Namibia
This article was added by the user . TheWorldNews is not responsible for the content of the platform.

Okanona ka pumwa koshihauto nokuhulitha moKaribib

Omulumentu gwomimvo 29, ngoka ke ena omukanda gwokuhinga, okwa fadhukapo mbala konima sho taku hokololwa a lyata nokudhipaga okanona komumvo gumwe noshihauto sha ningilwa molukanda lwoombashu moKaribib, mEtitatu.

Omupopiliko gwopolisi yoshitopolwa shErongo Ileni Shapumba okwa koleke oshiningwanima shoka nokwa popi kutya nakusa okwa hololwa kutya oye Shikunda Daniël Munzimba, nokwa pumwa koshihauto mepandaanda lyi li popepi negumbo lyaandjawo.

Shapumba okwa popi kutya kanona ngoka okwe ehamekwa noonkondo naashoka oshe eta a hulithile pehala lyoshiningwanima.

“Okwa lopotwa kutya kamatyona ngoka okwa li nayina, ashike okwa kana po yina inee shi nongela naashoka oshe eta a ka pumwe koshihauto,” osho Shapumba a popi ngaaka, nokwa gwedha po kutya oshiningwanima shoka osha ningwa miipathi yeho.

Sha landula oshiningwanima shoka, omuhingi ngoka edhina lye itaali tumbulwa, otaku hokololwa a fadhukapo mbala ashike nando ongaaka, lwanima okwi ifala yemwene kopolisi.

“Omufekelwa okwa tulwa miipandeko nota tamanekelwa oshipotha shedhipago lyaashi lyoshiningilawina, okundopa okuthikameka oshihauto poshiponga, osho wo okuhinga oshihauto omanga ke ena omukanda gwokuhinga,” osho Shapumba a popi ngaaka.

Aapambele yanakusa oya tseyithilwa nale onkundana yoluhodhi.

Omakonakono gopolisi otaga pula komeho.

Pokati mpoka, omulumentu gwomimvo 22 okwa tulwa miipandeko momukunda Omalyadhila moshitopolwa shaMusati sho taku hokololwa a kwatonkonga okakadhona komimvo hamano sha ningwa mOsoondaha ya zi ko.

Komanda gwopolisi yoshitopolwa shaMusati, komufala Ismael Basson, okwa popi kutya omufekelwa okwa holoka nale mompangu yamangestrata gwOutapi oshiwike shika nokwa shunwa mondjeedhililo omanga taku ningwa omakonakono ga gwedhwa po.

Monkundana yilwe, omulumentu gwomimvo 47 omvalele yaAngola okwa tulwa miipandeko sho taku hokololwa a tsu noshiti nokuningila omatilitho geso ohondakadhona ye yomimvo 52 sha ningilwa momukunda Okasheshete moshikandjohogololo shaNesi, moshitopolwa shaMusati.

Omufekelwa otaku hokololwa a yambukile komukunda Oluwango moAngola nokwa tulwa nale miipandeko.

Okwa taalela oshipotha shedhengo nokweehameka osho wo shedhengo okupitila momatilitho.

Opolisi oya popi kutya omufekelwa okwa ningile owina sho a tsu nakuninga oshihakanwa noshiti montulo, nokwe mu ehameke.

Otaku hokololwa wo kutya okwe mu ningile omatilitho okutya ote mu dhipaga.

Omakonakono gopolisi moshiningwanima shoka otaga pula komeho.