Samoa
This article was added by the user . TheWorldNews is not responsible for the content of the platform.

Faamatalaga a le isi to’alima aofia i le osofaiga a leoleo i Fagaalu i le vaiaso ua te’a

Pago Pago - AMERIKA SAMOA

E pei ona lipotia muamua e le Samoa News, e toavalu tagata e aofia ai ma ni tamaitai se toatolu na taofia i latou i le vaiaso na te’a nei ma tulai ai i luma o le Faamasinoga Faaitumalo ia Iuni 8, 2023, ona o tu’uaiga fa’asaga i le osofaiga a leoleo i ni aiga se lua i Fagaalu i le amataga o le vaiaso ua te’a. 

Na amata le osofa’iga a leoleeo i le fa’atinoina o se poloaiga mai le faamasinoga e su’e ai le ali’i o Kika Benjamin Tilei i Faga’alu ma fa’ai’u ai i le fa’atinoina o le tusi saisai i le fale o Tavita Tali.

O i latou nei e to’avalu ua molia e le malo: Kika Benjamin Tilei, Tavita Tali, Kueni Falepau, Aiga Suluao Tu’upo, Kamipeli Taufalele, Harris Fitiao, Adelle Fenumia’i ma Samuelu Luatua.

E to’a 3 mai le to’a 8 o i latou ua molia, sa fa’ailoa atu a latou fa’amatalaga i le lipoti a le Samoa News i le aso ananafi. O lo'o totoe le to’a 5 ma o a latou fa’amatalaga nei, e pei ona fa’ailoa i le tagi a le malo faila i le fa’amasinoga. 

KIKA BENJAMIN TILEI

I le aso na faia ai le osofaiga i le itula e 6:55 i le afiafi, na fa’ailoa ai e Tilei lona malamalama i ana aia tatau, peita’i sa musu e fai sana fa’amatalaga pe tali ni fesili. Na taofia i le toese i Tafuna e fa’atali ai lona tulai i le fa’amasinoga ia Iuni 8, 2023.

E 4 moliaga faasolitulafono ua tu’uaia ai Tilei—2 moliaga o le umia faasolitulafono o fualaau faasaina (marijuana ma le methamphetamine), 2 moliaga o le umia faasolitulafono o fualaau faasaina (mariuana ma le meth) ma le faamoemoe e tufa atu. E $40,000 lea ua faatulaga e tatala ai o ia i tua.

KUENI FALEPAU

O Kueni Falepau o lo o tu’uaia e tagata e to’afa sa faafaigaluegaina e lana uo tama o Kika Tilei e faigaluega i lana kamupani teu fanua, i lo latou umiaina o fualaau fa’asaina ma fa’atau atu. Fai mai i latou o le ala lea e totogi ai i latou i galuega latou te faia i le kamupani teu fanua a Tilei.

O le ato faafafa lea na maua i totonu o le potumoe o Tilei o lo o i ai tama’i ato o lo o i ai mea tioata papa’e faatasi ai ma isi vaega o lo o tu’uaia ai Falepau.

O le aso lava lea, Iuni 5, e pei o le osofaiga, na taofia ai Falepau. Sa ia fa’ailoa sa ia malamalama i ana aia tatau, peita’i sa musu e fai se fa’amatalaga pe tali i ni fesili.

O lo o tu’uaia Falepau i moliaga e 2 o lona umia fa’asolitulafono o vaega o le pauta fa’asaina o le mariuana ma le fa’asaina o le pauta, ma le fa’amoemoe e tufa atu. E $30,000 lea ua faatulaga e tatala ai o ia i tua.

AIGA TU’UPO

O se ‘straw’ lanu meamata ua tipi ese o lo o i ai mea tioata na maua i luga o le aiga o Tu’upo i le taimi na popo ai lona tagata a’o i ai i totonu o le ta’avale ma Tilei ma Falepau.

Ma ina ua sailia le fale o Tilei, o lo o tuuaia na maua ai i totonu o le potu lea na ta’ua o Tu’upo, o se laau mariuana- pe a ma le 2 futu le maualuga, 2 taga feololo o lo o i ai se vaega o mea tioata papa’e e mafai ona faaaoga mo le pauta fa’asaina. 

Na taofia o ia i le falepuipui, ma na musu e faia se faamatalaga pe tali fesili.

E 4 moliaga mamafa o lo o tu’uaia ai Tu’upo—2 moliaga o le umia fa’asolitulafono o vaega o le laau fa’asaina o le mariuana, ma le fa’asaina o le laau fa’asaina, ma le fa’amoemoe e tufa atu, atoa ai ma moliaga e 2 o le umia fa’asolitulafono o fualaau fa’asaina (marijuana and meth). E $30,000 le tupe lea ua fa’atulaga e tatala ai Tu’upo i tua.

KAMIPELI TAUFALELE

O Kamipele Taufalele, ina ua matauina e leoleo i le faletaavale a Tilei, sa ia togi ese le mea e foliga mai o se paipa tioata mai lona tagata. Ina ua fesiligia o ia e uiga i le mea na ia togiina, sa ia taua ai i leoleo na te lei lafoaia se mea, ae o lo o tuuaia e leoleo le maua o mea sa ia lafoai i lalo o le laulau ping pong sa i totonu o le faletaavale.

O Taufalele na taofia i le toese i le aso lava lea na faia ai le osofaiga. E tusa ai ma le faamatalaga a Taufalele, o Tilei ma lana uo teine o Falepau o loo faatau atu fualaau faasaina ma mariuana. Fai mai o ia o Falepau na valaau ia te ia ma fesili pe manao e faigaluega i le kamupani teu fanua a lana uo tama e maua ai se tupe ma o le a ia "tausia o ia" - e faailoa ai o le a ia tuuina atu fualaau faasaina mo ia.

Na fesiligia e Leoleo ia Taufalele e uiga i le paipa tioata na ia togiina ina ua aga’i atu leoleo i totonu o le fale, ma sa ia ioeina o ia e ana ma sa ia fa’atauina mai ia Falepau ae le’i o ese atu e amata se galuega fa’aleleia o fanua.

Na taua atili e Taufalele e fa’apea, o le tele o taimi latou te galulue ai o Tilei ma lana uo teine o Falepau e maua mai ai le $25 le tau o le meth mo le la galuega.

O lo o molia le ua molia i le moliaga mamafa e tasi o lona umia faasolitulafono o fualaau faasaina. E $5,000 le tupe ua faatulaga e tatala ai i tua.

HARRIS FITIAO

I le taimi o le sailiga o le fale o Tavita Tali, na maua ai e leoleo se isi alii iina, o Harris Fitiao, lea na pu’e faapagota e leoleo. 

E tusa ai ma le faamatalaga a Fitiao, sa ia tuuaia ai le faatauina atu e Tilei o fualaau faasaina mai lona fale, ma sa faigaluega o ia (Fitiao) i le kamupani teu fanua a Tilei. Na taua e Fitiao e fa’apea, o le a totogi o ia e Tilei mo lana galuega i se tama’i ato po’o se ‘straw’ ua tipi o lo o i ai fualaau fa’asaina e taui ai lana galuega. Sa ia taua fo’i, o le a ia fa’atauina fualaau fa’asaina mai Falepau pe a le maua Tilei.

E 1 le moliaga faasolitulafono ua molia ai Fitiao – o lona umia faasolitulafono o fualaau faasaina (meth). E $10,000 lea ua fa’atulaga e tatala ai o ia i tua.