Namibia
This article was added by the user . TheWorldNews is not responsible for the content of the platform.

Ekandjo a hala omutumba gwokutotha mo omuulikwahogololo gwoSwapo

Ngoka a li minista gwokabinete Jerry Ekandjo okwi indile omupresitente gwongundu yoSwapo Hage Geingob a tseyithe omutumba omunene opo ku ulikwa omuulikwahogololo gwongundu tayi pangele momahogololo gopashigwana ngoka taga ka kala ko mo2024.

Etokolo ndyoka lya ningwa kuEkandjo otali vulu okutengenekelwa omadhiladhilo ogendji, mwa kwatelwa kutya otashi vulika a hala okukutha ombinga momahogololo gokupewa onkatu yuuleli wongundu, noshinima shoka otashi vulika shi ka gumwe nayi ondjo yaNetumbo Nandi-Ndaitwah okuninga omupresitente gwoshilongo ngoka ta landula ko.

Iiwike ine ya piti, otaku hokololwa Ekandjo a shangele Geingob ombapila ta yelitha kutya momutumba ngoka gwa ningwa omumvo gwa zi ko, inamu tseyithwa edhina lyaangoka ta ka kalela po ongundu yawo momahogololo go2024.

Pomutumba gwomahogololo gongundu omumvo gwa zi ko, Geingob okwa tseyitha kutya omupeviprima Nandi-Ndaitwah oye ta ka kala omuulikwahogololo gwongundu tayi pangele.

“Omahogololo oga ningwa, otwa pewa iizemo kutya otatu ka kala owala nomuulikwahogololo gumwe, nota ka kala Nandi-Ndaitwah, otatu ka ninga iikonga notu na omuntu ngoka te ke tu kwatela komeho,” osho Geingob kwa li a popi ngaaka.

Otashi ulike kutya Ekandjo okwa hala pwa ningwa omutumba ngoka gwa nuninwa okutseyitha pambelewa ngoka ya hala a ninge omuulikwahogololo, ashike nando ongaaka Geingob otaku hokololwa kutya onkene ta konakona eindilo lyombapila yaEkandjo.

Aayambidhidhi yaEkandjo oya kala taya popi kutya [Ekandjo] okuza pomahogololo gomo2017 ina kala lela ta kondjitha okuninga omupresitente ndele okuhanganitha oSwapo yo yi ye monkalo moka ya li nale.

Ashike uupyakadhi mboka wu li po oomboka kutya opo Ekandjo a kuthe ko Geingob koshipundi shuupresitente wongundu, opu na okuningwa omutumba gwomahogololo.

Omanga amushangandjayi gwoSwapo Sophia Shaningwa ta yambidhidha Nandi-Ndaitwah, otashi vulika omutumba ngoka tagu kondjithwa kuEkandjo kaagu pitikwe.

Omumvo gwa zi ko momutumba gwomahogololo gongundu yoSwapo Nandi-Ndaitwah okwa sindana po onkatu yuupevipresitente wongundu naashoka pamuthigululwakalo gwoSwapo oye ta ka ninga omuulikwahogololo gwongundu yoSwapo.

Ashike nando ongaaka, Ekandjo okwa li a ningi onkambadhala yokuya mondambo yonkatu yuupevipresitente wongundu ashike okwa ndopa okutulwa mo kongundu.