Namibia
This article was added by the user . TheWorldNews is not responsible for the content of the platform.

Bix Carwash i ikanyuna edhipago taku popiwa lya ningilwa pehala lye

Mwene gwehala lyokuyogela iihauto mOvenduka okwa lombwele opolisi yi yeleke edhina lyongeshefa ye ndyoka ta popi kutya olya nyatekwa kopolisi ndjoka ya popi okupitila molopota yiimbuluma kutya pehala lyongeshefa ye opwa dhipagelwa omuntu ngoka a tsuwa nombele.

Shoka osha landula sho omupopiliko gwopolisi moshilongo, omupevikomufala Kauna Shikwambi, a tseyitha okupitila molopota yiimbuluma mbyoka ya ningwa mehuliloshiwike lya piti kutya omulumentu gwomimvo 49, Brave Kavari, okwa tsuwa nokuhulitha pehala lyongeshefa yokuyoga iihauto lyedhina Bix Carwash moKatutura.

Oshiningwanima shoka otaku hokololwa sha ningwa komatango gOlyomakaya lwopotundi 17h00.

“Otaku hokololwa kutya omufekelwa okwa tsu nakusa […] noshilwitho inaashi tseyika mothingo kombinga yokolumoho, naashoka oshe eta a hulithile pehala lyoshiningwanima,” osho Shikwambi a popi ngaaka okupitila molopota.

Mwene gwoBix Carwash, Benjamin Kambala okwa popi kutya olopota ndjoka yopolisi kayi na ehokololo li na uushili noya lundulula ehala lyaampoka pwa ningilwa oshiningwanima nonkene shoka she eta enyateko lyongeshefa ye.

“Bix Carawash okwa hala oku shi yeleka moshigwana kutya nakusa ina dhipagelwa nande pehala [lyetu], ngaashi sha lopotwa kopolisi, ishewe nakusa kali nande kastoma gwehala lyokuyogela iihauto.

“Pauyelele mboka wu li po, nakusa okwa dhipagelwa pehala lyelelo lyondolopa yoshilandopangelo, ndyoka lyi li popepi nomatala gaSingle Quarter moKatutura, ndele ha poBix Carwash,” osho a popi ngaaka.

Okwa popi kutya pongeshefa ye, egameno lyookastoma olyo oshinima sha simana kwaayihe, naashoka okwe shi ulika muule woomvula sho a kala pehala mpoka nongeshefa ye yokuyoga iihauto.

“Kapu na omiyonena nenge omadhipago ga ndhindhilikwa pehala lyongeshefa yandje muule woomvula 10 dha piti,” osho a popi ngaaka.

Kambala okwa popi kutya ongeshefa ye otayi tsikile nokukaleka po egameno lya kwata miiti lyookastoma dhawo.

“Otwa hala opolisi yi pitithe omukanda gwiikundaneki okuyeleka elundilo ndyoka opo shi mbilipalele enyateko lyedhina lyehala lyetu,” osho a popi ngaaka.

Omupopiliko gwoBxi Carwash, Johanna Kambala okwa popi kutya olopota ndjoka yopolisi oya nyateka lela edhina lyongeshefa yawo.

“Aantu ngashingeyi otaya kala nomaipulo gegameno notaya tameke itaaye ya we pehala.

Otatu indile ku gandjwe etumwalaka ndyoka tali yeleke kutya nakusa ina dhipagelwa pehala lyongeshefa yetu,” osho a popi ngaaka.

“Ngele opolisi oya kala inaayi pititha etumwalaka lyepukululo, elelo lyetu otali ka kwatathano naakwaveta yetu opo ku taliwe nkene oshinima shika shi na okwe endwa.”

Kambala okwa popi kutya ongeshefa yawo ngashingeyi oyi li moshiponga shokukanitha iiyemo naashoka otashi vulika shi ka kanithithe iilonga yaaniilonga yawo yahetatu.

“Otatu ya pe omasiku gaheyali opo ya yamukule, nongele hasho tatu katuka onkatu,” osho a gwedha po ngaaka.

Shikwambi oshiwike shika okwa popi kutya opolisi oya yakula enyenyeto okuza koBix Carwash notaya konakona oshiningwanima shoka.

“Otandi ka tala shoka she ende po, ashike ondi inekela kutya mwene gwehala ndyoka lyokuyoga iihauto kali po [pethimbo lyoshiningwanima], ishewe nangame kanda li po, onkene shoka aluhe ohashi ikwatelele kuuyelele mboka wa gandjwa kwaamboka ya li po.

“Kashi shi oshiningilawina, ashike ngele osha ningilwa popepi, nena otashi vulika osho she eta omapopyo gokutya osha ningilwa pehala ndyoka – ndele shoka itashi ti kutya otatu nyatekitha owina edhina lyehala lye lyokuyogela iihauto. Otatu ka yamukula pambelewa. Onda tegelela owala uuyelele okuza komukwatakanithi gwiimbuluma,” osho Shikwambi a popi ngaaka.

Ehala lyoBix Carwash otali adhika olwaamba nomatala goSingle Quarter moKatutura, noli na wo ondunda yomanwino.