Namibia
This article was added by the user . TheWorldNews is not responsible for the content of the platform.

Mayola gwaMuthiya a kutha miilonga pakathimbo ookansela yoIPC

Mayola gwondolopa yaMuthiya, Johannes Neutepo, ngoka a kalela po ongundu yoSwapo, oshiwike sha zi ko okwa kutha miilonga pakathimbo ookansela yaali mboka ya kalela po ongundu yoIndependent Patriots for Change (IPC) melelo lyondolopa yawo.

Ookansela mboka oyo Nghipudilo ya Shiindi osho wo Moses Amukoto.

Mayola okwe ya kutha miilonga pakathimbo sho taku hokololwa ya kwatele komeho oshigongi “kaashi li paveta” naakalimo yomolukanda lwoombashu mOmuthiya sha ningwa momasiku 2 Juli.

Oshigongi shoka otaku hokololwa sha li tashi kundathana kombinga yomeya gaakalimo 300 molukanda ndoka ngoka ga tetwa ko kelelo lyondolopa molwashoka oye na oondjo [dhondolopa] dhoshimaliwa shooN$450 000.

Onzonkundaneki ndjika oya nongele kutya aakalimo mboka ohaya longitha owala opomba yimwe yomolukanda, nomeya gawo okwa li ga tetwa ko muJanuali numvo.

Momukanda gwekutho miilonga pakathimbo, ookansela oya lombwelwa kutya oya kuthwa miilonga uule womasiku 30 – tashi ningwa okuza momasiku 24 Juli sigo omomasiku 23 Auguste.

“Alikana ndhindhilika kutya ekutho miilonga ndika lyopakathimbo olyi li po omanga kwa tegelelwa eyamukulo okuza kUuministili wOondolopa nOmapendulopo gOkomikunda kombinga yekutho mo lyoye mombelewa,” osho Ndeutepo a shanga ngaaka mombapila.

Okwa gwedha po kutya konima sho edhiladhilo lyokukutha miilonga ookansela mboka yaali lya tulwa poshitaafula oshiwike sha landula shoka sha zi ko, ookansela mboka oya pewa ompito opo yi ipopile kutya omolwashike ya ningi etokolo kuyoyene okuninga oshigongi pwaana eziminino, ashike oya ndopa okugandja omatompelo.

Mayola okwa popi kutya pethimbo ndika ookansela mboka ya kuthwa miilonga pakathimbo, elelo lyondolopa otali hulitha po omauwanawa gawo ngoka haya mono komwedhi.

“Omanga wa kuthwa miilonga pakathimbo, owu na okugalula omaliko gondolopa [ngoka wa pewa], ngele owa pewa sha [shondolopa],” osho Neutepo a popi ngaaka.

Ya Shiindi okwa lombwele onzonkundaneki ndjika mEtitatu lya zi ko kutya oshigongi shelelo lyondolopa shoka sha ningwa, oshiwike sha landula shoka sha zi ko, inamu ningwa nande etokolo lyoku ya kutha miilonga pakathimbo.

“Esiku lyekutho lyetu miilonga kalya li nande lya tokolwa, ishewe oompango dha tulwa moombapila dhekutho miilonga pakathimbo ngaashi okukuthwa omauwanawa getu kadha li nande dha kundathanwa. Ayihe mbyoka omatokolo owala ga ningwa kuNdeutapo ye mwene pwaana iilyo yelelo lyondolopa,” osho a popi ngaaka.

Okwa gwedha po kutya ye okwa li owala a kuthwa miilonga pakathimbo pwaana ethimbo kutya osigo uunake a kuthwa miilonga. Okwa popi kutya ekutho miilonga ndyoka lyopakathimbo olyi li ompinge nomilandu dhomaihumbato gaaniilonga yomalelo goondolopa, nokwa popi kutya omilandu otadhi utha kutya elelo lyondolopa otali vulu owala okukutha miilonga oshilyo opo kaashi kuthe ombinga miigongi yelelo uule wethimbo inaali konda pomwedhi – ndele kaye na okukuthwa miilonga.

Ya Shiindi okwa popi kutya Ndeutepo okwa longitha pambambo oonkondo dhonkatu yuumayola sho e ya kutha miilonga pakathimbo.

“Pauyelele wa mayola, anuwa otwa ningi oshigongi kaashi li paveta (momasiku 2 Juli 2023) ashike onkene ngaa a zimine okuyapukila omakemo ngoka ga ningwa moshigongi shoka ta popi kutya kashi li paveta,” osho a popi ngaaka.

Okwa popi kutya Ndeutepo iha pulakene komayele ngoka ta lombwelwa.

“Ota lele oshikondo shepangelo ongomuntu ta wilike okandingosho ke, uukayamukulwa, ihawu vulu okukala melelo lyopamuhanga. Ishewe tse katushi uunona, kapu na ngoka e ya mo melelo lyondolopa konima yomiyelo. Atuhe otweya mo okupitila momisholondondo dhoongundu dhetu dhopapolitika naashoka otashi ti atuhe okwa li twa hogololwa paudemokoli opo tu ninge iilyo yelelo lyondolopa. Ashike nando ongaaka onkene Ndeutepo e wete a pitila momweelo gwi ili [gwa sheywa] sho e ya melelo lyondolopa,” osho Ya Shiindi a popi ngaaka.

Okwa popi kutya omumvo gwa zi ko okwa li a kuthwa miilonga pakathimbo sho a zi mokalungu kutya ke na einekelo miilonga yaNdeutepo. Okwa popi kutya uuleli waNdeutepo owokatongo nelelo lyondolopa yawo kali na elongelokumwe.

“Ndeutepo ota ndopa okulela, ye ishewe oku na mboka ehole. Mondolopa omu na etopoko apehe ishewe itandi shi mu pele uusama sho ta nyengwa okulela. Melelo, mboka ehole ohaya ningi shoka ya hala molwashoka ohaya iyutha komalombwelo ge. Omanga mboka keehole oye li mo taya mono iihuna nonkalo yiilonga kayi shi we ombwanawa kuyo,” osho a gwedha po ngaaka.