Namibia
This article was added by the user . TheWorldNews is not responsible for the content of the platform.

Omukandanyenyeto gwehulitho po lyokudhipaga oombwa

Edhipago lyombwa yedhina Dalton moRehoboth omwedhi gwa zi ko, olya hwahwameke oshigwana she etepo omukandanyenyeto gwehulitho po lyokudhipaga oombwa, ngoka ngashingeyi gwa shainwa kaantu ya konda po4 000.

Omukandanyenyeto ngoka otagu indile ku taambwe ko kutya uuthemba wiinamwenyo mwa kwatelwa oombwa, owa pumbwa okugamenenwa po paveta molwashoka nayo oyi na omaiyuvo gawo.

Hahende Ronel Lewies, ngoka oye a shanga omukandanyenyeto ngoka, okwi indile opo efatululo lyoshitya ‘onkalamwenyo’ mOkatendo 6 mEkotampango lyaNamibia li kale lya kwatela mo iinamwenyo.

“Otatu indile opo uuthemba wonkalamwenyo yiinamwenyo wu kale wa ngambekwa opo ku shilipalekwe kutya onkalonawa [yiinamwenyo] oya simanekwa kaantu,” osho omukanda gwa shangwa ngaaka.

Dalton, ngoka kwa li a kana momasiku 8 Juni otaku hokololwa a li a yakwa po nokudhipagwa po pehala lyontumba hali dhipagwa nokulandithwa okapana koombwa moRehoboth.

Mwene gwombwa, Mavourneen Busch, okwa li a tameke okukonga ombwa ye ndjoka nokwa li i itsu mombwa ye pokapana ya dhipagwa po nale – omutse gwombwa ngoka gwa adhika popepi ogwo gwe eta a dhimbulule ombwe ye.

Shoka okwa li she eta aafekelwa yaali, Ricardo Kastoor naTeodor Itembu, ya tulwe miipandeko taya tamanekelwa uufuthi nemonitho lyiihuna lyoshinamwenyo.

Aafekelwa mboka oya holoka nale mompangu yamangestrata gwaRehoboth noya tindilwa oboloha.

Oshipotha shawo oshu undulilwa komasiku 31 Juli.

Omupopiliko gUuministili wUunamapya nUuniimuna, Omeya nEtendululo lyEvi Jona Musheko okwa popi tati: “Ihatu popile omahepeko giinamwenyo. Kombinga yoshiningwanima shaDalton, opu na omahangano hoka haku falwa iinamwenyo mbyoka ya kana opo yi monike kooyene, nonkene inayi pumbwa okudhipagwa.”

Society for the Prevention of Cruelty to Animals (SPCA) limwe lyomahangano gokugamenena po iinamwenyo ndyoka hali taamba wo iinamwenyo mbyoka ya kana.