Samoa
This article was added by the user . TheWorldNews is not responsible for the content of the platform.

Molia i le susunuina o le fale o le faifeau o le ekalesia Petesa

Pago Pago - AMERIKA SAMOA

Ua molia nei e le malo se taulealea i le susunuina o se fale, i lalo o tuuaiga fa’apea, sa ia susunuina se fale i Petesa o se tasi o faifeau o le ekalesia.

O lo o taofia pea Peni Toso i le toese i le $30,000 - sa fa’atulaga a le faamasinoga e mafai ona tatala ai i tua. Ma o lo o tu’uaia o ia i le moliaga mamafa e tasi o le susunu fale, o le vaega B lea o solitulafono mamafa, lea e mafai ona fa’asala ai se tasi i le toese i le va o le 5 i le 15 tausaga.

O le Aso Lua o le vaiaso lenei na tula’i ai Toso i luma o le Fa’amasinoga Fa’aitumalo mo lenei mataupu.

E tusa ai ma le tagi a le malo sa faila i le fa’amasinoga, o le aso 10 o Fepuari, 2023 na maua ai e leoleo se valaau mo se fesoasoani, ina ua susunu se fale o se aiga i Petesa.

Ina ua taunuu atu leoleo, na vaaia ai le fale o lo o mu i le afi.

“A o matou leoleoina le nofoaga ma faatalitali mo le taunuu atu o le au fuimu, na alalaga mai ai nisi mai le nuu e aofia ai ma le Faifeau o Tupuivao Ioelu e ona le fale, o le tagata e igoa ia Peni na susunuina le fale,” ose fa’amatalaga tusitusia lea i le tagi a le malo, e tusa ai o le lipoti a leoleo.

“Na ta’u mai ia i matou, o le tamaloa lea sa nonofo ai ma lona to’alua o Pusi Toso, i le fale ma sa i ai le isi nofoaga i le itu i sasa’e o le motu, i Pagai.”

Na taua e molimau i leoleo a’o latou momoe i totonu o le fale, na fafagu e le ua molia i latou e fa’amanino ma fai atu “o le a ia susunuina le fale.”

Na taua e se tasi o molimau e fa’apea, ina ua i ai le ua molia i totonu o le latou potu, na lagona ai e le molimau le manogi o le ‘ava malosi, ina ua fa’atonu e le ua molia i latou e o ese vave mai le fale.

Sa manatu ifo muamua le molimau e le moni le tala a le ua molia ona ua onā. Ma o lea na toe moe ai loa le molimau. I ni nai minute mulimuli ane, sa mafai ona ia sogisogi i se mea mu ma vave ona lagonaina le vevela i totonu o le fale ua alu i luga. 

“Ina ua sau i fafo mai lona potu, sa faateia o ia i le vaai atu ua mu le potu o le uso o lona tama.”

O le aso na mae’a ai le fa’alavelave na aga’i atu ai Leoleo i Pagai i le nofoaga o lo o nofo ai le ua molia ma maua atu ai o  a. O le tagi a le malo, lo o taua ai e faapea, na ta’utino le ua molia sa ia susunuina le fale.

“I lana ta’utinoga, sa ia ta’ua ai sa ia faia se misa ma le Faife’au e ana le fale. O lona ita tele ina ua mae’a le misa, sa ia toe fo’i ai i le fale ma sasaa lona potu i le penisini ma ta le afi,” o faamaumauga tusitusia ia o lo’o taua i le tagi a le malo.

Sa alu ese le ua molia mai le fale ua mu ae alu i le auala i tua e tau atu i Fagaima ma nofo ai i lalo o le Pulu e lata ane i le fale o le Iunivesite o Wayland.

“Na mafai ona vili se tasi o le aiga mai Pagai na alu atu e piki ma ave o ia.”