Namibia
This article was added by the user . TheWorldNews is not responsible for the content of the platform.

Onyama yombwa oyi holike noonkondo monooli

Meme Aune Thomas okwa hokolola kutya oha dhipaga oombwa dhi po20 oshiwike kehe opo a vule okulanditha onyama yombwa ndjoka yi holike noonkondo “omolwuutoye”, unene tuu pomatala gaMuthiya mpoka ha landithile. Okwa popi kutya onyama yombwa oyi holike noonkondo nonande ohayi kala ya pumba.

“Onyama yombwa oyi holike noonkondo monooli molwashoka ontoye. Molwashoka oyi holike nohayi hakanwa po, ohayi kala yi na ondilo . . . Ohayi landwa lela nawa,” osho Thomas a popi ngaaka.

Okwa popi kutya iiyemo mbyoka ha mono mokulanditha onyama yombwa ohayi mu kwathele mokuyambidhidha aanona ye uuna taya yi koosikola.

Aalandithi yopomatala ngaashi meme Thomas olundji ohaya ende oondjila oonde okuya momikunda taya kongo mboka taya landitha po oombwa dhawo opo a ka ninge okapana ke.

“Ombwa onene ohayi landithwa kooN$500, ashike nando ongaaka ohashi ikwatelele wo kuunene nokoshiviha shawo,” osho omulandithi gumwe a popi ngaaka.

ON THE MENU … Various vendors selling dog meat say their customers regard it as a nutritious delicacy despite a recent campaign calling for an end to eating ‘man’s best friend’.

Onzonkundaneki ndjika oya mono wo nkene omahala ogendji momatala gaMuthiya moshitopolwa shaShikoto osho wo momatala gaShakati moshitopolwa shaShana taga landithwa onyama yombwa.

Ashike nande omasiku ngaka ehokololo lyonyama yombwa hayi liwa otali dhana onkandangala moshilongo moka yamwe taya indile opo epangelo lyi indike onyama yombwa kaayi liwe we, onkene aaholi yonyama yombwa taye yi tyapula pomatala kaaye na konasha.

Eindilo opo ombwa kaayi liwe we olya hwahwamekwa koshiningwanima sha ningwa moRehoboth omwedhi gwa zi ko, sho ombwa yedhina Dalton ya yakwa po nokudhipagwa po noya ningwa po okapana pehala lya tseyika nawa hali landithwa onyama yombwa mondolopa ndjoka.

OMBWA NAYI LIWE NENGE INAYI LIWA

Ehangano ndyoka lya totwa po nelalakano lyokuhwahwameka opo okulya ombwa ku hulithwe po lyedhina Justice for Animals Trust olya tula omambolota omanene moondolopa ngaashi mOvenduka, mOndangwa osho wo mOngwediva ga thanekwa ombwa ndjoka yedhina Dalton netumwalaka lyi li ompinge nokulya oombwa.

“Shoka katu na nasho,” osho omuholi gwonyama yombwa a popi ngaaka kombinga yomambolota ngoka ga dhikwa mondolopa yawo monooli.

Komalungula oku na wo omukandanyenyeto ngoka gu li ompinge noombwa tadhi liwa, nogwa shainwa kaantu ya konda po7 500 mboka taya popile opo oshinima shoombwa tadhi liwa shi hulithwe po.

Dalton, oholikembwa yomukalimo gwomoRehoboth, meme Mavourneen Busch, ndjoka kwa li ya kana okuza maandajawo momasiku 8 Juni.

Konima yaashoka meme Busch okwa li a tameke nolukongo lwombwa ye okupitila kiikundaneki yopankalathano nolwanima okwa tokola a landule omapandaanda nomagumbo ta kongo ombwa ye, ashike okwe ki itsa moshinima shoka she mu kumitha noshe mu uvitha nayi noonkondo shombwa ye yi li kondhalate yokapana.

Okwa hokolola kutya pethimbo ta kongo ombwa ye okwa talelepo wo ehala lyontumba ndyoka li shiwike nawa hali landithwa onyama yombwa nokwa adha po okapana kombwa, lwanima sho a konakona okwi itsu momutse gwombwa ye shoka she eta a tseye kutya ombwa ye oya dhipagwa po nokuningwa po okapana.

Shoka oshe eta aafekelwa yaali Ricardo Kastoor naTeodor Itembu ya tulwe miipandeko nokupatululilwa oshipotha sheyako lyombwa osho wo ehepeko lyiinamwenyo mekwatathano nombwa ndjoka Dalton. Meme Thomas ngoka ha landitha onyama yombwa mOmuthiya okwa popi kutya omathimbo gamwe oha kola oombwa nelalakano lyoku dhi dhipaga a landithe onyama uuna dha koko.

“Tse ihatu yaka nenge tu dhipage ombwa yomuntu pwaana eptikilo, molwashoka ngaaka owa yaka, nondiwete kutya shoka otashi vulu okukumangitha po molwashoka owa yona. Aluhe oombwa dhetu ohatu dhi landa kooyene. Ihatu yaka nande oombwa dhaantu opo tudhi ninge po okapana molwashoka ngaaka osha puka,” osho a popi ngaaka.

Lukas Shilongo gwomOshakati, ngoka ehole onyama yombwa, okwa popi kutya oombwa iinamwenyo mbyoka ya simana noonkondo momudhigululwakalo gwAawambo, noya talika ko ongookuume nenge aapambele momagumbo.

Ashike nando ongaaka, onkene hayi liwa molwashoka “ontoye noonkondo yo oyi na iitungithi,” osho a popi ngaaka.

“Oombwa otudhi na momagumbo getu ongaagameni yetu, ashike uuna ya thiki ponkatu yontumba, ohatu yi dhipaga noku yi lya po. Aantu oyendji oye yi hole, ashike opu na ngaa mboka ihaaye yi li,” osho a popi ngaaka.

Omulandithi gwonyama yombwa momatala gaShakati, meme Maria Stephanus okwa popi kutya ke wete sha pumbiwa opo ku hulithwe po okulya onyama yombwa. “Omuntu ito vulu okudhipaga oshiyamakuti, molwashoka osha nika oshiponga, nokumuna iiyamakuti oshidhigu, ashike oombwa otudhi na odhindji. Uuna dha vala, ohadhi kala nuumbwena owundji. Etompelo lyopaveta ndyoka tali gandjwa kwaamboka inaaya hala oombwa dhi liwe we, oli ni?” osho a popi ngaaka.

Phillip Muneguni, ngoka a popi kutya onyama yombwa oku yi hole noonkondo, okwa ti ye kapu na ngoka temu kutha onyama yombwa.

“Oombwa ookuume ketu notu dhi hole ngaashi naanaa dhi holike koyendji ongiinamwenyo yomomagumbo. Ashike, omolwashike tu na okulombwelwa shoka tu na okulya naashoka kaatu na okulya? Yamwe ohaya li oondoongi, uulimba noongandu, ashike ito adha nande tatu indile opo ya hulithe po okulya iinima yawo medhina kutya ihatu yi li. Okulya onyama yombwa inashi pumbwa nokuli okuningwa oshikundathwana, tse otuli moshilongo shi na uudemokoli,” osho a popi ngaaka.

OMBWA KAYI SHI IIKULYA

Pokati mpoka, omukuluntuwiliki gwehangano lyokugamenena po iinamwenyo lyedhina Prevention of Cruelty to Animals (SPCA), Sylvia Breiteinstein, okwa holola okwaauvanawa kombinga yoshinima tashi ehameke shoombwa hadhi dhipagwa nokuningwa po uupana.

Pethimbo ta popi koradio yoDesert oshiwike sha zi ko, okwa popi kutya ehangano lyo-SPCA kali na uupyakadhi waantu haya li oombwa, ashike oye wete sha puka okudhipaga oshinamwenyo nelalakano lyoku shi lya po.

“Itatu vulu okutya ino lya ongombe, nenge ino lya ombwa. Ashike otwa hala iinamwenyo yi ihumbatelwe pamukalo gu li nawa. Okuyaka oshinamwenyo shomuntu ngaaka osha fa uukongo waali paveta – nonkene shoka eyako.

“Oshinima oshikwawo, unene tuu kombinga yoshikumungu shaDalton, ooshoka kutya ombwa inayi liwa po ongoshinima sha halika. Ombwa ndjoka oya telekwa po kaantu noku yi landitha po. Onkene, oku shi tala pamukalo ngoka, ngaaka oshinima sha puka lela,” osho a popi ngaaka.

Omunawino miipambele yaaniilonga Herbert Jauch okwa popi kutya omambolota ngoka ga dhikwa po ge li ompinge nokulya onyama yombwa osha ningwa inaaku taliwa kombinga yomithigululwakalo dha yooloka kombinga yoombwa. Ashike nando ongaaka okwa popi kutya okutala kutya aantu oyendji oye li moluhepo notaya dhengwa kondjala, ompito onene opo yi li onyama yombwa osho wo yuumbishi yi kale yi holike.

“Shoka otandi shi popi molwashoka oshiwike shika monzonkundaneki yoThe Namibian omwa li ehokololo kombinga yongongahangano yuukumwe moshimpungu shiikulya nuunamapya [United Nations Food and Agricultural Organisation] ndyoka lya popi kutya Aanamibia oya kala taya li iikulya kaayi na iitungithi ya gwana muule woomvula mbali dha piti. Onkene otuli muupyakadhi uunene wondjala, ishewe efatululo lyepangelo kombinag yondjala olya dhigupaleka onkalo. Ngele shoka inashi yapukilwa, nena oto ka adha onkalo moshilongo yaantu taya li kehe shoka taya itsu,” osho a popi ngaaka.