Namibia
This article was added by the user . TheWorldNews is not responsible for the content of the platform.

‘Inamu iyaga mpoka itaa pu nyu’

Omunandjungu ngoka wo e li omunapolitika Job Amupanda okwa yamukula kwaamboka taye mu nyana sha landula sho a tula okavidio komalungula (kiikundaneki yopankalathano) tali onyama yombwa mOmuthiya moshitopolwa shaShikoto, mehuliloshiwike lya piti.

Amupanda okupitila kepandja lye komalungula okwa popile etokolo lye lyoku ulika okavidio ta li onyama yombwa nokwi indile mboka taye mu popi ye shi hulithe po.

“Oshikando tashi landula ngele onda mono edhina lyandje momikanda dheni, amuhe omuna okuny*. Ohamu dhipaga oonkoshi opo mu ithaneke nadho okupitila mwaashoka hamu ithana ‘uudhano wethigathano lyuukongo’. Nanye ohamu dhipaga nokulya iipuka inaayi mu ninga sha nomwe yi luka omadhina taga shundula ngaashi ‘Iikulya yomEfuta’. Inamu iyaga mpoka itaa pu nyu!” osho Amupanda a popi ngaaka, okuyamukula kwaamboka ye mu uka molwashoka ohali onyama yomwa.

Okavidio hoka ka andjaganekwa koyendji komalungula mehuliloshiwike, otamu monika omuleli gwoAR Amupanda, tali onyama yombwa pomatala noshe eta omaipulo ogendji okuza kwaamboka ye li ompinge nokulya onyama yombwa taya pula ngele oshi li ngaa paveta nomondjila okudhipaga nokulya onyama yombwa.

MOsoondaha, Amupanda okwa talelepo omalata gaMuthiya ngoka geshiwike nawa monooli haga landitha aluhe onyama yombwa, nokwa landa po onyama ya gwana nokwi ithana aaholi yonyama yombwa ya lande pomulandithi mpoka a landa, molwashoka oku na onyama tayi tokola elaka.

OVETA

Konima yokavidio hoka, ehangano lyedhina Justice for Animals ndyoka lya totwa po nelalakano lyokukwatela po uuthemba nuuyuuki wiinamwenyo olya pititha omukanda ngoka gwa nyana shoka sha ningwa kuAmupanda, nolya popi kutya shoka oshi li ompinge nOveta 71 yIinamwenyo yomumvo 1962.

Ehangano ndyoka olya tseyitha kutya otali ka longitha oveta ya tumbulwa pombanda okukatukila onkatu kehe ngoka ta ka kwatwa a dhipaga ombwa nelalakano lyonyama yokulya nenge okukutha ko oshipa.

“Job, otatu ku adha,” osho ehangano lya popi ngaaka.

Ehangano ndyoka lyo-Justice for Animals olya popi kutya okulya onyama yombwa oshi li lela ompinge naashoka sha thamunwa moveta yiinamwenyo, naangoka teshi ningi okwi ilongela okukatukilwa onkatu yopaveta.

“Kehe tuu ngoka ta dhipaga ombwa nelalakano lyokukutha ko oshipa nenge onyama nenge okukutha ko iilyo yilwe kombwa nelalakano lyokulanditha, ngaaka okwa yona, nokuna ondjo yoshimbuluma, nokwi ilongela egeelo lyofuto nenge lyondholongo uule woomwedhi hamano nenge a pewe omageelo ngoka gopaali oshita,” osho omukanda gwa yelitha ngaaka.

OMBWA INAYI LIWA … Ehangano lywo mOngwediva ga thanekwa ombwa edhina Justice for Animals olya tulitha ndjoka yedhina Dalton notaga gandja omapulakata omanene moondolopa etumwalaka opo ku hulithwe po okulya ngaashi mOvenduka, mOndangwa osho onyama yombwa.

SPCA

Ehangano lyokugamena nokupopila iinamwenyo kaayi monithwe iihuna lyedhina Society for the Prevention of Cruelty to Animals (SPCA) mOmaandaha olya pititha omukanda ngoka tagu kondema edhipago lyoombwa nelalakano lyonyama yokulya noli wete kutya omukalo ngoka tagu longithwa kaantu kagu li nande pauntu.

“Nomalakano omanene taga landula [omolwashoka]: ombwa oya kala ya talika ko ethimbo nuule ongoshinamwenyo shopaukuume, [oshitiyali] okulya onyama yombwa osha nika oshiponga kuundjolowele womuntu,” osho omukanda gwa popi ngaaka.

Omukanda ngoka ogwa gwedha po kutya omikalo hadhi longithwa okudhipaga oombwa, ngaashi gwa thamunwa kwaamboka lopotele iitayi yoSPCA moNamibia, odha kwatela okudhenga, osho wo okuponda nenge okumangeleka ombwa sigo ya si.

SPCA okwa gwedha po kutya okulya onyama yombwa oya nika oshiponga molwashoka: “Ehangano lyuundjolowele muuyuni lyedhina World Health Organisation olya londodha mboka haya li onyama yombwa kutya [onyama] ohayi vulu okutaandelaka omikithi ndhoka hadhi taandele okuza miinamwenyo okuya momuntu mwa kwatelwa omukithi guupuka momandjandja ngoka hagu vulu okuza monyama yombwa, omukithi gwocholera osho wo endambi,” osho omukanda gwa popi ngaaka.

MPOKA SHA TAMEKELE

Eindilo opo ombwa kaayi liwe we olya hwahwamekwa koshiningwanima sha ningwa moRehoboth muJuni, sho ombwa yedhina Dalton ya yakwa po nokudhipagwa po noya ningwa po okapana pehala lya tseyika nawa hali landithwa onyama yombwa mondolopa ndjoka.

Dalton, oholikembwa yomukalimo gwomoRehoboth, meme Mavourneen Busch, ndjoka kwa li ya kana okuza maandjawo momasiku 8 Juni.

Konima yaashoka meme Busch okwa li a tameke nolukongo lwombwa ye okupitila kiikundaneki yopankalathano nolwanima okwa tokola a landule omapandaanda nomagumbo ta kongo ombwa ye, ashike okwe ki itsa moshinima shoka she mu kumitha noshe mu uvitha nayi noonkondo shombwa ye yi li kondhalate yokapana.

Okwa hokolola kutya pethimbo ta kongo ombwa ye okwa talelepo wo ehala lyontumba ndyoka li shiwike nawa hali landithwa onyama yombwa nokwa adha po okapana kombwa, lwanima sho a konakona okwi itsu momutse gwombwa ye shoka she eta a tseye kutya ombwa ye oya dhipagwa po nokuningwa po okapana.

Shoka oshe eta aafekelwa yaali Ricardo Kastoor naTeodor Itembu ya tulwe miipandeko nokupatululilwa oshipotha sheyako lyombwa osho wo ehepeko lyiinamwenyo mekwatathano nombwa ndjoka Dalton.

Oshipotha shawo oshu undulilwa komasiku 14 Septemba noye li natango mongali.

Sha landula oshiningwanima shoka ehangano lyo-Justice for Animals olya dhike po omapulakata omenene moondolopa ngaashi mOvenduka, mOndangwa osho wo mOngwediva ga thanekwa ombwa ndjoka yedhina Dalton netumwalaka tali indile ku hulithwe po okulya oombwa molwashoka odha talika ko ongookuume kaantu.