Samoa
This article was added by the user . TheWorldNews is not responsible for the content of the platform.

O LE TEINE FAAIPOIPO

Pago Pago - AMERIKA SAMOA

Ua tago atu Elisapeta ma u’u mau mai lima o le tamaitai faaipoipo o Emma ma le maligi o ona loimata, i lona fiafia ua i’u manuia ma le manuia le aso o si ana tama o Peteru ma si ona toalua fou o Emma.  Ae na toe me’ia loimata a Elisapeta, i foliga o le le mautonu, ina ua tau lana vaai i le ila i luga o le tauau a Emma.  O lea ila e ese lava ona foliga mai isi ila e masani a tagata, o le ila o se ata o le fatu.  

Ua le mautonu Elisapeta ma ia pupulato’a atu i foliga o le tamaitai faaipoipo.  O iina fa’ato’a iloa atu ai e Elisapeta foliga tonu o lona aiga.

O Peteru e nofo i se a’ai e fai sina mamao ma le nu’u na fanau ma ola mai ai, ona o lana galuega.  Ma e le tele se taimi e asiasi atu ai i lona aiga ona lona pisi tele.  Ma o le taimi muamua lea fa’ato’a feiloa’i tino ai Elisapeta ma Emma, o le aso o le la faaipoipoga, aua o taimi uma lava, e talanoa lava i luga o a’upega tafailagi.

O le fiafia ua liua i le popole ma le le mautonu.  Ma na lagonaina lelei lava e Emma le taimi na liua ai lagona o le tina o Peteru, o Elisapeta.  Ma ua pulato’a atu Emma i foliga o le tina ia Elisapeta, e saili le mafuaaga ua sui ai ona foliga.  Na tilotilo atu Emma i foliga popole, o le fefe, ma le le mautonu o Elisapeta.

Na fia fesili atu Emma ia Elisapeta pe iai se mea ua tupu, ae ua faalavelave atu nisi o le au valaaulia na fia o’o atu e faamalo ia Emma, i lona aso fiafia.  Ua savali ese atu Elisapeta, ae ua le aveesea ai le vaai a Emma i le mea o lo o faatopetope atu ai Elisapeta. 

Ae o le taimi lea, ua savali sa’o lava Elisapeta aga’i i le fale le ta’ua a tamaitai, ma tu i luma o le fa’ata ma fai atu i lona ata, “E leai!  E leai!”  Ua le mafai ona taofi le maligi faaua o loimata o Elisapeta.  Ma ia tagi aueue ai lava i luma o le fa’ata.

Ua toe fo’i mafaufauga o Elisapeta i le 17 o ona tausaga.  O se tausaga pito sili ona faigata i lona olaga.  O le taimi lea sa faapea lava a ia, ua na iloa uma mea o lenei lalolagi, ua ia te ia le tali o mea uma.  O le taimi lea o le la faauoga ma le alii o Peretania.  O se alii e moomoo uma iai teineiti o le aoga.  Ae na ia filifilia Elisapeta e la te faauo ma na avea lea ma tulaga ma si’itia ai le tulaga tauta’ua o Elisapeta i totonu o le aoga.  Ua fia faataitai atu teine uma o le aoga ia te ia, ua fia uo uma atu tamaiti o le aoga ia te ia.  

Ae peitai, na iloa lelei e matua a Elisapeta, le ituaiga tagata e iai Peretania ma sa o la taumafai lava e fautuaina Elisapeta e uiga i lona so’ona pipi’i atu ia Peretania.  Ae peitai, o le taimi lea, ua matua’i pupuni lava taliga o Elisapeta i se upu mai ona matua.  Ua o’o lava ina amata ona pepelo Elisapeta i ona matua, ae ua sola ese atu ma le fale i le tele o po, ona o le fia manao e faatasi ma Peretania.

Ona o’o mai lea o aso faanoanoa.  Ua iloa e Elisapeta, ua tupu le faalavelave ia te ia.  I lona faatamala tele, na i’u lava ina tula’i mai se faalavelave ua le mafai ona natia.  Ua liua le fiafia i le faanoanoa, o le faafiapoto i le le mautonu i le mea o le a fai.  Ae liliu atu Elisapeta ia Peretania mo se fesoasoani, ae ua fulitua mai le alii o le lalolagi ma o’o lava ina ona toe filifilia seisi tamaitai fou e la te tafafao.  Ua toe foi Elisapeta i le tulaga na iai.  Ua toe tapa i le ‘i’ofi po o nai ona matua. 

Sa le’i fulitua nai ona matua, ae ua la opogi mai o ia ma faamafanafana ma faalototele ia te ia.  Iva masina sa feagai ai Elisapeta ma faigata o se tina fuafuaina.  Ua talatalanoa atu nai ona matua ia te ia, i le tulaga e mafai ona fai i le pepe pe a o’o i le aso e tu’ueseeseina ai i la’ua.  O le faaiuga na faia, o le a vaetamaina le pepe fou, ina ia maua sona lumanai manuia.

E ui i le momomo o le loto o Elisapeta i si ana pepe, ae faigata, ua matutua nai ona matua, e le gafatia ia i la’ua ona tausi se pepe fou.  E faigata ia Elisapeta ona faauma lana aoga, faigaluega mo le tausiga o le pepe fou.  

I le aso sa fanau mai ai le pepe fou, sa tasi lava le mea na manatua e Elisapeta, ae e le’i aveeseina atu e fomai lana pepe, o le ila lea sa i le tau’au o le pepe, e pei o se ata o se fatu.

IA MANUIA TOE FUAFUAGA O LENEI VAIASO!