Samoa
This article was added by the user . TheWorldNews is not responsible for the content of the platform.

Osofai’ga a leoleo i Leloaloa ma Utulei i le vaiaso ua te’a

Pago Pago - AMERIKA SAMOA

O le po o le aso Faraile na te’a nei na fa’atautaia ai e Leoleo fa’aa’upega a le Vaega a le Vice and Narcotics a le Matagaluega o le Puipuiga o le Saogalemu Lautele a le malo se osofa’iga o fualaau fa’asaina i se fale o se aiga i Leloaloa.

Na fa’ataunu’u e Leoleo le poloaiga e su’e ai fualaau fa’asaina ma maua ai ni ali’i se to’afa ua tofia i le toese i Tafuna. 

Na fa’amaonia mai e se tasi o leoleo sinia e le o fa’atagaina e talanoa i le au fa’asalalau lenei mataupu.

Na aapa atu le Samoa News i le sui komesina ia Foifua Jr Vaipuna ma Terry Letuli peitai e lei manuia taumafaiga e oo mai i le taimi o le lomiga o lenei nusipepa i le po o le Aso Gafua.

Fai mai le alii leoleo sinia, ua molia nei alii e toafa i le umia faasolitulafono o fualaau faasaina.

“E toafa alii na taofia i le po o le Aso Faraile i Leloaloa peitai e toatolu alii ua molia”, o se tala lea a le leoleo sinia. 

Na faamaonia foi e le alii ofisa sinia le tali atu foi o leoleo i se valaau i Utulei na mafua ai ona taofia se alii e toatasi, lea ua molia nei i le moliaga o le umia faasolitulafono ma le umia faasolitulafono ma le faamoemoe e tufatufa atu.

O i latou uma ua molia na fa’amoeoe e tulai i luma o le Fa’amasinoga Faaitumalo i le taeao ananafi. 

O le lua masina talu ai, na osofaia ai e le vaega a le Vice and Narcotics ni fale eseese se lua - o le tasi i le afioaga o Petesa ma i le taimi e tasi i le afioaga o Fagaima.

E latalata i le $5,000 le tinoitupe, faatasi ai ma le pauta fa’asaina o le aisa (methamphetamine - meth), mariuana, ma paipa tioata, faatasi ai ma le aofa’i atoa o le auala e latalata i le $10,000 na maua mai i ia nofoaga e lua.