Namibia
This article was added by the user . TheWorldNews is not responsible for the content of the platform.

Oshituthi shegandjo lyoonzapo otashi dhengele – I-Care

Oshiputudhilo shelongo lyuupangi shedhina I-Care Health Training Institute osha gandja elondodho kutya aailongi yaapangi mboka itaaya holoka poshituthi shegandjo lyoonzapo itaya pewa oonzapo dhawo nenge otashi vulika ya kuthwe mo moshiputudhilo.

Oshitudhi shoka otaku hokololwa sha thanekwa okuningilwa mOvenduka momasiku 14 Juli, naailongi ayehe mboka ya li haya sikola kiitayi ya yooloka moshilongo oya tegelelwa ya holoke.

Oshikondo shoka oshi na iitayi mondoolopa ngaashi mOvenduka, moSwakopo, mOndangwa nomoKarasburg.
Etokolo ndyoka inali nyanyukilwa kaailongi nokaavali yamwe, mboka ye wete kutya inashi simana okuwaimina oshituthi shoka molwashoka otashi ka kutha moondjato dhawo sho taya fala aanona yawo kOvenduka, ishewe oye wete tashi kala nawa ngele aailongi oya pewa oonzapo dhawo kutya nee inaya holoka koshituthi shoka ngaashi hashi ningwa kiiputudhilo yelongo yilwe.

Metumwalaka ndyoka lya monika konzonkudaneki ndjika nokwa li lya tuminwa aailongi okuza komukuluntu gwoshiputudhilo shoka, Johannes George, okwa popi kutya otashi dhengele okuholoka koshituthi shoka.
“Ngele owa ndopa okuholoka nena otashi ti ito pewa onzapo yoye, notashi ka kala oshidhigu opo wu tsikile mokutaambwa muulongelwe wuupangi,” osho a popi ngaaka.

Opo aailongi ya pewe oonzapo dhawo oye na okufuta oN$3 000, mwa kwatelwa eguwo lyawo nenge ya fute ooN$2 200, mwa kwatelwa eguwo ndyoka taya thitha.
Esiku lya hugunina lyokufuta olya piti oshiwike sha zi ko.
George okwa yelitha kutya uuyelele kombinga yoompango dhegandjo lyoonzapo moI-Care okwa li dha yelithwa nawa pethimbo aailongi ya taambwa moshiputudhilo.

Okwa popi kutya osikola oya gandja nale iizemo yaapangi kolaata yaapangi moshilongo yedhina Nursing Council of Namibia, ashike oI-Care otashi vulika yi ka tindile oonzapo ndhoka kaadhi gandjwe kaailongo uuna otashi pumbiwa.
“Alikana ndhindhilika kutya aailongi mboka taya tokola okukala inaaya holoka koshituthi mosikola otaya tendwa mo. Nonkene ngaaka ito vulu we okwiishangitha oshikako sha landula ko. Onkene shoka natu shi yeleke. Inatu ningila iinima owina, molwashoka omwa tseyithilwa nale opo mu ninge omalongekidho taga pumbiwa,” osho George a popi ngaaka.

Ashike nando ongaaka, aailongi oya holola okwaauvanawa noya popi kutya kaye wete shi li pauyuuki opo okuholoka koshituthi ku kale taku dhengele, molwashoka oya longitha nale oshimaliwa shi li pooN$15 000 okumana onkatu yeilongo lyawo.
Oyi indile oshiputudhilo shoka shi talulule nawa etokolo ndyoka.
“Kayeshi aantu ayehe taya vulu ofuto ndjoka yooN$3 000, notwa pumbwa lela okutsikila nelongo lyetu,” osho omwiilongi gumwe a popi ngaaka.

“Katu shi kutya omolwashike ya ningi okuholoka koshituthi ku kale taku dhengele, molwashoka iokuholoka koshituthi we pewe onzapo itaku ti kutya oto mono iilonga mbala,” osho mwiilongi gulwe a popi ngaaka.
Omuleli gwolutu lwaakalelipo yaailongi moI-Care Queendeline Kasanapi oshiwike sha zi ko okwa popi kutya omakemo gaailongi oku ga shi.

“Inaya lombwela ndje natango pambelewa kombinga yomakemo,” osho a popi ngaaka.
George, sho a kwatathanwa naye oshiwike shika opo a tye ko sha, okwa pula tati: “Otwi ipula kutya oshiputudhilo shika otashi lelwa pwaana omilandu dhelelo? Ngoye nee shi wu shi, iituthi yomagandjo goonzapo ohayi ningwa inaapu futwa sha, okuza mondjato yoshiputudhilo nenge yaailongi mboka taya pewa oonzapo?”
Olaata yaapangi moshilongo inayi yamukula pethimbo oshifonkundaneki shika sha tuminwa koshinyanyangidho, uunambo.