Samoa
This article was added by the user . TheWorldNews is not responsible for the content of the platform.

TAUSALA LALELEI O LE MOSO’OI 2022 - MS NELLIE TUIGAMALA:

Pago Pago - AMERIKA SAMOA

Matagofie le afiafi a tamali’i sa alofaiva i ai le A.B.L.E poo le Fa’alapotopotoga a le “Agency For Better Living Endeavors” ma ana pa’aga ina ia tausailia ai le Tausala Lalelei o le Moso’oi 2022. 

Mai toe tausaga o le vaitausaga 1997 na muta mai ai lava ona tausailia se tausala lalelei mo le vaiaso o le Moso’oi i Amerika Samoa, ma sa i ai fo’i se taimi na fa’aavanoa mai le afiafi fa’apitoa, a’o lei amatalia le polokalama tamau mo le sailiga o le Tausala Lalelei o le Moso’oi, e saunoa fa’amanuia mai ai le vasega o tausala sa tutula’i mai lenei tofi talu mai lona amataga. 

O i latou nei e aofia ai le tamaitai o Jaqueline Kneubuhl sa mua’i saunoa, ona soso’o lea ma le tamaitai o Mereiseleisa Elisara Reupena ae tomuli ai i le faletua Fuatino Matai mai Fagatogo, o le tamaitai sa avea ma fofoga o le KVZK-TV a’o talavou ma tautua i lo tatou nei malo.

I le polokalama fa’asolo sa fa’atulaga ai fofoga fetalai mo lea faiva o le tamaitai lalelei o Fatima Langkilde ma Carl Schuster.  O le susuga le Fa’afeagaiga Rev. Lafitaga sa tofia mo se upu fa’amalosi i tausala lalelei o le a tauva, Sa ia fa’aaogaina lona avanoa e tima’i ai le fanau tauva, i le eseesega o tauvaga sailiga ole Lalelei i foliga ma le tino nei, “Ae o le lalelei e sili ona taua, o le lalelei o le faau’upegaina o outou le fanau talaou i tomai eseese ma outou fa’aaogaina tatau e toe aoga ai i tagata lautele, fa’atino ai tautua eseese ua outou agava’a e fa’atino, ina ia fa’afo’i le manuia i le Malo, Nuu ma Ekalesia ae maise Matua ma aiga.”

O le ala lea ona fa’avasega o vaega eseese o le tauvaga lenei, ina ia mafai ona outou fa’aalia mai o outou taleni lea ua outou agava’a ai mai le Atua ina ia fa’apupula atili i le vasega o fa’amasino ma le aofai o maimoaina outou i lenei po, poo au ua sili ona agava’a.”

“O le tou tula’i mai o se fa’alauiloaga lea o lo outou naunauta’i ina ia faia sa outou vaega mo se fa’amoemoega lelei, e tautua ai Amerika Samoa. Malo le loto toa e tula’i ma faatauva, o outou faiva o le a filifili mai ai se tasi ua sili ona agava’a e tautua i le matagaluega o le tatou Malo o lo’o fa’atautaia le tatou Vaiaso o le Moso’oi.” O se toe upu lea a Rev. Lafitaga ona tatalo ai lea e amatalia le fa’amoemoe.

Sa saunoa Monti Tupuola, “O le Fa’aaiiga o le Moso’oi o se taumafaiga lea a le Ofisa o Turisi poo tagata maimoa mai fafo, ina ia fa’aalia le tatou Aganuu ma tatou Agaifanua eseese fa’apea ma tatou Measina ua mae’a gaosia ma fausia lelei e o tatou tagatanuu. O le taimi lea e o mai fa’atasi uma ai i latou e i ai agava’a ma tomai fa’apitoa nei ina ia mafai ona fefa’asoa’i ma ia mautinoa o lo’o fa’aauau lava ona silafia lelei le gaosiga ma le fausia o nei measina a Samoa. O le taumafaiga lenei e ao ina agaga faatasi uma i ai i tatou uma, le Malo i lana pitola’au”, le mamalu o le atunuu ina ia loto i ai e fa’atino nei mea uma, ma le aufaipisinisi ina ia latou sapaia nei taumafaiga uma, ina ia toina atu se taui e fa’afiafia atili ai fanau talavou e taofimau lea I’umaea ne’i mamulu ma mou atu ai.”

Sa faafaigata ona foe le tiute faamasino a le vaega Faamasino ona o le matagofie o tapenapenaga ma sauniuniga a tamaitai tauva o lea afiafi.  E fa ni vaega ma’oti na tausinio iai nei Tausala e to’afa.  O le vaega muamua, o le palota faainiteneti (online vote).  O leisi, o le fa’aaliga Ofu Laula’au.  O le siva Samoa.  O le Taleni, ae mulimuli I le tauvaga la’ei faaonaponei ma le Fesili ma Tali.

O taleni a le Tausala muamua, o Lene Uiagalelei, sa ia usuina ma fa’atino taga o le pese fa’anoanoa, “E Lelei, E Lelei. Le Ali’i” Sa ia la’eia fo’i le la’ei o le fa’anoanoa, Uliuli atoa.

O le taleni a le Tausala lona lua o Lolomaletaiotumua Faoliu sa ia peseina ai le pese mo tala fa’afagogo a le fanauiti, ae ua ia tuuina i ai ma se vaega mulimuli lava o le siva Hula. 

O le taleni a le Tausala lona tolu i le tauvaga, o Ieta Lafitaga, sa ia faaleoina se solo na tusia i mata matagi e lima o le atu Samoa. Le Tuaoloa, Le Fisaga, Le La’i ma le Si’u Amouli. O nei matagi uma ua aofia i se tusi a le tusitala Samoa, Fofo I’iga Iosefa Fiti Sunia. Ua ia fa’atinoa lea fo’i taumafaiga a le Tusitala, ina ia fai ma fa’amanatuga o lana taumafaiga ina ia faofale i a’ai o finagalo le Gagana Samoa, ma ia avea ma fa’amua i lou soifua fa’apolopolo i measina a Samoa.

Peita’i o le taleni lona fa na vavao ai le au maimoa, aua sa le fa’atali ma matamuli le tamaitai o Nellie Tuigamala i lona fa’atinoga o tala fa’afagogo mo le fanauiti i lana faitau ma fa’atino mo le latou silafia ma se maimoa fo’i. Na amata mai i foliga o sui o lo’o aofia i le tala o ia faitauina mo le fanau. Ua le manofo fa’amasino, aua o le fa’atinoga ua pei ua toe maimoa i le ata tifaga o fa’amatala le “Tamaitai Teine I’a o Aerial.”

O le Taleni fo’i lea na togisilia i le fa’aiuga ona tuufa’atasia togi na tapena e fa’amasino i lea po. 

I le vaega mulimuli o Fesili ma Tali, na fesiligia ai le tamaitai o Lene Uiagalelei, “O le a sou iloa, se mea e ao ina faia e lou talavou mo le tupulaga i a’oga ma isi fa’alapotopotoga uma, ina ia mautinoa ai e fa’aauau le fa’amoemoe o le fa’atumauina ona fiafia i latou e fa’aauau le aganuu ma agaifanua eseese a Samoa?”

Sa toe tepa o ia i lana manulauti ma ia fa’ailoa ai, “O le fa’anaunauta’iga lava lea o lona fa’amoemoe ina ia fa’aauau ona tima’ia le tupulaga talavou, ia mautu lo latou fiafia ma le fiailoa ona fa’ataua measina a Samoa, tu ma agaifanua.”

O le fesili mo le tausala lona lua Loloma Faoliu, “O le vaitau o le Covid-19 ua faatautaia ai a’oa’oga i laina tafa’ilagi. O le a se aoga o lea faiga ma e mafai ona fa’aauau pea lea fo’i faiga o aoaoga fa’avaitau nei?”

O lana tali sa ia fa’ailoa mai ai, “E lelei lava le aoaoga e fa’atautaia i luga o laina feso’ota’i tafailagi, e aoga fo’i mo le taimi e lutia ai le atunuu i fa’aletonu ua le mafai ai ona fa’atino a’oa’oga i potu a’oga. Peita’i o le ituaiga o aoaoga lava e sili ona aoga i le fanau, o le a’oa’oga lea e faia mo i latou i le va ma faiaoga i le potu a’oga.”

O le tausala lona tolu Ieta Lafitaga, o lana fesili, “Pe afai o le a filifilia oe e fai ma Tausala Lalelei o le Moso’oi, o le a ni polokalama o le a e taumafai e fa’atino ina ia fa’aleleia atili ai tomai ma fa’afiafiaina le fanau talavou ina ia latou fa’aauau ona fiafia i latou e fa’aalia tatou tu ma agaifanua faasamoa ma fiafia fo’i e gaosi ma fausia galuega taulima fa’asamoa, o measina ia a le atunuu?”

O lana tali sa ia fa’ailoa mai, “Ona o a’u o se sui o le matou fo’i autalavou o le a ou taumafai ai e galue malosi e fa’aleleia polokalama e mafai ona fa’aautu i le fa’afiafiaina o le autalavou e fa’atino mea uma e tatau mo le fa’aauauina o tatou aganuu, agaifanua ma le tele fo’i o measina e ao ina gaosia ma silafia lelei ona fausia.”

Ae mo le Tausala mulimuli, sa fesiligia ai o ia e tusa ai ma tulaga o le Gasegase faalemafaufau “Mental Health”.

I le aotelega o le tauvaga i le afiafi o le aso Toona’i ua mautu mai ai fa’aiuga a fa’amasino e fa’apenei:

Togisilia i fa’ailoga e lima e aofia ai ma le Togisilia i le Initeneti ua mautu lea i le tamaitai o Nellie Tuigamala, 20 tausaga le matua ma o lo’o tau’avea e ia le kosi Pre-Law i le ASCC. O lona afio’aga o alaala ai i Amerika Samoa nei o Leone ma o lona tina o Atrina Tuigamala ma lona tama o Jeff Matalasi. Ua ia sailia sona avanoa e maua ai e ia se fa’aopoopoga o le seleni e mafai ai ona fesoasoani malosi e totogia lona pili mo ana aoaoga i le Kolisi Tuufa’atasi aua o ia e le o se Nesionale o Amerika a’o se tasi na soifua a’e i Samoa Tuto’atasi.

O lona fa’ailoga tupe na taua’aoina mai e le Bluesky e $4,000 ma isi mea uma e aofia ai ma le telefoni e $350. lona tau.Sa tele fo’i isi fa’ailoga na taua’aoina lea e pa’aga eseese sa latou foa’i mo lea fa’amoemoe aua le tauvaga tausala o le Moso’oi 2022.

Sa fa’aalia fo’i lona lagona fiafia ma le fa’agae’etia aua o lo ua avea nei le avanoa ua ia maua e fa’afetaia ai le vasega o Pisinisi uma sa fa’apa’aga mo foa’i eseese i fa’ailoga ua latou taulimaina fa’atasi ma le fa’atupeina o mea uma na fitaituga ai le ABLE mo lenei fa’amoemoe, ae silisili ai o le Bluesky, le Kamupani Telefoni loto alofa ua latou foa’ia mai tupe e fesoasoani i o latou pili totogi i a’oga. Fa’afetai, fa’afetai tele lava le agalelei ma le loto alolofa.

O le fa’ailoga o le tulaga lua na mauaina lea e le tausala o Ieta Lafitaga ma sa fa’atupeina lana taumafaiga e le Foeletini Foundation. Sa maua fo’i lana meaalofa tupe fa’asikolsipi e $2,000 mai le Bluesky, fa’atasi ai ma isi fa’ailoga uma sa lautogia ai le tulaga lua i le tauvaga tausala o le Moso’oi i lenei tausaga. O isi meaalofa uma na mafai ona faameaalofa mai mo le fa’amoemoe e kamupani eseese i le atunuu faapea ma fa’alapotopotoga.

O tausala lalelei o Lene Uiagalelei ma Lolomaletaiotumua Faoliu sa tofu fo’i i la’ua ma meaalofatupe ta’i $1,000. mai le Blue Sky faapea fo’i le anoanoa’i o isi faailoga uma sa mafai ona taua’aoina mai isi kamupani ma fa’alapotopotoga fa’apea ma sui taito’atasi na foa’i mo le fa’amoemoe.

O le tamaitai o Elinor Lutu McMoore sa avea ma sui mamalu o le ABLE e fa’ao’o mai le latou agaga fa’afetai, i a latou pa’aga na latou tausoa fa’atasia le fa’amoemoe e  fa’ataunuu ai le Tauvaga Tausala Lalelei o le Moso’oi 2022. Sa vala’aulia fa’apitoa fo’i e le ABLE le afioga le faipule o Amerika Samoa i le Konekeresi e fesoasoani i le taua’aoina o fa’ailoga i sui lautogia o tausala ua fa’amanuiaina ai.

O se afiafi ua sili ona fa’afiafiaina i latou na auai ona o le matagofie o taumafaiga sa faatino e  tausala sa fa’atauva, mo le pale o le Tausala Lalelei o le Moso’oi 2022.