Samoa
This article was added by the user . TheWorldNews is not responsible for the content of the platform.

Moliaga fou fa’aulu e le malo i le Fa’amasinoga

Pago Pago - AMERIKA SAMOA

E lua isi tagi fou a le malo sa faila i le Fa’amasinoga Itumalo i le vaiaso ua te’a. 

EPIFANO SUNIA

O Epifano Sunia ua molia i le moliaga o le gaoi, ona o tu’uaiga na ia aveese mai ai se iPad Mini mai le pusa fa’aaliga i totonu o le faleoloa o le Bluesky i Nuuuli.

E tusa ai ma le faamatalaga a le malo, o le aso 09 o Novema, o le tausaga ua te’a na faatoa tatala ai o ia i tua mai le Falepuipui i Tafuna (TFC), ina ua ia gaoia le iPad o lo o fesiligia.

O le masina ua te’a na molia ai le Sunia e $3,000 le tupe lea ua fa’atulaga e le fa’amasinoga e tatala ai Sunia i tua. 

E tusa ai ma tagi a le malo, o le aso 09 o Novema, 2022 na faila ai le tagi i le Ofisa o Leoleo i Tafuna (TPS) e fa’atatau i se iPad Mini na gaoia mai le pusa fa’aaliga i totonu o le faleoloa o le Bluesky. 

O se meapu’eata, (video) mai se tagata e le mailoa na tuuina atu i leoleo. Na taua e le tagata faigaluega a le Bluesky i leoleo, i le aso 09 o Novema, 2022 ina ua siaki mea o lo o faaalia, na iloa ai o loo misi se iPad mini.

Ma o le video na fa’aalia ai le fa’alavelave ma na mafai ai e leoleo ona iloa le ua molia e nofo latalata i le malae tapolo. Na piki e Leoleo ia Sunia ma fa’ailoa i Leoleo ina ua mae’a ona tatala i tua, ua alu sa’o o ia i le fale.

Na fa’amaonia e Leoleo e fa’apea, o Sunia na taofia i le Toese i Tafuna ia Novema 06, 2022, i se mataupu e le fesootai ma le mataupu i le Blueksy ma tatala ai i tua ia Novema 09, 2022 pe tusa o le itula e 12 i le aoauli.

Faaalia e leoleo i fa’amaumauga a le malo, o le ata video na faalauiloa e le Bluesky o loo faaalia ai se tagata e fetaui lelei ma le faamatalaga o Sunia o loo uu mai le iPad mai le faaaliga i totonu o le faleoloa o le Bluesky ma savali i fafo e aunoa ma se tasi na iloa.

SHAUN LAOLAGI

E $3,000 le tupe lea ua fa’atulaga e le fa’amasinoga e tatala ai Shaun Laolagi i tua, e fa’atatau i le moliaga o le umia fa’asolitulafono o vaega o le mariuana.

O le aso Faraile na te’a nei na tula’i ai o ia i luma o le fa’amasinoga maualuga. O le alii leoleo suesue i lenei mataupu o le alii leoleo ia Lori Leota, o le vaega suesue o solitulafono a le ofisa o leoleo.

E tusa ai ma le mataupu a le malo, o le aso 07 o Ianuari 2023 na auina atu ai le vaega a le Vice and Narcotics i le valaau mai le ofisa o leoleo i Tafuna e tusa ai o vaega o fualaau faasaina na maua ia Laolagi, ina ua faamaonia lona tagofia o le ‘ava malosi a o faafoeina lana taavale.

O le tagi a le malo o lo’o fa’ailoa sa taofia Laolagi i luga o le alatele o lona fa’asuaava a o faafoeina lana taavale (DUI).

Ina ua uma ona faia le su'ega DUI, na fa'amaonia ai o le aveta'avale sa i lalo o le malosi o le 'ava malosi. Ona ave lea o le avetaavale i le ofisa o leoleo mo nisi suesuega.

Ina ua sailia e leoleo le ua molia, na maua ai e leoleo o sikaleti marijuana o lo o natia i totonu o se pusa sikaleti i le itu taumatau o lona ofuvae.

O le su’esu’eina o le ta’avale sa faia i luma o Laolagi lea na maua ai e Leoleo ni mea o lo o teuina i totonu o le fagu vaila’au lanu meamata.

O mea uma na maua e leoleo na fa’amauina ma tu’u atu i le potu e teu ai molimau a le Matagaluega o Leoleo. O le sikaleti marijuana ma le fagu vailaau lanu meamata sa su’eina ma faamaonia ai o le marijuana.