Namibia
This article was added by the user . TheWorldNews is not responsible for the content of the platform.

Nandi-Ndaitwah oye omuulikwahogololo gwopaupresitente gwoSwapo – Shaningwa

Omupevipresitente gwongundu yoSwapo Netumbo Nandi-Ndaitwah oye ta ka kala omuulikwahogololo gwongundu tayi pangele momahogololo gopaupresitente ngoka taga kala ko omumvo twa taalela, ndhoka odha kolekwa kuamushangandjayi gwongundu yoSwapo, Sophia Shaningwa.

“Kapu na shoka sha lunduluka,” osho a popi ngaaka.

Shaningwa ndhoka okwe dhi popi sha landula sho oshilyo shongundu megumbo lyopashigwana Jerry Ekandjo a shangele omupresitente gwoSwapo Hage Geingob te mu indile opo a tseyithe omutumba ngoka tagu ka ulika ngoka ta ka kalela po ongundu yawo momahogololo gopaupresitente.

Shaningwa okwa popi kutya keshi nande ngele opu na oompangela dha sha dhokuninga omutumba gwomahogololo ga nuninwa oku ulika omuulikwahogololo gopaupresitente gwongundu yawo, inaashi pitila mongundupitithi osho wo mokomitiye yongundumutima nolwanima shi gandjwe kuamushangandjayi.

Osha kala onkalondjigilile okuza mo2004 mongundu yoSwapo, sho ya kala hayi pitike ngoka omupevipresitente a ninge omuulikwahogololo gwongundu momahogololo gopaupresitente.

Oshiholelwa, ngoka a li omupevipresitente gwoSwapo mo2004, Hifikepunye Pohamba oye kwa li a ningi omuulikwahogololo momahogololo gopaupresitente, omanga Geingob naye okwa li a ningwa omuulikwahogololo gwopaupresitente mo2014 molwashoka oye kwa li omupevipresitente gwongundu.

Ashike nando ongaaka, otashi ulike kutya onkalondjigilile yoku ulika omupevipresitente gwongundu oye a ninge omuulikwahogololo gwongundu momahogololo gopaupresitente kayi li nande pakotampango lyongundu.

Ekandjo okwa popi kutya momutumba gwomahogololo goSwapo ngoka gwa ningwa omumvo gwa zi ko, inamu hogololwa ngoka ta ka kalela po ongundu yawo momahogololo gopaupresitente mo2024.

Momukanda ngoka a shengele Geingob ta indile opo ku ningwe omutumba gwokuhogolola noku ulika omuulikwahogololo gwongundu momahogololo go2024, Ekandjo okwa popi kutya mekotampango lyoSwapo omwa shangwa kutya “kehe oshilyo shongundu sha hala okukalela po ongundu ongomuulikwahogololo gopaupresitente okulela oshilongo shaNamiba oku na oku ulikwa nenge okuhogololwa momutumba”.

Okwa gwedha po kutya: “Omutumba gwomahogololo gwomo2022 inagu ulika nenge gu hogolole omuulikwahogololo ngoka ta ka kalela po ongundu yoSwapo momahogololo gopaupresitente osho wo gomutumba gwopashigwana ngoka taga ka kala ko mo2024.”

Ekandjo okwa li a ndopa okusindana momahogololo guupevipresitente wongundu yoSwapo, lwiikando itatu ya yooloka mbyoka a kutha ombinga okuza mo2012.

Inashi yela nee kutya sho ta kambadhala pu ningwe omutumba gwoku ulika nenge okuhogolola omuulikwahogololo gwongundu momahogololo gopaupresitente, ngele pamwe oye mwene a hala okukondjitha okupewa onkatu ndjoka nenge hasho.

Ekandjo okwa popi kutya oompango dhongundu tayi pangele odhi li ompinge nekotampango lyoSwapo.

“Oshinima shomahogololo kutya ngoka a hala okuninga omuulikwahogololo gwopaupresitente ashike keli (“maaleli yopombanda yane yongundu”) ita vulu okukutha ombinga mokuninga omupresitente, molwashoka otashi vulika she eta etopoko mongundu yoSwapo, kashi li nande pakotampango lyongundu,” sho a popi ngaaka.

Ekandjo okwi indile Geingob a tseyithe omutumba ngoka tagu ka tokola ngoka ta ka kalelapo ongundu yawo momahogololo gaayehe gopaupresitente mo2024.

“Onkene otashi pumbiwa pu ningwe omutumba omunene gwomahogololo mbala ngaashi tashi vulika opo ku hogololwe omuulikwahogololo gwoSwapo ngoka ta ka kalela po ongundu momahogololo gopaupresitente ngoka twa taalela mo2024 . . ,” osho Ekandjo a lombwele Geingob ngaaka.

Omunawino miikwapolitika Rekkel Andreas-Kayoko okwa popi kutya omutumba gwomahogololo ngoka taga pulwa kuEkandjo otagu ulike omananathano ge li mongundu.

“Opo ku indilwe ku ningwe omutumba gwomahogololo, otashi ti etokolo ndyoka olya ziminwa kaantu oyendji kakele kuJerry Ekandjo. Ota vulu okuninga eindilo ndyoka . . . ashike oshi li momake gelelo lyoSwapo li ninge etokolo ngele eindilo [lya Ekandjo] olyi li mondjila shi li opo ku ningwe omutumba gwomahogololo nenge pamwe shoka osha ningwa owala opo a ye moshipala omaipyakidhilo gongundu,” osho a popi ngaaka.

Nando ongaaka, Andreas-Kayoko okwa popi kutya kewete ehalo lyaEkandjo tali gwanithwa po kongundu yawo.