Pago Pago - AMERIKA SAMOA
Talu mai lava le ulua’i taimi na amata faamalosia ai e le malo tagata uma o le atunu’u e fa’aaoga le tali fofoga (face mask) e puipuia ai le atunu’u mai le pipisi o le fa’ama’i o le KOVITI-19, ua maitauina pea le avea lea ma faafitauli i nisi o Faleoloa i le atunu’u nisi o tagata fa’atau e le manana’o e fa’aaoga le ‘face mask’ i taimi e ulufale ai i totonu o Faleoloa mo fa’atauga.
O le tula’i mai ai o lenei fa’afitauli, ua talosagaina ai e nisi o Pule o Faleoloa Asia i le atunu’u le malo ina ia faatulaga ni faasalaga e faasala ai tagata e le usita’i i le tulafono, ma faa faigofie ai loa i le aufai pisinisi ona fa’atino la latou galuega i aso taitasi, o le tautuaina lea o le atunu’u.
Talu mai le vaiaso na te’a nei na tuuina mai ai le poloaiga toe faamanatu a le afioga i le ali’i Kovana ia Lemanu Peleli Palepoi Sialega Mauga i le faamaonia ai lea o le pipisi o le faama’i i vaega eseese o le atunu’u, ma le faamalosia lea o le faaaoga o le face mask e tagata uma i soo se nofoaga faitele, o lo o maitauina pea e le Samoa News nisi o le atunu’u latou te le o usitaia lea poloaiga faalaua’itele.
E le gata i tagata faatau i nisi o Faleoloa, ae faapea fo’i i tagata feoa’i i luga o le alatele ma luga o pasi la’u pasese. E oo lava foi i nisi o ave ta’avale, latou te le o usitaia le poloaiga faalaua’itele.
Na taua e se alii i le Samoa News lona vaaia o tagata e silia i le to’a 2 o feoa’i i totonu o se tasi o Faleoloa i le itu i Tafuna i le vaiaso nei e leai ni a laua face mask sa faia.
“E le popole nei tagata i le saogalemu o tagata uma o le atunu’u aemaise ai i laua. E le faapea e fai le mea e loto i ai le tagata, ae o le puipuiga o tagata uma e sili ona taua, aua e sili lava le puipuia i lo le tau togafitia,” o le tala lea a lea ali’i i le Samoa News.
Sa mafai ona fesiligia e le Samoa News nisi o tagata faigaluega ma latou Taitai i nisi o Faleoloa e tusa ai o le faafitauli o le le usitaia lea e nisi o tagata faatau o le poloaiga mo le faaaogaina o le face mask.
Na taua e se tagata faigaluega mai le Lin Store i Pago Pago, e i ai lava tagata faatau e ulufale atu i totonu o le Faleoloa e aunoa ma ni face mask, ae a faatonu atu e toe fo’i i fafo e aumai sana face mask, ae ita ma fa’aali le le fiafia.
“Sa i ai se alii pe a ma le 30 tausaga na asu i le aso Gafua e fai lana faatau ae leai se face mask. Na ou fiu e taofi ae savali mai lava i totonu ma savali sa’o i le pusaaisa i tua ma uu mai ai apa inu, ona savali mai lea ma totogi lana fa’atau. Ina ua sauni e toe fo’i atu i fafo, sa ia faapea mai, e le o oe o se Leoleo e te fesiligia ai la’u face mask,” o le faamatalaga lea a le tagata faigaluega.
Na taua e se tasi o Taitai o le Faleoloa o le Manu’a Store i Lepuapua le taua tele o le tausisia e tagata uma o le poloaiga e faaaoga ai face masks i soo se taimi e ulufale ai i totonu o soo se nofoaga faitele e aofia ai ma Faleoloa.
Sa ia taua e faapea, o le to’atele lava o tagata faatau e ulufale atu i le Manu’a Store latou te tausisia ta’iala ua faataoto e le malo. E leai lava se isi e faatuiese pe tete’e, ae molimauina lava le galulue faatasi o tagata o lo o alala i le itu i Sasa’e o le motu e ala i le fa’aaoga o face masks i taimi uma.
Ae talu ai le manatu e puipuia le atunuu atoa faapea ai le aufaigaluega e ulufale i totonu o le Manu’a Store, ua manatu ai le Pulega e tofia se tagata faigaluega i fafo na te tufa tufa fua atu face mask i soo se tasi e ulufale atu e aunoa ma se face mask.
E le gata i lea, e fa’aaoga fo’i e le tagata faigaluega lea le fagu e faamama ai aao (Sanitizer) e faamama ai aao o soo se tasi a o le i ulufale i totonu o le faleoloa.
Ina ua fesiligia e le Samoa News le tamaitai faigaluega o lo o faatinoina lea tiute, sa ia taua ai le leai o se tagata faatau e alu atu e leai sana face mask.
“O tagata faatau uma lava o loo ulufale mai i le Faleoloa e tofu uma ma face masks. E usita’i ma lotonu’u tagata faatau o loo i ai i lenei itu o le motu.”
E to’a 2 isi Faipisinisi i Fagatogo ma Nu’uuli na fesiligia e le Samoa News e tusa ai o le mataupu i tagata faatau e mumusu e faaaoga le face mask, ma la taua ai le leai o ni tagata faapea e ulufale atu i totonu o a laua Faleoloa.
“Talu lava ona amata mai le lockdown a le malo atoa ai ma le faamalosiga o le Code Red i le vaiaso na te’a nei, o tagata faatau uma lava e ulufale mai i la’u Faleoloa e tofu uma ma face masks. E o o foi i le faamalosia o le toa 10 o tagata faatau e talia i totonu o le Faleoloa i le taimi e tasi, e usitaia uma fo’i e tagata fa’atau,” o le faamatalaga lea a le Pule o le Faleoloa a le J & K Mart i Nu’uuli.
E eseese finagalo o le aufai pisinisi i le auala e faafetaia’i ai tagata faatau latou te le tausisia le poloaiga o le faaaoga lea o le face masks.
Na taua e le ulualii faipisinisi i Aua, la te le teena se tagata faatau e alu atu e aunoa ma se face mask ae la te talia pea faatasi ai ma le talosaga ina ia fai mai lana face mask i le isi taimi e alu atu ai e faatau.
Na taua e le ulualii lea i le Samoa News, la te amanaia aia tatau o tagata faatau pe afai e mumusu e faaaoga le face mask, ae sili ai i lo lena, e le mana’o e lusi a laua tagata faatau ona o le taumafai e faamalosi le poloaiga a le Kovana.
Sa la taua e faapea, talu ai ua tau leai ni tagata faatau ona ua taofi galuega a le kamupani, atoa ai ma le tele o galuega ua taofia, ua la manatu ai saili se isi auala e momoli ai le feau i le tagata faatau, nai lo le teena o le tagata faatau e ulufale talu ai le face mask.
O le faafitauli lava fo’i lea o lo o molimauina e nisi o Fale’aiga i le atunu’u. Na taua e le Taitai o se tasi o Fale’aiga iloa i le atunuu le faigofie o le latou galuega i le taimi nei, ona ua taofia le ulufale o tagata faatau i totonu, ae ua faaaoga le drive-thre e oka ai taumafa ma fo’i i le aiga.
O nisi o tagata na maitauina e le Samoa News le mumusu e faaaoga face mask o pasese o pasi la’u pasese.
Na taua e le alii ave pasi o le pasi a Leone ia Opeta Lafi, na te faamalosia tagata uma e ulufale atu i lana pasi ina ia fa’aaoga le face mask i taimi uma.
“E i ai lava tagata latou te usitaia le faatonuga ae solomua lava fo’i i nisi o tupulaga ma le au ulavavale latou te le taliaina le poloaiga a le malo, ae le afai fo’i ona ou tulia i fafo leaga o lea e tau su’e sa’u tupe,” o le saunoaga lea a Lafi ma soisoi.
O le tausaga na te’a nei ina ua faamaonia le i ai o le ulua’i tagata ua faamaonia le aafia i le KOVITI-19, na faamalosia ai loa e le afioga i le ali’i Kovana ia Lemanu Peleti Palepoi Sialega Mauga le faaaoga e tagata uma o le face mask pe afai e savalia soo se nofoaga faitele e aofia taavale la’u pasese, faleoloa, faleaiga e oo lava foi i Ofisa a le malo.
O le po o le aso Gafua o le vaiaso na te’a nei, Fepuari 22, na toe faamalosia ai e le alii Kovana lana poloaiga ma fautuaina ai tagata uma ina ia faamalosia le faaaogaina o le face mask, ona o le pipisi ai o le faama’i i tua i le atunu’u.
Na amata mai i le to’a 7 tagata na aafia ina ua pipisi le faama’i ae o le taimi nei, ua oo i le to’a 94 le aofa’i o tagata ua faamaonia le aafia.
O lo o galulue pea le Komiti Faafoe e gafa ma puipuiga o le KOVITI-19 e saili se auala e foia ai le pipisi o le faama’i, atoa ai ma se isi laasaga e tatau ona oo i ai le atunu’u pe a mae’a le vaiaso lona 2 lenei talu ona taofia nisi o galuega atoa ai ma aoga.
