Samoa
This article was added by the user . TheWorldNews is not responsible for the content of the platform.

Tapunia nofoaga tausi ai fanau (Daycare), amata Iuni 14, ina taofiofi le pepesi fa’ama’i o le RSV

Pago Pago - AMERIKA SAMOA

Ina ia taofia le pepesi o le fa’ama’i o le Respiratory Syncytial Virus (RSV), ua poloaina ai e le malo le tapunia o fale tausi ai fanau - Day Care Centers - uma i le teritori, e amata atu i le aso 14 Iuni, se’i o’o i se isi fa’aaliga.

O lea tulaga na fa’amaonia mai i se pepa o fa’amatalaga ananafi mai le Fa’atonusili o le Matāgaluega Tautua ma Alāgamanuia mo Tagata Lautele Muavaefa’atasi John E. Suisala, lea sa ia fautuaina ai matua ma le mamalu lautele o le atunu’u e uiga i le tapunia lea na pasia e le afioga i le Lutena Kovana, Talauega Eleasalo Ale, e tusa ai o se fautuaga mai le Matagaluega o le Soifua Maloloina ma le LBJ Medical Center ona o le maualuga o le numera o tamaiti o loʻo maua i auga o le RSV sili ona pipisi.

O fa’amatalaga na maua e le Samoa News mai tausi soifua a le LBJ ma isi tagata faigaluega o lo o taua ai le aofa’i o fanau e maua i auga RSV sa vaaia i le falema’i i le vaiaso na te’a nei, ma fa’aauau ai lava i le fa’aiuga o le vaiaso na te’a nei se’ia oo mai i le aso Gafua o le vaiaso nei.

O lenei fa’ama’i e mafua mai ona o se vairusi ma o foliga po’o āuga o le RSV e tai tutusa ma le fūlū (tafe o le isu, lē lagona se fia ‘ai, tale, mafatua, fiva, ma e a’afia ai le mānava). To’atele o tagata e toe malolosi i le tasi po’o o le lua o vaiaso. ‘Ae e iai fo’i le avanoa e telē ai le a’afiaga pe tigaina ai pepe ma tagata mātutua ona o le RSV. 

“E momoli atu le fa’afetai mo le tou malamalama, ‘ae maise foi le tou sapasapaia o taumafaiga uma mo le puipuia o le soifua maloloina ma le saogalemu o a tatou fanau,” o se fa’amatalaga lea a le malo. Mo nisi fa’amatalaga vala’au mai i le i le 633-CARE (2273) po’o le 633-1571. 

Ma o le taimi nei, o lo’o fa’aauau pea e le Matagaluega o le Soifua Maloloina i le vaiaso nei, o le tu’uina atu lea o tui e leai se totogi i le Maketi i Fagatogo e o’o atu i le aso 16 Iuni ma le fale o le malo, le EOB i Utulei i le aso 15 ma le aso 16 o Iuni. Taimi faatulaga mai le 8a.m. i le 2pm.

“O le RSV ma le fulū ua faatupulaia teritori. O tui o lau puipuiga #1 faasaga ia i latou, ”o le tala lea a le Matagaluega a le Soifua Maloloina i se faamatalaga puupuu i le amataga o lenei vaiaso.

Pau lava le mea e te manaʻomia mo nei tui o lau pepa tui ma lau ID ata, ma i lalo ifo o le 10 minute, o le a e alu atu ma le faʻamalosia o le puipuiga aemaise lava i lenei vaitau o le faʻauʻuga e tatau ona faʻamanatuina ai faʻatasiga, ma o le flu e sili ona leaga i au atugaluga.”

Mo nisi fa'amatalaga fa'afeso'ota'i le DoH command center ile 219.