Samoa
This article was added by the user . TheWorldNews is not responsible for the content of the platform.

Faia fautuaga a Senetoa Togiola i ta’ita’i o le Fono ma sui o le Fono

Pago Pago - AMERIKA SAMOA

I le tauaofiaga so’ofa’atasi a Maota e Lua o le Fono Faitulafono mo le talanoaina o le tupe fa’asoasoa o le tausaga tupe 2023 - lea e amata ia Oketopa aso muamua 2022 - sa tuuina atu ai manatu mai le afioga ia Senetoa Togiola T.A Tulafono i ta’ita’i o le Fono, ‘ao fa’afofoga afioga i senetoa ma faipule. 

O fautaga a Togiola sa tulai mai ona o se vaega o le saunoaga a le afioga i le Peresitene o le Maota Maualuga ia Tuaolo Manaia Fruean, e faia se si’itaga o totogi fa’aletusaga mo senetoa ma faipule o le Fono. 

Saunoa Tuaolo e fa’apea, o lana fautuaga a maua se avanoa ma le Fofoga Fetalai, e manaia le feutaga’i ma le afioga i le Kovana Sili, e toe fa’afo’i mai i le paketi a le Fono le $500,000 lea ua fa’aitiitia ai le tupe fa’asoasoa a le Fono mo le tausaga tupe 2023 mai ai le 2022. 

Saunoa foi Tuaolo, o lea vaega tupe - $500,000 - e fai ai si’itaga o totogi o faipule ma senetoa aua o le tulaga o lo’o i ai nei o totogi e ta’i $25,000 i le tausaga mo sui o le Fono Faitulafono. 

“Tatou taumafai e fa’aopoopo se isi $15,000 i totogi o lo’o i ai nei. E le’i faia mea nei mo tatou, ae fai mo e, e solo’ai mai i le tofi lenei,” o se manatu lea mai ia Tuaolo. “O le mea lava lea oute pese soo atu ai i soo se taimi, a i ai lava se mea lelei e faia e se tagata, fai nei ae o lo’o soifua.”

“O la’u lea fautuaga,” o a Tuaolo lea, ma fa’ailoa e tatau ona feutaga’i i lenei vaiaso ta’ita’i o le Fono ma le kovana i lenei mataupu ma fa’agasolo ai le tupe fa’asoasoa ae tuuina mai i le Fono se pili e si’i ai totogi o senetoa ma faipule. 

Saunoa le afioga i le Fofoga Fetalai, Savali Talavou Ale, “ona o lea fa’atoa amata iloiloga o le paketi” se’i tagai i ai i se taimi o i luma i le mataupu e pei ona saunoa i ai Tuaolo.

O le si’itaga o totogi sa lagolagoina e Senetoa Soliai Tuipine Fuimaono ma le Sui Fofoga Fetalai ia Fetu Fetui Jr. I o laua manatu sa fa’ailoa ai ua leva ona tatau ona si’i totogi o faipule ma senetoa. 

Sa toe fa’aopoopo atu Tuaolo e fa’apea, o le siitaga e faia i le nofoaiga lenei lona 37 a le Fono Faitulafono fa’atoa aloaia i le nofoaiga fou i le tausaga 2023 - le nofoaiga lona 38 a le Fono.

I le saunoaga a Togiola sa ia toe fa’amanatu ai nisi o manatu fa’aalia e sui o le Fono e fa’apea: a malie mai loa le kovana, e fai suiga e lelei mo le Fono Faitulafono, ona fa’apasia atoa loa lea o le paketi o le 2023. 

“Aua ne’i atagia i finagalo o le atunu’u se tulaga fa’apena, e tatou ave lea tulaga taua o le fa’agaoioiga o le malo e fai ma mea e tulei ai mataupu e lelei ai na o le Fono,” o se vaega lea o manatu o Togiola. 

“Faauau le tatou galuega i tulaga ua fausia e ta’ita’i komiti, ma le malalu o Maota e Lua, tatou fa’alogologo po’o a ni mea lelei, ia ona fai lea o finagalo o Moata e Lua ma le Fono Faitulafono i le pasia ma le le pasia o lenei galuega, ae maise galuega fa’aolioli mo le tausaga fa’aletupe 2023.”

“Ina ia maua e le atunu’u le to’a malie i o latou finagalo, o lo’o fa’atuatuaina le tatou galuega, faatuatuaina la oulua ta’itaiga i totonu o Maota, ma totonu o le Fono Faitulafono - o le vaega lenei e ta’u i le tatou malo fa’anofo-fa’avae, o ‘Maota e Lua o le vaega lenei a tagatanu’u’ - ‘The Legislature is the people’s branch of government’,” o se isi vaega lea o le saunoaga a Togiola i ta’ita’i o le Fono ma sui o le Fono. 

“O le mea moni lena, ia taga’i i ai a oulua afioga [i ta’ita’i], a’o saili le tofa, saili la oulua fa’autautaga aua le ta’itaiga o le atunu’u. Leaga o Maota e Lua, o le lala lenei a tagatanu’u - o le Fono Faitulafono.”

“Aua la ne’i o tatou galulue fa’atamatama i ai, pe tatou te saili ni tulaga fa’apena, ina ia maua e tataga le to’a malie ma le talitonu mai i le tatou galuega o lo’o fai, o lo’o tatou tutu mo le atunu’u. O tatou o le lala o le atunu’u.”

“O nai ‘au fautuaga na e tuu atu i o oulua tafatafa aua le agai i luma,” o se vaega lea o manatu o Togiola mo ta’ita’i o le Fono. 

“E leai lava se mea e afaina ai lo outou talanoa ma le afioga i le kovana. A ia faia i ni auala ua tatou iloa e lelei ma mautu ma aua ne’i fesiligia ai le tofa ma le fa’autaga a le Fono Faitulafono,” o upu fa’a’iu ia a Togiola. 

O le aso ananafi sa fa’amoemoe e feutaga’i ai le kovana ma ta’ita’i o le Fono ona o le $500,000 lea ua ave ese mai e le faigamalo mai le paketi a le Fono na pasia i le 2022, ma fa’aitiitia ai le tupe fa’asoasoa a le Fono mo le tausaga tupe fou o le 2023. 

I lalo o le tulafono, o le totogi o le Peresitene o le Maota Maualuga ma le Fofoga Fetalai o le Maota o Sui e $30,000 i le tausaga. 

O le tausaga ua te’a sa pasia ma sainia ai le tulafono fou e si’i ai le alauni mo le Fono. O alauni mo le Peresitene ma le Fofoga Fetalai ua fa’atulafonoina i le $60,000 i le tausaga, ae e ta’i $45,000 i le tausaga mo senetoa ma faipule.