Namibia
This article was added by the user . TheWorldNews is not responsible for the content of the platform.

Omukiintu a hupu methindakano lyopamadhiladhilo

Muuyuni muka mu na oonkalo ndhoka hadhi vulu okugwilila po aantu, yamwe ohaya nyengwa komadhiladhilo gokukandula po omaupyakadhi gopamadhiladhilo ngoka ge ya taalela.

Gumwe gwomwaamboka ye enda mondjila ndjoka, omeme Catherine Nanghama (47).

Meme Nanghama okwa popi kutya ethindakano lyopamadhiladhilo okwa li lye mu kwata omimvo dha piti, okuza pomimvo 21. Okwa hokolola kutya okwa kala a halelela okwi ikutha omwenyo.

Okwa popi kutya monakuziwa okwa li a ningi onkambadhala yokwiikutha omwenyo lwiikando itatu ya yooloka. “Uupyakadhi wethindakano lyopamadhiladhilo otandi wu tongonona ongoshinima shi na sha nomadhiladhilo, molwashoka okwa li owala hashi adha ndje momutse gwandje.

Okwa li handi dhiladhila uuwinayi olundji, nokwa li handi iyadha monkalo ombwinayi pamadhiladhilo, monkalamwenyo yandje.
Okwa li nda dhiladhila okwi ikutha omwenyo lwiikando oyindji itaandi vulu oku yi yalula,” osho a popi ngaaka.

Nanghama, ngoka e li mondjokana yoomvula heyali ngashingeyi, okwa popi petameko kali e wete ta hupu.

“Ethimbo lyokongulohi olyo kwa li hali kala edhigu unene noonkondo, molwashoka pethimbo ndyoka opo handi kala tandi dhiladhila olundji iinima iiwinayi,” osho a popi ngaaka.

“Aakwanezimo yandje oya kala aluhe haya yambidhidha ndje uuna ndi li monkalo ndjoka.

Okwa li ya kwathele ndje okumona ehungomwenyo, ashike nando ongaaka pethimbo ndyoka ehungomwenyo kalya li naanaa tali kwathele ndje.”

Nanghama okwa popi kutya ina hala nande shoka e ende musho shi ningilwe omuntu gulwe.
Ngoka a koleke kutya Nanghama okwa li shili a ningi oonkambadhala dhokwiikutha omwenyo, omusita gwegongalo lyedhina Assemblies of God, Jonathan Haufiku (60), ngoka a li he mu kwathele oku mu guna opo a dhenge po uupyakadhi we wethindakano lyopamadhiladhilo.

“Okwa li a lombwelwa kaakwanezimo ye opo ye eye kongeleka yetu nokwe ya kungame muJanuali numvo noku hokololela ndje ehokololo lye notwa tameke oku mu hunga omwenyo,” osho omusita Haufiku a popi ngaaka.

OKUKONGA EKWATHO, NOKUKALA NETEGAMENO

Pauyelele wa gandjwa komunawino gwiipambele yopamadhiladhilo, omuhungimwenyo Shaun Whittaker, okwa popi kutya ethindakano lyopamadhiladhilo olyo uuwehame mboka hawu kwata aantu oyendji poompito dhimwe moonkalamwenyo dhawo.

“Aantu naye shi tseye kutya ethindakano lyopamadhiladhilo ihali thigululwa mezimo. Onda kala omunawino gwiipambele yopamadhiladhilo uule woomvula 30, nondi shi kutya ethindakano lyopamadhiladhilo oli na sha nomaiyuvo ga yooloka momuntu, unene omaiyuvo guuwinayi nongeyo,” osho a popi ngaaka.

Whittaker okwa popi kutya ethindakano lyopamadhiladhilo otali vulu wo okwe etwa kiinima ya yooloka, mwa kwatelwa ehulitho po lyomakwatathano gopaihole, ekanitho lyiilonga nenge eso.

“Endhindhiliko enene lyethindakano lyopamadhiladhilo okukanitha ehalo lyokukotha. Omuntu kehe okwa pumbwa okukotha ando oowili hetatu muule woowili 24, molwashoka okukotha oshi li oshipumbiwa sholutu,” osho a popi ngaaka.

“Aantu mboka ya kwatwa kethindakano lyopamadhiladhilo oya pumbwa okupopya kombinga yomaiyuvo gawo peha lyokukala ye shi mwenena, molwashoka shoka ohashi kwathele opo ya mone ekandulopo lyuupyakadhi osho wo ku monike kutya uupyakadhi ye na owu li peni,” osho a popi ngaaka.

EKWATHO

Nonande nethindakano lyopamadhiladhilo, Nanghama okwa popi kutya okwa mono oonkondo dhoku ka konga ekwatho. Okwa hokolola kutya okwa dhimbulula kutya ita vulu okukondjitha uupyakadhi we kuyemwene oye awike, nonkene okwa ka konga ekwatho kaapopepi ye.

“Onda mono kutya itandi kala we ndili ngeika, nonda mono kutya osha pumbwa elunduluko opo ndi kale nonkalamwenyo yi li nawa ngaashi shi na okukala. Ombili oye ya po, ndele kashi shi owala mokugunwa ashike nomokulesha ombimbeli,” osho a popi ngaaka.

Omusamane gwaNanghama, Likius okwa popi kutya onkalo yomukulukadhi gwe okwa li tayi limbilike noonkondo. Okwa popi kutya ota dhimbulukwa oshikando shimwe sho omukulukadhi gwe kwa li a nu oopela epitililo nelalakano lyokwi ikutha omwenyo.

“Okwa li a kala nonkalo yokunwa omiti, ashike nena otu uvite nawa oku li nawa, nongashingeyi nokuli ota vulu okuhunga omwenyo aantu yalwe mboka ye li monkalo ndjoka [yethindakano lyopamadhiladhilo],” osho Likius a popi ngaaka.