Namibia
This article was added by the user . TheWorldNews is not responsible for the content of the platform.

Kamatyona gwomimvo 11 i imangeleke sho a hindwa kosikola

Yina yokanona hoka ki ikutha omwenyo omasiku ga zi ko sho taku hokololwa ka hindwa kaanasikola yoposikola yawo, okwa popi kutya omukuluntusikola okwa tindi okwiidhopa mo moshiningwanima shoka.

Christopher Boois (11), ngoka a li mondondo 6 posikola tayi adhika mondolopa yaKeetmanshoop, okwi imangeleke konima sho ongundu yaanasikola yaamati kwa li ye mu yapukile ya zala uumaska nokutameka taye mu dhenge.

Pauyelele wolopota yopolisi, omukwatakanithi gomakonakono giimbuluma mopolisi ya//Kharas, Nicodemus Mbango, okwa koleke oshingwanima shoka nokwa popi kutya Christopher otaku hokololwa a yi kosikola a ka tale onzapo ye ongula yomasiku 15 Juni.

Molugumbo lwosikola, omanga u uka kongulusikola, Christopher otaku hokololwa a yapukilwa kongundu yaanasikola yaamati mboka kwa li ya zala uumaska, noya tameke oku mu hinda noku mu dhenga.

“Onzapo ye oya tuulwa po, nohema ye osho wo ombindja ye okwe yi kuthwa. Okuza mpoka otaku hokololwa Christopher a tondokele kegumbo nokwa tseyithile yinagona kombinga yoshiningwanima shoka,” osho Mbango a popi ngaaka.

Opolisi oya popi kutya Christopher nayinagona oya yi kosikola opo ya ka lopote oshiningwanima shoka komukuluntusikola.
Ashike, sho ya galukile kegumbo lwanima Christopher okwi ikutha omwenyo.

Yina, Tracy Boois, okwa koleke kutya Christopher okwa li shili a shuna kosikola nayinagona, Jenny Witbooi, opo ya lopote oshinima shoka kelelo lyosikola.

“Oya lombwelwa kutya osikola kayi na shoka tayi vulu okuninga po yi mu kwathele . . . Ngashingeyi omumwandje ke ko we,” osho Boois a popi ngaaka.

Christopher otaku hokololwa a li namumwayina omushona kuye, pethimbo ya yi kosikola ya ka tale oonzapo dhawo.
Omukuluntusikola gwosikola ndjoka okwa lombwele onzonkundaneki ndjika kutya ita vulu okutya ko sha molwashoka opu na omahokololo gatatu ga yooloka kombinga yoshiningwanima shoka, nokwa hala tango okutsakanena naavali yanakusa osho wo opolisi.

Boois okwa tongonona omwanamati ongomuntu a li omumweni koshitwe ishewe okwa li ha pulakene, ashike uuna ku uvutile nawa oshinima shontumba, oheshi popi.

Okwa popi kutya osikola okwa li yi na okukala ya yapukila nawa oshiningwanima shoka opo uupyakadhi wu kandulwe po.

“Uuna omumwandje a zi mo megumbo a ye kosikola, ohayi momake netonatelo lyosikola uuna a thiki kosikola,” osho a popi ngaaka.

“Christopher kegumbo okweya ko ta lili, e li mengwangwano enene ishewe onzapo ye kali e yi na. Ombindja ye osho wo okahema kali nayo. Okwa popi tati: ‘Meme, okwa li ndi li kosikola, ashike onda dhengwa kongundu yaamati. Oya hangene ndje,” osho a popi ngaaka.

Boois okwa popi kutya epulo lyotango ndyoka Christopher nayinagona anuwa ya pulwa komukuluntusikola sho ya ka lopota oshiningwanima shoka, otali ti: “Owa pita ngaa?”

“Okuza mpoka okwa pula Christopher kutya omolwashike a tondokele kegumbo peha lyokulopota tango oshiningwanima shoka kaalongi nenge kuye [komukuluntusikola]. Okwa popi kutya Christopher okwa ninga epuko enene sho a tondokele kegumbo molwashoka osikola ando oya pata omiyelo dhosikola opo ku ningwe omakonakono kombinga yaanona yaamati mboka ya li molugumbo taku hokololwa ye mu dhenge, molwashoka osikola yawo kayi na sekuliti,” osho a popi ngaaka.

Omukuluntusikola otaku hokololwa a lombwele Christopher nayinagona kutya kaye na shoka taya vulu okuninga po.

Witbooi okwa popi kutya pethimbo ya li mela lyondjila yu uka kegumbo, Christopher okwa kala owala a mwena itaa popi sha, naasho ya thiki okwa yi u ukulila kokandjugo kopondje nokwi ipatele mo.

“Sho nda tameke oku mu ithana, kali ta yamukula ndje. Onda ka konga ekwatho kumushiinda opo a teye po ekumba, notwe mu adha mo . . . Sho twa thiki koshipangelo, okwa tokelwa nale molwashoka okwa hulitha,” osho a popi ngaaka.
Christopher okwa fumvikwa uunambo, moKeetmanshoop.

OMAPOPYO OGENDJI GWOKUHINDWA

Omuvali gulwe, Pinah Colada, okwa popi kiikundaneki yopankalathano kutya omwana, ngoka hayi posikola oyo tuu ndjoka, naye okwa li a taambelwa moombete uule womasiku gatano sho kwa li a dhengwa.

“Mumwandje okwa li a thangwa konima inaa londodhwa. Kehe oshikando twa ya komukuluntusikola kombinga yoshiningwanima shoka, ohaya eta po owala omapuko ngoka omumwandje a ninga posikola monakuziwa, nonkene omanyenyeto getu ihaga taambiwa ko,” osho a popi ngaaka. Omukuluntu gwelongo ta kwathele moshitopolwa sha//Kharas, Jasmine Magerman, okwa popi kutya ombelewa ye inayi yakula nande olopota ya sha okuza komukuluntusikola kombinga yoshiningwanima shoka nonkene ita vulu okutya ko sha koshiningwanima shoka.

“Itatu vulu okuhwahwameka omapopyo ge li kiikundaneki yopankalathano, pakupopya iinima twaana omakankameno nenge uumbangi muyo. Ashike nando ongaaka, omahindo oshinima oshinene noshi na okukatukilwa onkatu mbala kaataleli yomiikandjolongo yetu osho wo okupitila maalongi yoshilongwa shonkalamwenyo opo ku yapukilwe onkalo ndjoka manga inaayi indjipala,” osho a popi ngaaka.

“Moshikako shotango, okwa li twa yakula iiningwanima itatu nokwa li twe yi yapukile,” osho Magerman a a popi ngaaka.

Omukuluntuwiliki muuministili welongo, uunkulungu nomithigululwakalo Sanet Steenkamp okwa popi kutya uuministili owa nongele oshiningwanima shoka nongashingeyi oshi li kohi yomakonakono.

“Omahindo moosikola omo ge li shili, notashi pumbwa elongelokumwe okuza koombinga adhihe,” osho a popi ngaaka.

Omupevikuluntu gwelongo moshimpungu shoopolohalama nekwashilipaleko lyongushu yiilonga moshitopolwa shaKhomas, Paulus Lewin, okwa popi kutya omahindo ogo shimwe shomomashongo omanene ngoka haga gumu aanona opo kaaya ninge nawa momailongo gawo.

“Uuministili owa yela koshinima shoka – ihawu shi popile nowana omudhingoloko gu na egameno nokuli nawa poosikola,” osho a popi ngaaka.