Samoa
This article was added by the user . TheWorldNews is not responsible for the content of the platform.

Molia se taulealea i le umia fa’asolitulafono o vaega o le pauta fa’asaina ‘aisa’

Pago Pago - AMERIKA SAMOA

O le Aso Sa, Me 7, 2023 na pu’e faapagota ese leoleo o le Matagaluega o le Puipuiga o le Saogalemu Lautele, se taulealea ona o le umia o le faasolitulafono o le pauta faasaina o le “methamphetamine” - po o le ‘aisa’.

E pei ona taua i le pepa tagi a le malo i le fa’amasinoga, o le aso 7 o Me, na fa’afesoota’i ai e le Ofisa autu o Leoleo le Vaega a le Vice and Narcotics Unit e fa’atatau i se tulaga e ono tula’i mai ai se mataupu tau fualaau fa’asaina i le taimi na taofia ai se taavale i luga o le alatele.

Na ta’ua e le ali’i leoleo, na ia matauina le ta’avale a Ioane Pasu ua uma le aoga o pine o le lesitala ma taofi le ta’avale. I le taimi o le taofiga o taavale, lea sa faia i tafatafa le aoga a Iakina e lata ane i le alatele a le Malo o Iliili, na talosagaina ai e leoleo ia Ioane e tuuina atu se laisene ave taavale poo se ata e iloa ai, ae na te lei faia.

Na taua e le ali’i leoleo e fa’apea, ina ua ia fa’ailoa i le ua molia o le a taofia le ta’avale, sa usita’i le ua molia ma i le fa’atinoina o lea gaioiga, sa maitauina ai e le ali’i leoleo o luga o le nofoa o le ave ta’avale o lo o i ai se paipa tioata o lo’o atu ai se vaega o le pauta, ma ose vaega o le paipa o lo’o ufiufi i se ofutino lanumoana.

Sa fesiligia e le leoleo ia Ioane e uiga i lea mea na maua ma na ia ta’ua ai e le o ia e ana.

Sa fa'aaoga se pusa su'esu'e o le meth e su'e ai le pauta i le tioata ma maua mai ai fa'ai'uga lelei mo le meth po'o le 'aisa.

Sa musu Ioane e fai sana faamatalaga i lea taimi. 

Peita’i, i le taimi na fa’agasolo galuega a leoleo e taofia le ua molia, na augani atu ai le ua molia mo se avanoa lona lua, ona ia ta’utino atu ai lea o le paipa sa maua i totonu o le ta’avale o ia lava.

O le ulua’i iloiloga a le ua molia i luma o le fa’amasinoga sa fa’ataunuuina i le Aso Lulu o le vaiaso lenei.

O lo o tu’uaia ia Ioane i le moliaga mamafa e tasi o lona umia fa’asolitulafono lea o vaega o le pauta fa’asaina o le ‘aisa’, o se solitulafono mamafa e mafai ona fa’asala ai se tasi i le toese mo le umi e le itiiti ifo i le 5 pe sili atu i le 10 tausaga, atoa ai ma le salatupe e le itiiti ifo i le $5,000 ae le sili atu i le $20,000.

E $3,000 le tupe ua fa’atulaga e le fa’amasinoga e mafai ona tatala ai Ioane i tua mai le toese i Tafuna.