Samoa
This article was added by the user . TheWorldNews is not responsible for the content of the platform.

Le’i pasia Maota Maualuga tofiga fa’atonu-tofiga ia Galoia

Pago Pago - AMERIKA SAMOA

E le'i pasia e le maota o le Senate le suafa na fa’aulu atu e le Kovana Lemanu P.S.Mauga mo le tofiga Faatonu sili o le Ofisa o Suesuega ma Laveai, le susuga a Faamasino Upuese Galoia - faaiuga o le palota e 8 Ioe ae 7 Leai.  E tatau ona 10 e palota Ioe e faamautu ai le pasia a le Senate. Ae na faaamaonia e le Maota o Sui i le aso Faraile o le vaiaso talu ai lea tofiga. 

Talu ai ua teena e le Senate lea tofiga, o lona uiga ua le aloaia Galoia mo le fa’atonusili. 

Ae peitai, e mafai e le Kovana ona toe faatu atu le suafa o Galoia i le tofiga, na amata galue ai talu mai Iulai o le tausaga talu ai, poo le faatu atu o se isi  igoa fou mo le tofiga Faatonu.

O le Aso Gafua sa tula'i ai Galoaia i luma o le Komiti mo le Saogalemu Lautele a le Senate mo le faatalanoaga e faamautu ai, ma na faamanatu atu e le Afioga ile Senatoa ia Malaepule Saite Moliga, o le Susuga a Galoia ole tagata mulimuli lea ole toatolu na faaulu atu e le Kovana mo le faamaoniga poo le pasiaina foi i le tauaofiaga a le Fono o lo’o faia nei. 

Na faamanatu ane foi e le Seantoa o Manu'a, ua uma ona faamaonia e le Senate lesi to'alua - Falenaoti Loi-On Fruean o le Faatonu o le Matagaluega o Uafu ma Malae Va’alele ma Tauanu’u Semu Faisiota Tauanu’u ole Faatonu o le Ofisa o Falepuipui a le malo.

I le saunoaga a le afioga a Malaepule, e nate leiloa Galoia, peita'i e nate talitonuina le tofiga a le Kovana, ma ia fautuaina  le Senate e avatu foi iai le latou lagolago i le suafa ua faatu ane, e ala i le palota Ioe. 

Ma faauma ane lana saunoaga mo le komiti e palota Ioe e faamautu ai le avea o Galoia ma Faatonu ole lala fou lea ole Malo. 

Na avatu iai ma faamanuiaga ma fautuaga a le afioga i le Senatoa Fonoti Tafa’ifa Aufata  i le Susuga a Galoia. Ua 46 ai nei tausaga soifua o lea foi tamalii. 

Na faamanatu atu foi e le Taitaifono ole Komiti, Senatoa Fai’ivae Iuli Godinet le sui ua faatu ane e manatua, o le aufaigaluega, o le ivitu lena ma le aseta a le Malo e tatau lava ona faataua e le Ofisa fou.  Ma toe faailoa atili atu iai e Faiivae  ia Galoaia o le galuega lea e le faigofie. 

O le talaaga ole soifua galue o le sui faatu i le maitau a le Senatoa o Fofo, o lana galuega mulimuli na iai, sa ia taita'ia le  Communications Management Support Team, talu mai Mati 2018 e oo mai ile taimi nei, i le Ofisa Tutotonu  o le 21st Signal Brigade i, Fort Detrick, Maryland.

Na fesiligia e le Afioga a Fai'ivae ia Galoaia poo galuea ai lava i le galuega lea, ae tali le sui faatu, e leai, na toe foi mai i lona aiga ina ua uma lana auaunaga i le Militeri i le faaiuga o le 2021 i le amataga o le 2022. 

Ma sa fautuaina e Fai'ivae le sui faatu e toe faafou ana faamaumauga o lona soifua galue. Na faaleo faalauaitele  foi e Fai'ivae faamatalaga o Galoia, sa ia pulea tulaga tau fesootaiga a Vaega Lagolago Support Team.

I lana pepa lava lea o faamaumauga o le soifua galue o Galoia, o ta'u mai ai, o le Support Team lea na ia ta'ita'ia, o tagata na fili faapitoa mo le  U.S. Army Communications Management Support Team.  E eseese uma lava Setete e faamautu ai i galuega tau i tomai faaonaponei, e sootaga i fesootaiga e lagolago ai Auaunaga Faalilolilo a Amerika ma Faatonu o Vaega militeri poo Joint Director of Military Support. 

Sa iai faatasi ma isi vaega o le aufaigaluega a le  Search and Rescue Agency  ile Potu o le Senate i le 15 minute na faatalanoa ai le faamautuina o le Faatonu. 

O ISI MATAUPU

O le Aso Faraile talu ai, na pasia ai e le Maota o le Senate ma le Maota o Faipule i taimi o latou mataupu faagasolo le avea ai o Tauanuu Semu Faisiota Tauanuu e avea ma Faatonu o le  American Samoa Corrections Agency. 

Ua avea ai nei Tauanuu ma Faatonu muamua o lea matgaluega fou i totonu o le faigamalo.