Namibia
This article was added by the user . TheWorldNews is not responsible for the content of the platform.

Etokolo lyoboloha yaAmushelelo otali ningwa muAuguste

Omunandjungu Michael Amushelelo okwa taalela natango iiwiike itatu konima yekumba opo a lombwele etokolo lyompangu ngele ota vulu okupewa oboloha.

Omupanguli Naomi Shivute opamwe nomupanguli ta kwathele Philanda Christiaan oyu undulile etokolo lyeindilo lyoboloha yaAmushelelo komasiku 14 Auguste, sha landula iihokolola yetalululo lyeindilo lyoboloha mOmpangu yoPombanda yaVenduka.

Amushelelo (32) okwa kala mondjeedhililo okuza muMaalitsa numvo, nomomasiku 20 Apilili okwa li a ningi eindilo lyoboloha mompangu yamangestrata gwaVenduka moKatutura, ashike eindilo lye okwa li lye ekelwahi naashoka osho nee she eta ya fale oshipotha shawo kompangu yopombanda taya pula opo eindilo lyoboloha li talululwe opo a mangululwe mo mondholongo.

Pethimbo a tindilwa ompito yokwiifutila mo okwa lombwelwa kutya okwa taalela nale iipotha ya faathana yiiningwanima yoludhi lumwe mbyoka a ningi mOvenduka nomOmbaye yi na sha nomahololomadhiladhilo.

Amushelelo mondholongo okuli mo sho a tulwa miipandeko mOvenduka momasiku 21 Maalitsa sho taku hokololwa kutya okwa li a kwetele komeho ehololomadhiladhilo kaali li paveta ndyoka lya li ompinge nonkalo yokwaana iilonga moshilongo.

Pethimbo ndyoka, Amushelelo okwa tulwa miipandeko pamwe nomunandjungu Dimbulukeni Nauyoma, osho wo oshilyo shongundu Popular Democratic Movement megumbo lyopashigwana Inna Hengari mboka nayo kwa li ya patululilwa iipotha ya kwatela mo okwe eta evundakano moshigwana, okuyonagula omaliko gepangelo osho wo okukwahwameka evundakano moshigwana pethimbo yu unganeke ku ningwe ehololomadhiladhilo momasiku 21 Maalitsa.

Pethimbo lyehololomadhiladhilo ndyoka lyu unganekwa kaafekelwa ya tumbulwa pombanda otaku hokololwa iihauto yimwe yopolisi kwa li ya dhengwa kaakwashigwana.

Nauyoma, Amushelelo naHengari otaku hokololwa ya gongala pamwe naakwashigwana opo ya ninge ehololomadhiladhilo nonande ondjayi yetanga lyopolisi moshilongo Joseph Shikongo okwa li a gandja elombwelo kutya ehololomadhiladhilo ndyoka itali vulu okuningwa mesiku lyemanguluko omolwomatompelo ge na sha negameno.

Onkene Shikongo okwa li a lombwele aaunganeki yehololomadhiladhilo ndyoka ya konge esiku lilwe.

Ashike nando ongaaka onkene engungo enene lyaagundjuka mekwatelo komeho lya Nauyoma, Amushelelo naHengari, ya gongala nokupula komeho nehololomadhiladhilo.

Nauyoma naHengari okwa li ya mangululwa mo mondjeedhililo konima yomasiku sho ya pewa kehe gumwe oboloha yoo-N$5 000.

Momukanda gwekondjitho lyoboloha yaAmushelelo ngoka gwa gandjwa kOmpangu yoPombanda nogwa pulakenwa uunambo, hahende gwe Kadhila Amoomo oti indile ompangu yi gandje oboloha yooN$2 000 komuyakulwa gwe, opamwe noompango opo a kale ti ilopota lutatu koshiwike komupolisi ngoka tu ungaunga noshipotha she.

Amoomo okwa popi kutya mangestrata ngoka a tindi okugandja oboloha kuAmushelelo oomwedhi dha piti, okwa ninga epuko molwashoka okwa ningi etokolo ndyoka inaa pulakena ehokololo lyoshiningwanima okuza komukonakoni gwoshipotha shaAmushelelo. Hahende okwa popi kutya omukonakoni gwoshipotha okwa ndopa, molwashoka ke na nande uumbangi wa sha mboka tawu ulike kutya Amushelelo okwa yona oshimbuluma sha sha miiningwanima mbyoka ta tamanekelwa.

Sho ta popile omuyakulwa gwe, Amoomo okwa gwedha po kutya etompelo limwe lya gandjwa komukonakoni oondyoka kutya Amushelelo okwa mangwa po omolwomikalo dhomaihumbato ge komeho gopolisi.

Hahende okwa popile Amushelelo kutya pethimbo lyiihokolola yoboloha omupolisi ngoka a kalela po opolisi kali nande nomakankameno molwashoka okwa lombwele ompangu kutya Amushelelo okwa taalela oshipotha shevundakano neyono lyomaliko, omanga iiningwanima mbyoka ya ningwa a mangwa po nale kopolisi, onkene Amoomo okwa popi kutya itashi tsu kumwe a kale ta tamenekelwa iinima mbyoka ke ena mo ekuthimbinga.

Omutamaneki ngoka a kalela po epangelo Johannes Kalipi okwa pataneke kutya mangestrata kali nande a puka sho a tindile Amushelelo ompito yokwiifutila mo.

Kalipi okwa popi kutya Amushelelo oku ulika kutya oku na onkalondjigilile yokwiidhopa nokweendulula iikoya ya faathana naashoka a taalela uuna a mangululwa mo mongali, nokwa popi kutya itashi kala nande muuwanawa womulandu guuyuuki ngele okwa mangululwa mo koboloha natango.

Amoomo okwa pataneke ndhoka nokulombwelwa ompangu kutya nonande omuntu a kale a taalela iipotha iinene yomonakuziwa nenge a monika ondjo miipotha yilwe monakuziwa, Ompangu yoPombanda yaNamibia okwa li ya popi kutya iiningwanima yomonakuziwa itayi vulu okulongithwa ongomakankameno gokutindila omuntu a pewe ompito yokwiifutila mo.