Samoa
This article was added by the user . TheWorldNews is not responsible for the content of the platform.

Faamaonia Komiti Faafoe LBJ ni suesuega se tolu o faia faasaga I nisi o le aufaigaluega

Pago Pago - AMERIKA SAMOA

Ua faamaonia mai e le loia a le falema’I a le LBJ, o Thomas Jones, le faia o ni suesuega eseese se tolu (3) e faasaga I nisi o le aufaigaluega, e pei ona faatonuina mai e Faatonusili o le Komiti Faafoe a le LBJ.

O lea tulaga na faalauiloa faalauaitele mai e Jones I se feiloaiga a le Komiti Faafoe o le LBJ, ma sui o vaega faasalalau, I le Aso Lua o le vaiaso ua tuanai.

Na faalauiloa mai e le Komiti Faafoe, e eseese uma nei suesuega e tolu (3) ona o ni mataupu  taua o lo’o fia iloiloina.  E pei ona ta’ua e Jones, “ua na o se iloiloga I auala o lo’o faatinoina ai o latou tiute I totonu o le falemai, e iloa ai pe alagatatau ona fa’aauau le faatinoga o o latou tiute e pei o isi tagata faigaluega”.

Na saunoa Jones, “Afai ae maea nei suesuega ma ua manatu le komiti faafoe e le o o gatasi le faatinoga o latou tiute ma manaoga o le LBJ, o le a faapea lea ona toe iloiloga a latou tulaga faigaluega”.

Ma na faaleaogaina foi e Faatonusili o le Komiti Faafoe ia ni ripoti ua salalau, e tusa ai ma so latou taumafaiga e faate’a le susuga Fala Sualevai-Lesa, lea o lo’o faauluulu iai le Ofisa o tupe (CFO) a le falemai.

I se tali mai I le sui Taitaifono o le Komiti Faafoe ia Dr. Jean Anderson, I ni fesili sa imeli atu iai le Samoa News, na ia ta’ua ai e faapea, o le CFO na filifilia e le Komiti Faafoe, ma o lo’o ia faatinoina misiona ma sini faatulaga a le falemai.

I le vaiaso ua mavae, na faafeso’ota’I mai ai e nisi le Samoa News e uiga, ina ua mae’a ona faamavae le Faatonusili o le falemai, e tusa ai ma le tulaga ua masalomia e uiga I le faateaina o le CFO.  Ae peitai, na saunoa Dr. Anderson, o lo’o galue punouai le CFO, e le gata I le toe faaleleia atili o le falemai, ae faapea foi le fofoina o nisi faafitauli tau tupe na tula’I mai I taimi ua te’a.

O le tausaga ua mavae na toe saili ai e le LBJ ia se latou CFO e sui tulaga I le susuga I le Faafeagaiga ia Rev. Rapi Emau Amosa, ina ua avea o ia ma faauluulu o le Ofisa o e iloiloina tagi faasaga I le falema’I ma ona tagata faigaluega (Ombudsman).

Sa avea foi le susuga Rev. Amosa ma Faatonusili le tumau a le falemai, ina ua faamavae le afioga Faumuina Taufete’e John Faumuina mai I lea tofiga, I le masina o Mati o le tausaga ua mavae, se’ia o’o ina filifilia e le Komiti Faafoe ia le susuga Moefaauo William Emmsley e avea ma Faatonusili o le LBJ.

E tusa ai ma se fa’aaliga tusitusia mai I Faatonusili o le Komiti Faafoe a le LBJ, na ta’ua ai lo latou uia uma o ala o le Tulafono, I le filifiliga o Moefaauo e avea ma Faatonusili o le falemai ia Aperila 2022.  E lua tausaga le konakarate Moefaauo ma na ta’ua foi I lea fa’aaliga tusitusia, na autasi le faaiuga a le Komiti Faafoe I le filifiliga o Moefaauo.

Ae I le vaiaso ua mavae, na faamavae ai Moefaauo mai I lona tofi taitai, ae o le a faaauau pea ona maua lona totogi ma penefiti, e tusa ai ma se fa’aaliga mai I le Komiti Faafoe a le LBJ.