Namibia
This article was added by the user . TheWorldNews is not responsible for the content of the platform.

Ookompiyuta dhopeke 115 dhoECN onkene dha kana

Okomisi yomahogololo moshilongo yedhina Electoral Commission of Namibia (ECN) oya koleke kutya ookompiyuta dhopeke 115 dhomookompiyuta dhopeke 117 ndhoka dha yakwa moombonge dhawo oonene mOvenduka onkene inaadhi monika.

Oshikwawo ooshoka kutya kapu na ngoka a tulwa miipandeko mekwatathano noshipotha shoka sigo oompaka.

Ehangano ndyoka lyoECN olyo hali kwatele komeho omaunganeko gomahogololo moshilongo, nokwa li ya kanitha ookompiyuta ndhoka dhopeke 117 okuza momwaalu gwookompiyuta dhopeke 137 ndhoka ye na, sha ningwa pokati kaNovemba 2020 naJanuali numvo – omwedhi ngoka ya dhimbulula kutya opu na ookompiyuta dhopeke dha kana.

Mbali dhomookompiyuta ndhoka tadhi kongwa okwa li dhi itsuwika mompungulilo yawo moombonge oonene dhoECN, iiwike ya piti.

Omupopiliko gwoECN, De Wet Siluka okwa lombwele onzonkundaneki ndjika oshiwike shika kutya okomisi onkene yi na etegameno kutya otashi ka yela okumona kutya ekano lyookompiyuta ndhoka olye ende ngiini.

Ashike nando ongaaka, okwa tindi okugandja uuyelele womuule, netompelo kutya oshikumungu shoka onkene shi li kohi yomakonakono.

Okwa gwedha po kutya okomisi oya tameka nale nomakonakono gomeni kombinga yaanambelewa mboka taya fekelwa olunyala, nokuli oya kuthwa nale miilonga pakathimbo.

“Otwi inekela kutya ota pu ka za uuyelele. Onkene, otwa hala oveta yi longe iilonga yawo. Sho osho nee kutya oECN itayi vulu okutya ko sha yoyene koshinima shoka. O-ECN itayi ka longitha nande yimwe yomookompiyuta ndhoka dha kana momahogololo gOmutumba gwoPashigwana nogoPaupresitente mo2024/25 [ngele odha monika]. Ishewe itadhi ka longithwa nande momahogololo gopaitopolwa nomalelo goondolopa nenge momahogololo goludhi kehe,” osho a popi ngaaka.

Omupopiliko gwopolisi moshilongo, omupevimomufala Kauna Shikwambi okwa lombwele onzonkundaneki ndjika uunambo kutya opolisi oyi ipyakidhila nomakonakono, ashike nando ongaaka kapu na ngoka a tulwa miipandeko sigo oompaka.

Ngaashi naanaa omukuluntuwiliki gwoECN, Theo Mujoro kwa li a yamukula muJanuali numvo, Siluka naye okwa tindi okutya ko sha kombinga yongushu yookompiyuta ndhoka dhopeke dha yakwa po.

MuJanuali, onzonkundaneki ndjika oya pula Mujoro kutya ongushu yookompiyuta ndhoka dha yakwa po oyi li pwiingapi, ashike okwa yamukula tati: “O-ECN oyi wete kutya oshiningwanima shoka oshe eta eikwato pomutima notashi pumbwa okuyapukilwa mbala, nonkene otayi kala nokutseyithila aakuthimbinga yomahogololo noshigwana kombinga yaashoka tashi holoka po kombinga yoshikumungu shoka.”

Mujoro okwa popi kutya kapu na uuyelele wawo mboka wa gamenwa wa yiwa oonyala ongoshizemo sheyako lyookompiyuta ndhoka dha yakwa po.

Petameko lyomwedhi nguka, ongundu yompilameno yoLandless People’s Movement (LPM) oya popi kutya oya tseyithilwa kutya ookompiyuta dhopeke mbali dhomookompiyuta 117 ndhoka dha kana, odha monika. Oshilyo shongundu yoLMP, Ivan Skrywer okwa shangele Mujoro ombapila ta pula uuyelele kombinga yookompiyuta ndhoka mbali taku fofodholwa dha monika momasiku 8 Mei.

“Ngele omapopyo ngoka oge na uushili, omolwashike, aakuthimbinga momahogololo, ngaashi oongundu dhopapolitika, inaaya tseyithilwa oshinima oshoka?” osho Skywer a popi ngaaka.

Skywer, ngoka wo oye kansela gwoLPM melelo lyondolopa yoshilandapangelo, okwa hokolola kutya momasiku 13 Juni okwa shangele ombelewa yaMujoro ta pula omayamukulo osho wo oku uva ngele opu na uushili kombinga yehokololo lyookompiyuta mbali dhopeke ndhoka taku hokololwa dha monika.

“Otatu koleke kutya ookompiyuta mbali dhopeke dhomookompiyuta 117 [ndhoka dha kana] odha monika nodha adhika mompungulilo yoECN moombonge oonene [mOvenduka]. Omunambelewakonakoni okwa tseyithwa lela emoniko lyookompiyuta ndhoka,” osho Mujoro a yamukula ngaaka pambapila ndjoka a tumine Skywer momasiku 15 Juni.

Petameko lyomvula ndjika, ongundu yompilameno yo-Independent Patriots for Change (IPC) oya popi kutya oECN otayi idhimbike eindilo opo ku ningwe oshigongi shokukundathana kombinga yekano lyookompiyuta dhopeke 117.

Hasho oshikando shotango okomisi yomahogololo tayi kanitha iilongitho yawo yomahogololo. Mo2017, okomisi okwa li ya gandja omashina gane gomahogololo opo ga ka longithwe pomahogololo gewawa lyaakokele mongundu yoSwapo, ashike ongundu tayi pangele oya galula owala eshina limwe.

Lwanima, ngoka a li minista guuyuuki Sacky Shanghala, okwa gandja uuyelele kutya omashina ngoka gokuhogolola oga kana omanga ge li momake gongundu yoSwapo, noga kana konima “sho ga gu mokatemba” pethimbo ga li mondjila yokufalwa.

Lwanima omashina gaali oga toolwa moKatutura konima sho onzonkundaneki ndjika ye eta puuyelele ehokololo kombinga yomashina gomahogololo ga kana.