Samoa
This article was added by the user . TheWorldNews is not responsible for the content of the platform.

FILIFILI LE UI’I ATAMAI E TAITAI I LE AIGA

Fa’atalofa atu i le mamalu o le atunu’u, ae maise o le au faitau i lenei taeao fou, taeao manino, taeao toto’a, ua alafa’i mai ai i le manuia i le alofa ma le agalelei o le Atua. Malo le soifua, malo foi le onosa’i i faiva ma tiute o lenei vaiaso, ae alo maia, i le tatou Tala Puupuu e faai’u ai le tatou vaiaso.

************************************************* 

I le malo o Saina sa nofo ai se toeaina ma ni ona atalii se toafa.  O alii e toatolu matutua ua fai aiga uma I latou.  Ma ona o le leai o se teine I totonu o lenei aiga, on aua maliu le to’alua o le toeaina, e masani lava na augani taito’alua a ona atalii, e fia o e vaai o latou matua.  Aua o tu ma aga ia o lea atunu’u, a toe fia o ia le au nofotane I o latou aiga, e tatau ona faanoi muamua I matua o o latou ta’ito’alua.

Ae ona ua fai so’o le mea a nei fafine o le augani I si toeaina pe mafai na o e asi o latou aiga, na mafaufau ai le toeaina I se auala e taofi ai lea tulaga.  I se tasi o aso, na toe faanoi ai ta’ito’alua o ona atalii e o I latou aiga, na faapea atu ai loa le toeaina, “Ia ua lelei, o mai I na o, ae a tou toe fo’I, ia tofu outou ma aumai mea ia ou te mana’o ai”.

Ua fiafia le au tamaitai ma faapea atu, “O le a?”

“Ia sau le tasi ma aumai se afi e afifi mai I se pepa.  O leisi ia aumai se savili e afifi mai I se pepa ma le lona tolua, ia aumai se musika e feavea’i I le matagi.  Afai e le mafai ona outou fo’I mai ma aumai mea nei, aua ne’i toe mafaufau seisi o outou e manatu e toe fo’I mai I le aiga lenei”.

Sa faapea si toeaina o le a suia mafaufau a fafine nei ae peitai, sa vave ona latou ioeina manaoga o si toeaina ma amata lona ona sauna e toe fo’I atu I o latou aiga.

A’o agai atu nei tamaitai I o latou aiga, sa o latou talatalanoa ma mafaufau pe faapefea ona o latou aumaia mea na fai atu ai le tama o a latou taitoalua.

A’o latou nofonofo I tafa ala, ae o latou vaaia se tamaitai o tietie atu I lana solofanua.  Sa fesili le tamaitai lea pe e iai se me aua tupu.  Na faamatala iai e le au nofotane ia manaoga o le tama a o latou taitoalua, I lenei tamaitai.

Na faapea atu loa le tamaitai lea o lo’o I luga o le solofanua, “Tatou o I le matou fale.  E mafai ona ou faasino atu le tali o la outou mataupu”.  Na faapena loa ona fai.  Ua o lenei tamaitai ma mafine nei e toatolu, I le fale o le tamaitai lea na alu atu I le solofanua.

Ina ua o latou taunuu I le fale sa tago loa le tamaitai lenei ua tu’u atu I le fafine muamua ia se moli e fau I le pepa.  O le afi e afifi I totonu o le pepa.  Ua maua le tali o le manaoga muamua.  Ona tago lea o le tamaitai ua tuuina I le fafine lona lua se ili ma ia faatonu iai, e tago e tapili.  Ua maua le tali o le manaoga lona lua a le toeaina, o le savili I totonu o le pepa.  I le manaoga mulimuli a le toeaina, sa tuuina iai e le tamaitai lenei ia ni mea tagitagi, a taia I le savili ona pei lea o se musika.

Ua fiafia le au tamaitai e toatolu ua maua mea o lo’o manao mai ai le toeaina.

Ina ua mae’a le tafaoga puupuu a nei mafine I o latou aiga, ua sauni o le a toe fo’I i le aiga o a latou taitoalua.

Na maofa le toeaina ina ua mafai ona tali e taitoalua a ona atalii mea uma sa ia tu’uina atu ia I latou e tatau ona o latou fo’I atu ma I latou.

Na fesili le toeaina pe na faapefea ona o latou maua le tali o ona manaoga, sa faamatala e mafine nei e toatolu ia le tamaitai atamai sa fesoasoani ia I latou.  I le fiafia tele o le toeaina sa ia saili ai lenei tamaitai atamai ma ia aumaia e nonofo ma lona atalii lona fa.  Ma sa ia faatonuina ai ona atalii ma ona taitoalua, ona o le atamai tele o lenei tamaitai ua nofo I le ui’I a le aiga, o lea, o le a tu’uina atu ai ia te ia le pule e ta’ita’ia ai lo latou aiga.

IA MANUIA LE FAAIUGA O LENEI VAIASO!