Samoa
This article was added by the user . TheWorldNews is not responsible for the content of the platform.

Molia susuga ia Jimmy Tanielu i le talepe fale

Pago Pago - AMERIKA SAMOA

Ua molia nei se ali’i i le moliaga o le talepe fale,  se fa’alavelave na tula’i mai i le tusa o le lua vaiaso talu ai i Leone. 

O Jimmy Tanielu, lea o loo taofia i le vaavaaiga a leoleo se’i vagana ua totogi le $5,000 e tatala ai i tua, e pei ona fa’atulaga e le fa’amasinoga. O le vaiaso ua te’a na tula’i ai o ia i luma o le Fa’amasinoga Fa’aitumalo.

O lo o tu’uaia le ua molia i le moliaga o le talepe fale ma le gaoi, o ni solitulafono mamafa ma le sopo tuaoi - o se solitulafono mama.

O le alii leoleo suesue i lenei mataupu o Mycah Leififi.

E tusa ai ma le mataupu a le malo, na maua ai e le Ofisa o Leoleo i Leone se valaau i le aso 22 Ianuari, e talosagaina ai se fesoasoani e tusa ai o se fale o se aiga na talepe i totonu o le nofoaga lea na gaoia ai se ili-uila (chainsaw) e tusa ma le $700 lona tau.

Na taua e le malo i le latou tagi i le fa’amasinoga e fa’apea, na taunu’u Leoleo i le fale o le aiga ma latou matauina ai le na a’afia o lo o uu i lalo le ua molia. Na vave ona o ese atu leoleo mai le taavale leoleo ma maua ai le ua masalomia.

Na aoina e leoleo faʻamatalaga ma puʻeina ata o le vaaiga ma faʻatalanoaina le na aʻafia ma se tagata na tuʻuina atu e faʻatatau i lenei mataupu.

E tusa ai ma le tagi a le malo, na iloa ai e le na aafia o lana ili-uila na gaoia ina ua tatala e se tasi le taualuga o le faletaavale e ulufale ai.

O lo o tuuaia le ua aafia na masalomia o le ua molia lea na talepe i totonu o lona faletaavale, ona e le o se taimi muamua lea ua gaoia ai e Tanielu ni mea mai le fale o le ua tagi, ae e lei lipotia lava.

O le aso na soso’o ai na alu atu ai le ua tagi e su’e le ua molia ma maua ai o ia o moe ma fesili i le ili-uila.

Na ta’utino le ua molia i le ua tagi na ia talepeina le faletaavale ma gaoia le ili-uila ona faatau atu lea i se tagata ese i luga o le auala.

Na taua e le ua molia i leoleo e faapea, o le aso 17 Ianuari 2023 sa ia a’e ai i luga o le laau sa i tafatafa o le fale o le alii na aafia ma oso i luga o le taualuga ona tatala lea o le taualuga e ulufale atu ai i totonu o le faletaavale.