Namibia
This article was added by the user . TheWorldNews is not responsible for the content of the platform.

‘Okwa li a hala okukothela pokati ketalashe nombete’

Meme Fenni Shigwedha okwa li a penduka mokati kuusiku komwanakadhona ta lili. Okwa popi kutya shoka okwe shi ningi molwashoka uutalala okwa li wa pitilila. Meme Shigwedha (50), ngoka hazi kolukanda lwoombashu lwaHavana mOvenduka, okwi idhidhimikile onkalo yuutalala wa mana oompanda ndjoka ya dhenge ombashu yawo, ongulohi yEtiyali.

Onkalo yombepo okwa li ya talala noonkondo kaaku na we, nomwana gwaShigwedha kali ta vulu oku shi idhidhimikila.

“Omumwandje okwa li a hala okulala pokati ketalashe nombete. Okwa li e wete kutya ngiika shoka otashi hwepopaleke onkalo, lwanima okwa pula opo a lale namumwayimati,” osho a popi ngaaka.

Mombashu yawo, elapi olyo ashike lya topola oondunda dhawo.

“Mumwandje ngoka gwomukadhona oku na omimvo 12, omanga mumwayinamati oku na omimvo 10. Ondihole taya lala ya topoka, ashike omolwuutalala, kandiwete kutya otandi ya kaleke ngiini mepupyu,” osho a popi ngaaka.

Shigwedha okwa popi kutya ombashu yawo ohayi kala ya talala noonkondo kongulohi, noye na owala omakumbatha omashona nongashingeyi oku na eikwato pomutima kombinga ya nkene ta hupitha oyana. “Otatu nana nondatu okumona omakumbatha osho wo iikulya.

Nena otatu ka lya omakunde ngoka ga zi kowambo. Omathimbo gamwe ohatu ka lala owala nondjala.

Kongulohi ohaku kala kwa talala noonkondo, nongula sho to penduka oho kala wa sa ondjala,” osho a popi ngaaka, omanga ta pilula mombiga yi na ekaka ndjoka yi li peziko.

Omusamane gwe, Shangano Hamupembe (59), ngoka ihaa longo, oha ningi omamate noongodhi dhooplastika ndhoka hadhi zi pomahala gomatungo.

“Olundji ohandi yi komahala hoka taku tungwa opo ndi toole nokugongela oongodhi ndhoka hadhi zi koondumba dhoondhopi.

Okwa li handi dhi mono oshali, ashike ngashingeyi ohaye dhi landitha ndje,” osho a popi ngaaka.

Tate Hamupembe okwa popi kutya omathimbo gamwe iha mono ookastoma dhomamate ge nonkene ohashi mu dhigupaleke opo a vule okutekula oyana 12.

Ethimbo lyokufu ohali dhigupaleke iinima.

“Ihandi zi naanona yandje ayehe, ashike molwashoka ongame he, ondi na oshimpwiyu shoku ya tumina sha omwedhi kehe. Otwa kala nale tatu nyengwa okwiilandela iikulya yetu yene, ngashingeyi otwa taalelwa konkugo yi na onkambe yompumbwe yomakumbatha, ishewe nosikola kayi li kokule nokutameka. Aanona mbaka oye li mompumbwe yoombindja. Onkalo oya dhigupala noonkondo,” osho a popi ngaaka.

Hamupembe okwa popi kutya ke na oshimaliwa shokulanda omakumbatha. Okwa popi kutya okwa hala epangelo li ya kwathe niilonga, ndele inali kala owala lya tala kokugandja iilonga kwaamboka ye na oonzapo. “Onda vulwa okunyenyeta. Otwa pumbwa iilonga – kutya nee oyokwoopaleka momapandaanda, okwoopaleka momalugumbo, okuninga oondhopi . . . ayihe mbyoka ote vulu oku yi longa. Epangelo lyetu kali na natse. Onkene handi longitha okatse koshilongo kepangelo lyaSouth Africa. Uuna wayi kombelewa yiikwameni, oho lombwelwa owala omahokololo ogendji,” osho a popi ngaaka. “Otatu si ondjala ishewe otatu dhengwa kuutalala, kapu na etegameno lya sha lyekwatho.”

Onkalo ndjoka yuutalala oya taalela oyendji. Molukanda lwaHavana, ompumbwe yomakumbatha niikulya oyi li uupyakadhi noshinima shesiku kehe, nomumvo kehe.

Omukalimo gulwe, Given Gariseb okwa popi kutya oya penduka kaaye na omeya uunambo molwashoka omeya gomopomba yawo okwashi ya ninga iikangwa omolwuutalala.

“Tse yamwe otu na omakumbatha, ashike ihashi kwathele sha. Otuli pokati koondundu nomilamba dhomeya, nohaku talala noonkondo huka,” osho a popi ngaaka. Oshiwike sha zi ko onzonkundaneki ndjika oya kundaneke kombinga yomukiintu gwedhina Hanlie Ses, ta lumbu nombuto yoHIV osho wo oTB, ashike oha lala i igonyena mekumbatha limwe noyana yaali aashona kongulohi, molwashoka kaye na omakumbadha ga gwana. “Owu na okukala wa huhulukwa opo wu dhenge po uutalala koonyala nokoompadhi, ngele hasho owu na okusa kuutalala molwashoka otu na owala ekumbatha limwe ndyoka inaali tu gwanena nawa,” osho a popi ngaaka.

Ses okwa popi kutya oku na etegameno lyokumona ekumbadha lya gwedhwa po – ineli pumbwa owala opo i hupithe konkalo ya talala noonkondo, ashike okukwathela opo kaa taandeleke oTB kaanona ye.

“Ondi na uumbanda noonkondo wokukwatitha aanona yandje [koTB], molwashoka oyi na omandhindhiliko omadhigu, ngoka ndi wete kutya otashi vulika aanona yandje kaya ke ga vule,” osho a popi ngaaka.

Ses, gumwe gomaakalimo yomOvenduka mboka kaaye na omalukalwa nohazi pokapale ketanga kaKhomasdal mpoka pu na ootenda dhaamboka kaaye na mpoka taya vulu okuza.

Omumvo gwa zi ko pethimbo ndika, omulumentu gwomomapandaanda gwedhina ‘Pele Pele’, okwi itsuwika a hulitha mepandaanda lyaRobert Mugabe Avenue mOvenduka sho taku fekelwa kutya okwa hulitha konkalo ya talala.

“Kanda li naye, ashike ondishi shi lela kutya okwa faalelwa kuutalala,” osho kuume ka Pele, a lombwele onzonkundaneki ndjika ngaaka pethimbo ndyoka.

Nakusa Pele okwa li ha lala iisikila epakete.

ONKALO YA TALALA

Pokati mpoka, aakalimo yomoLüderitz nomoAus moshitopolwa sha//Kharas oya kala monkalo yombepo ya talala noonkondo ndjoka nokuli ya nika iikangwa muule womasiku gane ga zi ko, nombepo ndjoka ya talala tayi kumitha otaku tegenekwa tayi zi koCape Town shaSouth Africa.

Ondolopa yaLüderitz okwa li nokuli ya lokwa muule womasiku gaali oshiwike shika.

Pauyelele wombelewa yetengeneko lyonkalo yombepo moshilongo, omvula tayi loko mokufu numvo oya tegelelwa miitopolwa yokuumbugantu woshilongo.

Ombelewantengeneki yonkalo yombepo okwa li wo ya gandja elondodho kaaniimuna osho wo kaanamapya miitopolwa yokuumbugantu, osho wo mondingandinga-uuzilo yoshilongo kutya omwa tegelelwa onkalo yombepo ya talala noonkondo.