu omuhingi gwombasikela.

Omupopiliko gwopolisi yErongo, inspekta Ileni Shapumba okwa popi kutya oshiningwanima shoka osha ningwa pokati kotundi 09h00 no10h00 mOsoondaha.

“Omuniilonga gwopehala lyokuyoga iihauto okwa hingi opo otaxi ndjoka kwa li ye etwa po opo yi yogwe. Otaxi ndjoka okwe yi hingi po u uka kolukanda lwaDRC, hoka e ki idhenga mu kakadhona ngoka a li ta hingi ombasikela,” osho Shapumba a popi ngaaka.

Nakusa ngoka a li ta hingi ombasikela okwa hololwa kutya oye Theopolina Iyambo.

Otaku hokololwa mbala konima yoshiningwanima shoka omufekelwa okwa hingi po oshihauto nokufadhukapo nolwanima okwi itsuwika i imangeleke.

Omufekelwa oye Kamati Tokomo nokwa adhika i imangelekela mombashu ye.

Moshiningwanima sha yooloka, omulumentu gwomimvo 72 okwi ikutha omwenyo mEtitano sha ningilwa momudhingoloko gwOkondjatu moshitopolwa shaTjozondjupa. Nakusa okwa hololwa kutya oye Julius Hengombe. Ina thiga ko ombapila yetompelo lyeikuthomwenyo.

Pauyelele waapambele ye, Hengombe okwa li megumbo oye awike pethimbo lyoshiningwanima shoka. Aapambele ye oya tseyithilwa nale onkundana yoluhodhi nomakonakono gopolisi otaga pula komeho.

MOlyomakaya, omulumentu gwomimvo 35 okwi imangeleke sha ningilwa moKarasburg. Okwa hololwa kutya oye Milner Servantus Frederick.

Ina thiga po ombapila yetompelo lyokwiikutha omwenyo, naapambele oya tseyithilwa nale onkundana. Omakonakono gopolisi otaga pula komeho.

Ndara Eveline Mbava gwomoRundu, okwa mana oondjenda mOlyomakaya sho taku hokololwa kutya naye okwi imangeleke. Ina thiga po uuyelele wa sha kutya omolwashike i ikutha omwenyo naapambele ye oya tseyithwa nale onkundana yoluhodhi. Omakonakono gopolisi otaga pula komeho.

Opolisi oya lopota natango kutya Eugene Jacques Izaaks (41) gwomoRehoboth okwa mana oondjenda mOsoondaha sho i imangeleke.

Pauyelele wolopota yopolisi, Izaaks otaku hokololwa a li ta nyenyeta nomukulukadhi gwe nolwanima okwa tokolola i imangeleke.

“Kapu na ombapila yetompelo lyokwi ikutha omwenyo ya thigwa po. Aapambele yanakusa oya tseyithilwa nale onkundana yoluhodhi,” osho olopota yopolisi ya yelitha ngaaka.

MoSwakopo, omulumentu gwomimvo 22 okwa tsuwa nombele sigo omeso komufekelwa gwomimvo 19. Opolisi oya popi kutya nakusa Imms Hermanus Ganaseb, okwa tsuwagulwa lwiikando oyindji, sha ningwa mEtitano.

Omufekelwa okwa fadhukapo konima yoshiningwanima shoka, ashike esiku lya landula okwa tulwa miipandeko.

“Etompelo lyoshiningwanima shoka inali tseyika natango. Omudhimba gwaGanaseb ogwa falwa kokila yoshipangelo shepangelo shaSwakopo. Aapambele ye oya tseyithilwa nale onkundana yoluhodhi.”

Pokati mpoka, aalumentu yaali oya mana oondjenda moshiponga shoshihauto sha ningilwa pokati kaTavi naTjiwarongo mOsoondaha.

Otaku hokololwa kutya aalumentu mboka oya li mololi ndjoka lwanima ya gu ko kopate nokugalangala sha landula sho omuhingi a nyengwa oku yi kondolola.

Omupopiliko gwopolisi yaTjozondjupa, inspekta Maureen Mbeha okwa popi kutya omuhingi, Vinia Mweshitale (45), okwa nyengwa okukondolola ololi noya nuka ko kopate nokugalangata.

Ololi ndjoka otaku hokololwa ya li naafaalelwa yaali, ashike omuhingi opamwe nomufaalelwa gwedhina Sem Shaamwapeni Lineekela Honge (44), oya hulithile pehala lyoshiningwanima.

“Ololi oya li ya humbata omapakete ge na omayapela nokwa li tayi zi koCape Town moSouth Africa ya thinda koDemocratic Republic of Congo,” osho Mbeha a popi ngaaka.

Okwa gwedha po kutya aapambele yoonakusa oya tseyithilwa nale onkundana yoluhodhi nomakonakono gopolisi otaga pula komeho.